މިއަދު އިރުއޮއްސި 18:00 އާ ހަމައަށް ރާއްޖޭގެ އެކި ހިސާބުތަކަށް ވިއްސާރަކުރާނެ ކަމަށް މޫސުމާ ބެހޭ ޤައުމީ އިދާރާއިން ލަފާކޮށްފިއެވެ. މިނިވަން ދުވަހުގެ މޫސުން ކުރިއަށް ލަފާކުރާ ގޮތުގެ މަޢުލޫމާތު އާންމުކުރަމުން އެ އިދާރާއިން ބުނި ގޮތުގައި، މުޅި ރާއްޖެއަށް ވެސް މިއަދު މޫސުން ގޯސްވާނެ ކަމަށް ބެލެވެއެވެ. މީގެ ތެރެއިން ބައެއް ސަރަހައްދުތަކަށް ގުގުރުން ވެސް އެކަށީގެންވާ ކަމަށް އެ އިދާރާއިން ވަނީ ހާމަކޮށްފައެވެ. މޫސުމާ ބެހޭ ޤައުމީ އިދާރާއިން އާންމުކޮށްފައިވާ މައުލޫމާތުތަކަށް ބަލާއިރު، މިއަދު އެންމެ ބޮޑަށް ވިއްސާރަކުރާނެ ކަމަށް ލަފާކޮށްފައިވަނީ އުތުރާއި މެދުރާއްޖެތެރޭގެ އަތޮޅުތަކަށެވެ. އެގޮތުން އެ ސަރަހައްދުތަކުގެ ބައެއް ރަށްތަކަށް ވިއްސާރަކުރުމާއެކު ގުގުރުން އެކަށީގެންވާ ކަމަށް އެ އިދާރާއިން ބުނެފައިވެއެވެ. މީގެ އިތުރުން ދެކުނުގެ އަތޮޅުތަކަށް ބަލާއިރު، އެ ސަރަހައްދުގެ ބައެއް ރަށްތަކަށް ކެރީގެ އަސަރު ފޯރާނެ ކަމަށާއި، މަދު ރަށްތަކަކަށް ގުގުރުން އެކަށީގެންވާ ކަމަށް ވެސް މެޓް އޮފީހުން ވަނީ ލަފާކޮށްފައެވެ. ކަނޑުގަދަ ދުވަހެއް: ބައެއް ހިސާބުތަކަށް ކަނޑުތައް ގަދަވާނެ ކަމަށް މެޓުން ލަފާ ކުރޭ-- ސަން ފޮޓޯ/ އިބްރާހިމް ނާއިޝް މި ދުވަސްވަރަކީ ރާއްޖޭގެ އެކި ހިސާބުތަކަށް މޫސުން ބަދަލުވަމުންދާ ދުވަސްވަރަކަށް ވުމާއެކު، މޫސުމަށް އަންނަ ބަދަލުތަކަށް ސަމާލުވުމަށް ކަމާބެހޭ ފަރާތްތަކުން އިރުޝާދުދެއެވެ. ވައިޖެހޭނެ ގޮތުގެ ތަފްސީލަށް ބަލާއިރު، ރާއްޖޭގެ އެކި ހިސާބުތަކަށް ވައިޖެހޭނެ ކަމަށް ލަފާކުރެވެނީ ތަފާތު ދެ މިސްރާބަކުންނެވެ. ދެކުނުގެ އަތޮޅުތަކަށް އިރުދެކުނާއި ދެކުނުން ގަޑިއަކު ތިން މޭލާއި 10 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކޮށްފައިވާއިރު، ރާއްޖޭގެ އެހެން ހިސާބުތަކަށް ވައިޖެހޭނީ ހުޅަނގާއި ހުޅަނގުއުތުރުން ގަޑިއަކު އަށް މޭލާއި 18 މޭލާ ދެމެދުގެ ބާރުމިނުގައެވެ. އަދި ވިއްސާރަވެ ވިލާގަނޑު އަންނަ ވަގުތުތަކުގައި ގަޑިއަކު 35 މޭލަށް ވައިގަދަވުން އެކަށީގެންވާ ކަމަށް ވެސް މޫސުމާ ބެހޭ ޤައުމީ އިދާރާއިން ވަނީ ހާމަކޮށްފައެވެ. ވައިގަދަވާ ވަގުތުތަކުގައި ކަނޑުދަތުރުކުރާ ފަރާތްތަކުން ސަމާލުވުމަކީ މުހިންމު ކަމެއް ކަމަށް އެ އިދާރާއިން ފާހަގަކުރެއެވެ. ކަނޑުތަކުގެ ހާލަތަށް ބަލާއިރު، ދެކުނުގެ އަތޮޅުތަކުގެ ކަނޑުތައް އާދައިގެ ވަރަކަށް މަޑުވާނެ ކަމަށް މެޓް އޮފީހުން ލަފާކުރެއެވެ. ނަމަވެސް އުތުރާއި މެދުރާއްޖެތެރޭގެ ކަނޑުތައް އާދައިގެ ވަރަކަށް ގަދަވެފައި، ވިލާގަނޑުގައި އިތުރަށް ގަދަވާނެ ކަމަށް ވަނީ ލަފާކޮށްފައެވެ. ރާޅުގެ އުސްމިން ހުންނާނެ ކަމަށް ލަފާކޮށްފައިވަނީ ދެކުނުގެ ކަނޑުތަކުގައި އެއް ފޫޓާއި ތިން ފޫޓާ ދެމެދުގައެވެ. އަދި އުތުރާއި މެދުރާއްޖެތެރޭގެ ކަނޑުތަކުގައި ރާޅުގެ އުސްމިން ތިން ފޫޓާއި ހަ ފޫޓާ ދެމެދުގައި ހުންނާނެ ކަމަށް އެ އިދާރާއިން ވަނީ ހާމަކޮށްފައެވެ.