އދ. އަތޮޅުގެ ރިސޯޓެއްގެ ގެސްޓްރޫމަކުން ވަގަށް ނަގާފައިވާ ކަމަށް ބެލެވޭ ޑޮލަރުތަކަކާއި ގަހަނާތަކެއް ހޯދައި އެތަކެތީގެ ވެރިފަރާތާ ހަވާލުކޮށްފި އެވެ.
ފުލުހުން ބުނީ މި މައްސަލައާ ގުޅިގެން 34 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ.
ފުލުހުން ބުނީ އޭނާ ހައްޔަރުކޮށްފައިވަނީ މި މަހުގެ އެއްވަނަ ދުވަހުގެރޭ 11:30 ހާއިރު އދ. މަހިބަދޫ ޕޮލިސް ސްޓޭޝަނަށް ހުށަހެޅި ވައްކަމުގެ މައްސަލައަކާއި ގުޅިގެން މަހިބަދޫ ޕޮލިސް ސްޓޭޝަނުން ހިންގި އޮޕަރޭޝަނުގައި އެރޭ މެންދަމު 00:50 ހާއިރު އދ. ދިގުރަށުން ކަމަށެެވެ.
ފުލުހުން ބުނީ މިމީހާ ފުލުހުންގެ ބެލުމުގެ ދަށަށް ގެނެސް އޭނާގެ ހަށިގަނޑު ބަލައި ފާސްކުރިއިރު އޭނާ ލައިގެންހުރި ފަޓުލޫނުގެ ވައަތްފަރާތު ކުރިމަތި ޖީބުން 1592 ސިންގަޕޫރު ޑޮލަރު ފެނިފައިވާ ކަމަށެވެ. އަދި އޭނާ އެވަގުތު ގެންގުޅުނު ދަބަހެއްގެ ތެރެެއިން ވަގަށް ނަފާއިވާ ކަމަށް ބެލެވޭ ގިނަ އަދަދެއްގެ ގަހަނާތަކެއް ފެނިފައިވާ ކަމަށްވެސް ބުނެ އެވެ.
މިމައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވާ މީހާގެ ބަންދާ މެދު ގޮތެއް ނިންމުމަށް މަހިބަދޫ މެޖިސްޓްރޭޓް ކޯޓަށް ހާޒިރުކުރުމުން ހޯމް މިނިސްޓްރީން ކަނޑައަޅާ ތަނެއްގައި ބަންދުގައި ބަހައްޓައިގެން ތަހުގީގު ކުރިއަށް ގެންދިއުމަށް 10 ދުވަހުގެ މުއްދަތެއް ދީފައިވާ ކަމަށްވެސް ފުލުހުން މައުލޫމާތުދެ އެވެ.
މި މައްސަލަ ތަހުގީގުކުރަނީ އދ.މަހިބަދޫ ޕޮލިސް ސްޓޭޝަނުންނެވެ.