ހ. ބެރެބެދިމާގެއިން ވަގަށް ނަގާފައިވާކަމަށް ބެލެވޭ އިލެކްޓްރޯނިކް ސާމާނުތަކެއް ފުލުހުން ހޯދައި 3 މީހަކު ހައްޔަރުކޮށްފި އެވެ.
ފުލުހުން ބުނީ މިއަދު ހެނދުނު ފުލުހުންނަށް ލިބުނު މަޢުލޫމާތަކާއި ގުޅިގެން މި މައްސަލައިގައި ފުލުހުންގެ ބެލުމުގެ ދަށަށް ގެނެސްފައިވާ މީހުން ދިރިއުޅެމުން ދިޔަ ތަންތަން ބަލާ ފާސްކުރުމުގެ ތެރޭގައި ހ. ބެރެބެދިމާގެއިން ވަގަށް ނަގާފައިވާ ލެޕްޓޮޕަކާއި 2 ފޯނު ފުލުހުން ހޯދާފައިވާ ކަމަށެވެ.
ހ. ބެރެބެދިމާގެއިން ވައްކަންކޮށްފައިވާ މައްސަލައާއި ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ ގއ. ވިލިގިލި ހަނދުވަރީގެ މިޔާދު އަޙުމަދު (33އ) އާއި ހ. ސީރާޒް އިބްރާޙީމް ޝާޙް (33އ) ގެ އިތުރުން މ. ސޭބޫގެ މުޙައްމަދު ފާރިޝް (27އ) އެވެ.
މިއަދު ހެނދުނު ހ.ބެރެބެދިމާގެއިން ވަގަށް ނަގާފައިވާކަމަށް ބެލެވޭ ތަކެތި ވެރިފައި ކުރުމަށްފަހު އެތަކެތީގެ ވެރިފަރާތާއި ހަވާލުކުރުމުގެ މަސައްކަތް ކުރަމުންދާ ކަމަށް ފުލުހުން ބުނެއެވެ.
މި މައްސަލަ މޯލްޑިވްސް ޕޮލިސް ސަރވިސްއިން ގެންދަނީ ތަޙުޤީގު ކުރަމުންނެވެ.