ޒަޔަނިސްޓު ޔަހޫދީ ފައުޖުގެ ހައްދުފަހަނަ އެޅި ސިފައިން ސޫރިޔާގެ ވެރިރަށް ދިމިޝްޤަށް ނިރުބަވެރި ޙަމަލާތަކެއްދީ 15 މީހުން ޝަހީދު ކޮށްލައިފިއެވެ. ސޫރިޔާގެ ދައުލަތުގެ މީޑިޔާއިން ބުނީ، ޔަހޫދީންގެ ޙަމަލާތައް އަމާޒު ކޮށްފައި ވަނީ ދިމިޝްޤުގައި ޢާންމުން ދިރިއުޅޭ އިމާރާތްތަކަކަށް ކަމުގައެވެ. ސޫރިޔާއަށް ޔަހޫދީ ފައުޖުން ދެމުންދާ މި ފަދަ ނިރުބަވެރި ޙަމަލާތައް ފާއިތުވި އަހަރެއްހާ ދުވަހުގެ ތެރޭގައި އެތަކެއް ގުނައަކަށް އިތުރުކޮށްފައިވެއެވެ.
ސޫރިޔާގެ ސަރުކާރުން ބުނީ، ޔަހޫދީ ފައުޖުގެ ޙަމަލާތައް އަމާޒު ކޮށްފައި ވަނީ ދިމިޝްޤުގެ މައްޒަތު އަވަށާއި ޤުދްސިޔާ އަވަށަށް ކަމުގައެވެ. އެ ޙަމަލާތަކުގައި 15 މީހުން ޝަހީދު ކޮށްލާފައިވާއިރު، އެ އަދަދު އިތުރުވާނެ ކަމަށް ބެލެވޭ ކަމުގައި ވެސް ސޫރިޔާގެ ސަރުކާރުން ހާމަކުރިއެވެ. އަދި، އިތުރު 16 މީހުން ޒަޚަމު ކޮށްލާފައިވާ ކަމުގައި ވެސް ސޫރިޔާ ސަރުކާރުގެ ވުޒާރާއަކުން ބުންޏެވެ. ދިމިޝްޤަށް ޙަމަލާ ދީފައި ވަނީ ޔަހޫދީން ވެރިވެގަނެފައިވާ ސޫރިޔާގެ އަލް-ޖޫލާން އުސްބިންތަކުގައި ތިބި ޔަހޫދީ ސިފައިންނެވެ.
ދިމިޝްޤަށް ނިރުބަވެރި ޙަމަލާތަކެއް ދީފައިވާނެ ކަން ޔަހޫދީން ވެސް ވަނީ ކަށަވަރު ކޮށްދީފައެވެ. ޔަހޫދީ ފައުޖުން ބުނީ، ޙަމަލާތައް އަމާޒު ކޮށްފައި ވަނީ އިސްލާމިކް ޖިހާދު ޖަމާޢަތުގެ މުޖާހިދުން ހަރަކާތްތެރިވަމުން ދިޔަ ސަރަޙައްދަކަށް ކަމުގައެވެ. އިސްލާމިކް ޖިހާދަކީ ފަލަސްޠީނުގެ މިނިވަން ކަމަށް ޖިހާދު ކުރާ ޖަމާޢަތެކެވެ. ސޫރިޔާއަށް ދޭ މި ފަދަ ނިރުބަވެރި ޙަމަލާތަކުގެ ޒިންމާ އުފުލަން ޔަހޫދީ ފައުޖުން ޢާންމު ގޮތެއްގައި ދެކޮޅު ހަދައެވެ.
ދިމިޝްޤުގެ މައްޒަތުގައި ހުރި އިސްލާމިކް ޖިހާދުގެ އޮފީހަކަށް ޔަހޫދީ ފައުޖުން ނިރުބަވެރި ޙަމަލާތަކެއް ދީފައިވާ ކަން އެ ޖަމާޢަތުން ވެސް ވަނީ ކަށަވަރު ކޮށްދީފައެވެ. އަދި، ޙަމަލާތަކުގައި ޝަހީދު ކޮށްލާފައިވާ މީހުންގެ ތެރޭގައި އެ ޖަމާޢަތުގެ މެންބަރުން ހިމެނޭ ކަމުގައި ވެސް އެ ޖަމާޢަތުން ހާމަކުރިއެވެ. މަސްރަޙު ދިރާސާ ކުރާ ފަރާތްތަކުން ބުނީ، އިސްލާމިކް ޖިހާދުގެ އިތުރުން ލުބްނާންގެ މުޖާހިދުންގެ ޖަމާޢަތް، ޙިޒްބުاللهގެ މެންބަރުން ހަރަކާތްރިވަމުންދާ ސޫރިޔާގެ ސަރަޙައްދުތަކަށް ވެސް ޔަހޫދީ ފައުޖުން ޙަމަލާތައް އަމާޒު ކުރަމުންދާ ކަމުގައެވެ.
ދިމިޝްޤުގެ މައްޒަތަކީ އިސްލާމިކް ޖިހާދާއި ޙިޒްބުاللهގެ އިތުރުން އީރާނުގެ ބާރުގަދަ އިސްލާމީ އިންޤިލާބީ ލަޝްކަރު (އައިއާރްޖީސީ)ގެ ކޮމާންޑަރުން ވެސް ހަރަކާތްތެރިވަމުންދާ ކަމަށް ބެލެވޭ ސަރަޙައްދެކެވެ. އެ ސަރަޙައްދުގައި، ފަލަސްޠީނުގެ މުޖާހިދުންގެ ޖަމާޢަތް، ޙަމާސްގެ އިސް އޮފިޝަލުން ދިރިއުޅެމުންދާ ކަމަށް ވެސް ބެލެވެއެވެ. ސޫރިޔާ މަގުން ލުބްނާނަށް ހަތިޔާރު އެތެރެ ކުރުން ހުއްޓުވުމުގެ ނަމުގައި ޔަހޫދީ ފައުޖުން ދަނީ ނިރުބަވެރި ޖަރީމާތަކެއް ހިންގަމުންނެވެ.
ސޫރިޔާގެ ޢާންމުން ދިރިއުޅޭ ސަރަޙައްދުތަކަށް ޔަހޫދީ ފައުޖުން ދެމުންދާ ވައިގެ ޙަމަލާތައް އިތުރު ކޮށްފައި ވަނީ، ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން މީގެ 13 މަސް ކުރިން ލާއިންސާނީ ޖަރީމާތަކެއް ފެށުމަށް ފަހުއެވެ. ޣައްޒާގެ އިތުރުން، ސެޕްޓެންބަރު 23ވަނަ ދުވަހުން ފެށިގެން ޔަހޫދީ ފައުޖުން ދަނީ ލުބްނާންގެ ރަށްތަކަށް ވެސް ވައިގެ ޙަމަލާތައް އަމާޒު ކުރަމުންނެވެ. އެންމެ ނުރައްކާތެރި ޙަމަލާތަކެއް ދެމުން ދަނީ ވެރިރަށް ބައިރޫތާއި، އެ ޤައުމުގެ ދެކުނާއި އަލް-ބިޤާޢު ވާދީގެ ރަށްތަކަށެވެ. އަދި، އޮކްޓޫބަރު 1ވަނަ ދުވަހު ޔަހޫދީ ފައުޖުން ވަނީ އެއްގަމު މަގުން ލުބްނާންގެ ދެކުނުގެ ރަށްތަކަށް އަރައިގަނެ، ޤާތުލުޢާންމު އިތުރަށް ފުޅާކޮށްފައެވެ.
ޣައްޒާގެ މުސްލިމުންނާ ދެކޮޅަށް 2023 އޮކްޓޫބަރު 7ން ފެށިގެން ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 43,736އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 103,370 މީހުން ޒަޚަމު ކޮށްލާފައެވެ.
ލުބްނާނުގެ މުސްލިމުންނާ ދެކޮޅަށް ހިންގަމުންދާ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 3,386އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 14,417އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.