އަރަބި މުނިފޫހިފިލުވުމުގެ ދާއިރާގެ އަގުވަޒަން ކުރުމަށް ސައުދީ އަރަބިއްޔާގައި ބާއްވާ ޖޯއި އެވޯޑްސްގެ މި އަހަރުގެ ހަފްލާ މި މަހު 18 ވަނަ ދުވަހުގެ ރޭ ރިޔާދުގައި ވަރަށް ކުލަގަދަ ކޮށް ވަނީ ބާއްވާފަ އެވެ. މިއީ މުނިފޫހިފިލުވުމުގެ ދާއިރާއިން އަރަބިކަރައިގެ އެންމެ ޝަރަފުވެރި އެއް ހަފްލާ އެވެ.
ސައުދީ އަރަބިއްޔާގެ ޖެނެރަލް އެންޓަޓެއިންމަންޓް އޮތޯރިޓީން އިންތިޒާމްކޮށްގެން ބާއްވާ މި ހަރަކާތުގައި މިއުޒިކާއި ފިލްމާއި ޓީވީގެ މޮޅެތި ފަންނުވެރިން ބައިވެރިވެ އެވެ. އަރަބި ސެލެބްރިޓީއިންގެ އިތުރުން ހޮލީވުޑް އާއި ބޮލީވުޑްގެ ތަރިން ވެސް ހަފްލާއިން ފެނެ އެވެ.
މި އަހަރުގެ ހަފްލާގައި ބޮލީވުޑް ތަމްސީލު ކުރީ ރިތިކް ރޯޝަން އާއި ޝްރައްދާ ކަޕޫރް އެވެ.
އެންމެ ފަހުން މިދިޔަ އަހަރު އަމަރް ކޯޝިކްގެ ބްލޮކްބަސްޓާ ބިރުވެރި ކޮމެޑީ ފިލްމު 'ސްޓްރީ 2' އިން ފެނުނު ޝްރައްދާ އަކީ މިފަހަރުގެ ޖޯއީ އެވޯޑްސް ހަފްލާގެ ޕްރެޒެންޓަރެކެވެ. 
ފިލްމީ ދާއިރާގައި މަސައްކަތް ކުރާތާ 25 އަހަރު ވެފައިވާ ރިތިކް ރޯޝަން ވަނީ ޝަރަފުވެރިކަމުގެ ޖޯއި އެވޯޑު ހޯދައި އިންޑިއާ ފަހުރުވެރިކޮށްދީފަ އެވެ. 
އެވޯޑް ބަލައިގަތުމަށް ފަހު ވާހަކަދައްކަމުން ރިތިކް ބުނީ އޭނާ ދާއިރާއަށް ހިދުމަތް ކުރާތާ 25 އަހަރު ވީ އިރު އެކްޓިން އަކީ ކޮން ކަހަލަ މަސައްކަތެއްކަން ދެނެގަންނަން ވެސް އެހާ ގިނަ ދުވަސް ނެގި ކަމަށެވެ. އަދި ލިބުނު އެވޯޑުގެ ސަބަބުން، އޭނާ ހުރީ އަނެއްކާވެސް އުއްމީދުން ފުރިފައި ކަމަށާއި ދެން އެކްޓަރެއްގެ ގޮތުގައި ރަނގަޅަށް ފަށައިގަންނަން ތައްޔާރަށް ހުރިކަން ފާހަގަކުރި އެވެ.
ރިތިކް ދެން އެންމެ އަވަހަށް ފިލްމަކުން ފެނިގެންދާނީ އަޔާން މުކަރްޖީގެ ސްޕައި ތުރިލާ ފިލްމު 'ވޯ 2' އިންނެވެ. މިއީ އޭނާގެ 2019 އަހަރުގެ ބްލޮކްބަސްޓާ 'ވޯ'ގެ ސީކުއެލް އެކެވެ. މި ފިލްމުގެ އިތުރު ތަރިންގެ ތެރޭގައި ކިއާރާ އަދުވާނީ، އަނިލް ކަޕޫރު އަދި ޖޫނިއާ އެންޓީއާރް ހިމެނެ އެވެ.
މި އަަހަރުގެ ޖޯއި އެވޯޑްސްގައި ހޮލީވުޑްގެ ތަޖުރިބާކާރު އެކްޓަރު މޯގަން ފްރީމަން އާއި އިޓަލީގެ ލަވަކިޔުންތެރިޔާ އެންޑްރޭއާ ބޮޗެއްލީއަށް 'ލައިފްޓައިމް އެޗީވްމެންޓް' އެވޯޑް އަދި ހޮލީވުޑް ތަރި މެތިއު މެކޮނޮހޭއަށް 'ޕާސަނަލިޓީ އޮފް ދަ އިޔާ' އެވޯޑް ވަނީ ލިބިފަ އެވެ.