އައްޑޫ ސިޓީ ހިތަދޫއަށް ދިމާވެފައިވާ ކަރަންޓުގެ މައްސަލައަށް ހައްލެއް ގެންނަން އެންމެ އަވަސް ވެގެންވެސް ހަ މަސް ނަގާނެ ކަމަށް ފެނަކާ ކޯޕަރޭޝަނުން ބުނެފިއެވެ. ފެނަކާގެ މެނޭޖިންގް ޑިރެކްޓަރު އަހުމަދު ޝަރީފް އިއްޔެ ވިދާޅުވީ ހިތަދޫއަށް ގެންދާ ދެ މެގަވޯޓުގެ ދެ ޖަނެރޭޓަރު ސްޓެލްކޯގެ ބެލުމުގެ ދަށުގައި މާލޭގައި އެބަ ހުރި ކަމަށެވެ. ނަމަވެސް އެ ޖަނެރޭޓަރުތައް އިންސްޓޯލް ކުރަން ޖެހެނީ ސީ ވޯޓާ ކޫލިންގް ސިސްޓަމަކާ އެއްކޮށް ކަމަށާއި އެމަސައްކަތް ނިމުމުން ޖަނެރޭޓަރުތައް އިންސްޓޯލް ކުރުމުގެ މަސައްކަތް ފެށިގެންދާނެ ކަމަށް އޭނާ ވިދާޅުވިއެވެ. ޝަރީފް ވިދާޅުވީ ސީ ވޯޓާ ކޫލިންގް ސިސްޓަމް ގާއިމް ކުރުމަށް ބޯ ހޯލް ތޮރުފުމުގެ މަސައްކަތް އެމްޑަބްލިއުއެސްސީއާ ހަވާލުކޮށްފައިވާ ކަމަށެވެ. އެކުންފުންޏާ އެކު ވެފައިވާ ކޮންޓްރެކްޓުގައިވާ ގޮތުން 140 ދުވަސް ތެރޭގައި އެމަސައްކަތް ނިމޭނެ ކަމަށް ޝަރީފް ވިދާޅުވިއެވެ. "އެ މަސައްކަތް ކުރުން ކުރިއަށް އޮތް ހަފްތާ ތެރޭގަ ފައްޓަވާނެ ކަމަށް އެބޭފުޅުން ވިދާޅުވެފަ އެބައޮތް،" ޝަރީފް ވިދާޅުވިއެވެ. އޭނާ ވިދާޅުވީ އާ ދެ ޖަނެރޭޓަރު އިންސްޓޯލް ކުރުމާ ހަމައަށް، ހިތަދޫއަށް ވަގުތީ ކަރަންޓު ދިނުމުގެ ގޮތުން މިހާރު އެރަށުގައި ހުރި ޖަނެރޭޓަރަށް ބޭނުންވާ ސްޕެއާ ހޯދުމަށް އެމްޓީސީސީއަށް ރިކުއެސްޓްކޮށްފައިވާ ކަމަށެވެ. އަދި ވަރަށް އަވަސް މުއްދަތެއްގެ ތެރޭގައި ސްޕެއާ ތައް ލިބި ވަރަށް އަވަހަށް އެރަށަށް ސްޓޭބަލްކޮށް ވަގުތީ ކަރަންޓު ފޯރުކޮށްދެވޭނެ ކަމަށްވެސް އޭނާ ވިދާޅުވިއެވެ. މީގެ އިތުރުން، ސްޓެލްކޯގެ ބެލުމުގެ ދަށުގައި ހުރި ދެ މެގަވޯޓުގެ ދެ ޖަނެރޭޓަރު އެރަށަށް ގެންދިއުމުގެ މަސައްކަތްވެސް މި ހަފްތާ ތެރޭގައި ކުރެވޭނެ ކަމަށް އޭނާ ވިދާޅުވިއެވެ.