24 ވަނަ ގައުމީ ކަސްރަތު މުބާރާތް މިއަދު ހަވީރު ފަށާގޮތަށް ހަމަޖައްސައިފިއެވެ.
އެތުލެޓިކްސް އެސޯސިއޭޝަނުން އިންތިޒާމްކޮށްގެން ކުޅިވަރު އެކުވެނީގެ ދަނޑުގައި ކުރިއަށްދާ މި މުބާރާތް ކުރިއަށްދާނީ މިއަދުން ފެށިގެން 2 ދުވަހުގެ މުއްދަތަކަށެވެ.
އެތްލެޓިކްސް އެސޯސިއޭޝަނުން މައުލޫމާތުދޭ ގޮތުގައި މި މުބާރާތުގައި މިއަދު ކުރިއަށްދާ އިވެންޓްތަކުގެ ތެރޭގައި ފިރިހެނުންގެ 100މ ދުވުމުގެ ހީޓް، ފިރިހެން އަދި އަންހެން 800މ ފައިނަލް، ފިރިހެން ހައިޖަމްޕް ފައިނަލް، އަންހެން ފިރިހެން 100މ ދުވުމުގެ ފައިނަލް ހިމެނޭނެ ކަމަށެވެ.
ފިރިހެން 100މ ދުވުމުގައި ވާދަކުރާ އެތުލީޓުންގެ ތެރޭގައި ރާއްޖޭގެ އެންމެ ބާރު ދުވުން ތެރިއާ ޙަސަން ސާޢިދު އާއި 2013ވަނަ އަހަރުގެ 100މ ދުވުމުން ރަންމެޑަލް ހޯދި އަލީ އަނާލް އާއި އެ މުބާރާތުގެ 100މ ދުވުމުން 3ވަނަ ހޯދި ޙުސައިން އިނާޝްގެ އިތުރުން ކުރީގެ ރާއްޖޭގެ 100މ ދުވުމުގެ 1 ވަނަ އެތުލީޓް އަޒްނީމް އަޙްމަދު ހިމެނޭ ކަމަށް އެތްލެޓިކްސް އެސޯސިއޭޝަނުން މައުލޫމާތުދެ އެވެ.
އަންހެން 100މ ދުވުމުގައި ވާދަކުރާ އެތުލީޓުންގެ ތެރޭގައި ރާއްޖޭގެ މިހާރުގެ އެންމެ ބާރު އަންހެން ދުވުންތެރިޔާ އަދި 2013ވަނަ އަހަރުގެ 1 ވަނަ ދުވުންތެރިޔާ އަފާ އިސްމާޢީލް ހިމެނޭ ކަމަށާއި ފިރިހެނުންގެ 800މ ދުވުމުގައި ވާދަކުރާ އެތުލީޓުންގެ ތެރޭގައި މިދިޔަ އަހަރުގެ މުބާރާތުގެ 1ވަނަ އަދި ރާއްޖޭގެ 800މ ދުވުމުން މިހާރު އެންމެ ބާރު ދުވުންތެރިޔާ އަޙްމަދު ޙަސަން ހިމެނޭ ކަމަށްވެސް އެ އެސޯސިއޭޝަނުން މައުލޫމާތުދެ އެވެ.
އެތްލެޓިކްސް އެސޯސިއޭޝަނުން ބުނީ ދެ ޖިންސުގެ 100 އެތްލީޓުން ވާދަކުރާ މި މުބާރާތުގައި އަންހެނުންގެ 12 އިވެންޓާއި ފިރިހެނުންގެ 14 އިވެންޓް ކުރިޔަށް ދާނެ ކަމަށެވެ.