ސްރީލަންކާގެ ސްކޫލްތަކުގައި ކިޔަވާ ދަރިވަރުންގެ ތެރެއިން 12 އިންސައްތަ ކުދިންނަކީ ފަލަ ކުދިން ކަމަށާއި، އަދި ތިން އިންސައްތަ ކުދިންނަކީ ނުރައްކާތެރި މިންވަރަކަށް ފަލަބަލި ތަހައްމަލުކުރަމުންދާ ކުދިންކަން ދިރާސާއަކުން ހާމަވެއްޖެއެވެ. މިކަން ހާމަވެފައިވަނީ ސްރީލަންކާގެ ހެލްތު މިނިސްޓްރީން އާންމުކުރި 2024 ވަނަ އަހަރުގެ "ގްލޯބަލް ސްކޫލް ބޭސްޑް ސްޓޫޑެންޓް ހެލްތު ސާވޭ" ގެ ނަތީޖާއިންނެވެ. މި ދިރާސާއަކީ އުމުރުން 13 އަހަރާއި 17 އަހަރާ ދެމެދުގެ ކުދިންގެ މެދުގައި ކުރިއަށްގެންދިޔަ ދިރާސާއެކެވެ. މި ދިރާސާގައި މައިގަނޑު ގޮތެއްގައި ބަލާފައިވަނީ ކުދިންގެ ކެއިންބުއިމުގެ އާދަތައް ހުންނަ ގޮތުގެ މައްޗަށެވެ. ސްރީލަންކާގެ ހެލްތު މިނިސްޓްރީގެ ނިއުޓްރިޝަން ޑިވިޝަންގެ ޑިރެކްޓާ، ސްޕެޝަލިސްޓް ޑރ. މޮނިކާ ވިޖޭރަތުނަ ވިދާޅުވި ގޮތުގައި، މި ދިރާސާގެ ނަތީޖާއިން ފެންނަ މަންޒަރަކީ ވަރަށް ބޮޑަށް ކަންބޮޑުވާންޖެހޭ މަންޒަރެކެވެ. ޚާއްސަކޮށް ގައުމުގެ އާބާދީ އިތުރުވާ ނިސްބަތް ދަށަށް ގޮސްފައިވާ ދަނޑިވަޅެއްގައި، ކުޑަކުދިންގެ ސިއްހަތު މިހާ ބޮޑަށް ދަށަށް ދިއުމަކީ ގައުމުގެ މުސްތަގުބަލަށް އޮތް ބޮޑު ގޮންޖެހުމެއް ކަމަށް އޭނާ ފާހަގަކުރެއްވިއެވެ. މި ދިރާސާއިން ދަރިވަރުންގެ ކެއިންބުއިމުގެ އާދަތަކާ ގުޅޭ ވަރަށް ތަފްސީލީ މައުލޫމާތުތަކެއް ވަނީ ހާމަވެފައެވެ. އެގޮތުން، ދިރާސާގައި ބައިވެރިވި ކުދިންގެ ތެރެއިން 17.04 އިންސައްތަ ކުދިންނަކީ ކޮންމެ ދުވަހަކުވެސް ގޭސް އެކުލެވޭ ބުއިންތައް ބޭނުންކުރާ ކުދިންނެވެ. މީގެ އިތުރުން، 28.05 އިންސައްތަ ކުދިންނަކީ ގަވާއިދުން ލޮނު ގިނައިން އެކުލެވޭ ކާނާ ކާ ކުދިންކަން ވަނީ ހާމަވެފައެވެ. ޑރ. މޮނިކާ ވިދާޅުވި ގޮތުގައި، 29 އިންސައްތަ ކުދިން ފެޓް ގިނައިން އެކުލެވޭ ކާނާ ކާއިރު، 41 އިންސައްތަ ކުދިންނަކީ ދުވާލަކު އެއްފަހަރު ނުވަތަ އެއަށްވުރެ ގިނައިން ހަކުރު ގިނައިން އެކުލެވޭ ކާނާ ބޭނުންކުރާ ކުދިންނެވެ. މިއީ ސްކޫލް ކުދިންގެ މެދުގައި ސިއްހަތަށް ގެއްލުންހުރި ކެއިންބުއިމުގެ އާދަތައް އާންމުވެފައިވާ މިންވަރު ވަރަށް ސާފުކޮށް ދައްކައިދޭ ނަތީޖާއެއް ކަމަށް އޭނާ ވިދާޅުވިއެވެ. މިފަދަ އާދަތަކުގެ ސަބަބުން ކުދިންގެ ހަށިގަނޑަށް ބޭނުންވާ މުހިންމު މާއްދާތައް ނުލިބި، ގައިންގަޔަށް ނާރާ ބަލިތަކަށް ހުށަހެޅުމުގެ ފުރުސަތު ބޮޑުވެގެންދާ ކަމަށް ސިއްހީ މާހިރުން އިންޒާރުދެއްވައެވެ. މި ނަތީޖާތަކަށް އަލިއަޅުއްވާލައްވައި ޑރ. މޮނިކާ އިތުރަށް ވިދާޅުވީ، މިހާރު ލިބެން ހުރި ތަފާސްހިސާބުތަކަށް ބަލާއިރު ސްރީލަންކާގެ އާބާދީ އިތުރުވާ ނިސްބަތް ވަރަށް ބޮޑަށް ދަށަށް ގޮސްފައިވާ ކަމަށެވެ. އެގޮތުން، ކުރިން 1.9 ގައި ހުރި އާބާދީ އިތުރުވާ ނިސްބަތް މިހާރު ވަނީ 1.3 އަށް ވެއްޓިފައެވެ. މިފަދަ ހާލަތެއްގައި، ރަނގަޅު ކާނާ ނުކެއުމުގެ ސަބަބުން ދިމާވާ ސިއްހީ މައްސަލަތަކުގެ ޝިކާރައަކަށް ސްކޫލް ކުދިން ވަމުންދިއުމަކީ ވަރަށް ހިތާމަވެރި ކަމެއް ކަމަށް އޭނާ ފާހަގަކުރެއްވިއެވެ. އާބާދީގެ ނިސްބަތް ދަށްވަމުންދާއިރު، އަންނަން އޮތް ޖީލަކީ ސިއްހީ ގޮތުން ބަލިކަށި ބަޔަކަށް ވެއްޖެނަމަ، ގައުމުގެ އިގުތިސާދަށާއި ސިއްހީ ނިޒާމަށް ނުކަތާވަރުގެ ބޮޑު ބުރައަކާ ކުރިމަތިލާންޖެހޭނެ ކަމަށް ރިޕޯޓުތަކުގައި ފާހަގަކޮށްފައިވެއެވެ. މި މައްސަލައަށް ހައްލެއް ހޯދުމުގެ ގޮތުން ސްރީލަންކާގެ ހެލްތު މިނިސްޓްރީއާއި އެޑިއުކޭޝަން މިނިސްޓްރީ ގުޅިގެން ވަނީ އާ ފިޔަވަޅުތަކެއް އެޅުމަށް ނިންމާފައެވެ. އެގޮތުން، ސްކޫލްތަކުގެ ކެންޓީންތަކުގައި ވިއްކާ ތަކެއްޗާ ގުޅޭގޮތުން އާ އުސޫލުތަކެއް ތައާރަފުކުރުމަށް ވަނީ ހަމަޖެހިފައެވެ. މި އުސޫލުތަކުގެ ދަށުން، ސްކޫލް ކެންޓީންތަކުގައި ސިއްހަތަށް ގެއްލުންހުރި ކާބޯތަކެތި ވިއްކުން މަނާކޮށް، ފައިދާހުރި ކާނާ ލިބޭނެ އިންތިޒާމު ހަމަޖެއްސުމަށް ވަނީ އަމާޒުހިފާފައެވެ. މިއީ މުޅި ގައުމުގެ 10،000 އަށްވުރެ ގިނަ ސްކޫލްތަކުގައި ކިޔަވަމުންދާ 3.9 މިލިއަން ދަރިވަރުންނަށް އަމާޒުކޮށްގެން ކުރިއަށްގެންދާ ޕްރޮގްރާމެކެވެ. މި އާ އުސޫލުތަކަށް އަމަލުކުރަން ފެށުމަށް ހަމަޖެހިފައިވަނީ 2026 ވަނަ އަހަރުގެ ތެރޭގައެވެ.