ލުބުނާނުގެ ދެކުނުގައިވާ ސޫރު (ޓަޔަރ) ސިޓީއަށާއި އެ ސަރަޙައްދުގެ އަވަށްތަކަށް އިސްރާއީލުން ދިން ވައިގެ ޙަމަލާތަކެއްގައި މަދުވެގެން 16 މީހުން މަރުވެއްޖެ ކަމަށް ލުބުނާނުގެ ރަސްމީ ނޫސް އެޖެންސީން ރިޕޯޓްކޮށްފިއެވެ.
މިދިޔަ މާރިޗު މަހުން ފެށިގެން އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައިގެ ތެރެއަށް ލުބުނާނު ދަމާގަނެވުނީ، އީރާނުގެ ރޫޙާނީ ލީޑަރު ޢަލީ ޚާމަނާއީ އަވަހާރަކޮށްލުމާ ގުޅިގެން ހިޒްބުالله އިން އިސްރާއީލަށް ރޮކެޓް ޙަމަލާ ދޭން ފެށުމުންނެވެ.
އަނެއްކޮޅުން މިދިޔަ ހަފުތާގައި ހުށަހެޅި ޔޫއެންގެ އަލްޓިމޭޓަމް ޕްލޭން ހިޒްބުالله އިން ޤަބޫލެއް ނުކުރިއެވެ. ސަބަބަކީ އެ އެއްބަސްވުމުގައި ހިޒްބުالله ގެ ޙަމަލާތައް ހުއްޓާލަން ޝަރުޠުކޮށްފައިވީ ނަމަވެސް، އިސްރާއީލުން ދޭ ޙަމަލާތައް ހުއްޓާލުމާ ބެހޭ ގޮތުން އެއްވެސް ވާހަކައެއް ނެތުމުންނެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މިހާރު ހުރީ އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރާއި، އަމިއްލަ ޤައުމުގެ ވޯޓުލާ މީހުންގެ މެދުގައި ސިޔާސީ ގޮތުން ފިއްތުންތަކެއްގެ ތެރޭގައެވެ.
މިދިޔަ މާރިޗު މަހުގެ 2 ވަނަ ދުވަހުން ފެށިގެން އިސްރާއީލުން ދެމުންދާ ޙަމަލާތަކުގައި ލުބުނާނުން 3,696 އަށްވުރެ ގިނަ މީހުން މަރުވެ، 11,413 އަށްވުރެ ގިނަ މީހުން ވަނީ ޒަޚަމްވެފައެވެ. އަދި އިސްރާއީލު ކޮޅުން 29 ސިފައިންނާއި ކޮންޓްރެކްޓަރަކު މަރުވެފައިވެއެވެ.