އެމްޑީޕީގެ ކުޅިވަރާ މުނިފޫހިފިލުވުމެގެ އެމްޑީޕީގެ ސިޔާސަތު \"މަޖާކުރުން، ބިރަކާއި ނުލައި މުނިފޫހިފިލުވުން\" އިފްތިތާޙް ކުރުމަށް ރާޅުގަނޑު ސަރަހައްދުގައި ބާއްވަން އުޅުނު ހަރަކާތްތައް ފަސްކޮށްފިއެވެ.
ކުޅިވަރާއިމުނިފޫހިފިލުމުވުގެ ސިޔާސަތު އިފްތިތާހުކުރުމަށް ރާޅުގަނޑު ސަރަހައްދު ތައްޔާރުކުރުމުގެ މަސައްކަތް ވެސް ކުރުމަށް ފަހު އެމްޑީޕީން ބުނީ ދެން އެ ހަރަކާތް ބާއްވާނެ ދުވަހެއް ފަހުން އިއުލާން ކުރާނެކަމަށެވެ.
އެމްޑީޕީގެ ޗެއާރޕާސަންގެ ނާއިބު އަލީ ޝިޔާމު ވިދާޅުވީ ކުޅިވަރާ މުނިފޫހިފިލުވުމުގެ ސިޔާސަތުގެ ދަށުން ކުރިއަށް އޮތް ފަސް އަހަރު 900 މިލިއަން ރުފިޔާގެ ބަޖެޓެއް އެސިޔާސަތަށް ހަރަދު ކުރައްވާނެ ކަމަށާއި އެއީ 20 ޕްރޮގްރާމެއް ހިންގުމަށް ހަމަޖައްސަވާފައިވާ ބަޖެއްޓެއްކަމަށެވެ. އަދި ޒުވާނުން ކުޅިވަރު ކުޅޭއިރު އެކުދިން ރަނގަޅަށް ޕްރޮފެޝަނަލްކޮށް ކުޅިވަރުގައި އުޅެވޭނީ އާއިލާގެ ހަމަޖެހުން ލިބިގެން، ބިރަކާ ނުލާ އެކަމުގައި ޝާމިލުވެ ހިތްހަމަ ޖެހިގެންކަމަށެވެ. އެހެންކަމުން އެމްޑީޕީގެ ހުރިހާ ސިޔާސަތުތަކެއް ވެސް ހުންނާނީ އެއް ސިޔާސަތު އަނެއް ސިޔާސަތާއި ގުޅިލާމެހިފަ ކަމަށެވެ.
އެމްޑީޕީގެ ކެމްޕެއިން ހަރަކާތްތަކުގައާއި ޕޮލިސީތައް ކަނޑައެޅުމަށް އެކުލަވާލާފައިވާ ކޮމެޓީގެ މެމްބަރު އަހުމަދު ޝާހިދު (ސާބެ) ވިދާޅުވީ މާލެ އާއި ރާއްޖޭގެ އެކި ސަރަހައްދުތަކުގައި ސްޕޯޓްސް ކޮމްލެކްސްތަކެއް ހަދައި ކުޅިވަރު ކުޅެވޭނެ ރަނގަޅު މާހައުލެއް ގާއިމު ކުރެވޭނެ ކަމަށެވެ. އަދި އެކިއެކި ރަށްރަށުގައި ޓާރފް ދަނޑުތައް އަޅުއްވާނެ ކަމަށާއި ރަށްރަށުގައި ހުރި ޒުވާނުންގެ މަރުކަޒުތައް މާރާމާތުކޮށް އެތަންތައް ތަރައްގީ ކުރެވޭނެ ކަމަށެވެ.