ނޭޕާލުގައި މިދިޔަ އަހަރު ޒުވާނުން ބޭއްވި މުޒާހަރާގައި 77 މީހަކު މަރުވެ އަދި އޭރުގެ ބޮޑުވަޒީރު އިސްތިއުފާ ދެއްވަން މަޖުބޫރުވިތާ ހަ މަސްދުވަސް ފަހުން، ހިމާލަޔަން ސްޓޭޓުގެ އާ ރައްޔިތުންގެ މަޖިލީހެއް ހޮވުމަށް ބާއްވާ އާންމު އިންތިހާބުގައި މިއަދު ރައްޔިތުން ނުކުމެ ވޯޓުލާން ފަށައިފި އެވެ.
ޗައިނާ އާއި އިންޑިއާއާ ދެމެދު 30 މިލިއަން މީހުންގެ އާބާދީއެއް އޮންނަ ނޭޕާލަކީ އެތައް އަހަރެއް ވަންދެން ދިގުދެމިގެން ގޮސްފައިވާ ސިޔާސީ ހަމަނުޖެހުންތަކުގެ ސަބަބުން ދަނޑުވެރިކަމުގެ އިގުތިސާދު ފުނޑުފުނޑުވެ، ވަޒީފާ ނެތް މީހުންގެ މައްސަލަތައް އިންތިހާއަށް ގޯސްވެފައިވާ ގައުމެކެވެ.
މިދިޔަ ސެޕްޓެމްބަރު މަހު އެ ގައުމުގެ އިދާރާތަކުން ސޯޝަލް މީޑިއާ މަނާ ކުރުމާ ގުޅިގެން އެތައް ހާސް ބަޔަކު މަގުތަކަށް ނުކުމެ، އުފެއްދި ހަމަނުޖެހުންތަކާ ގުޅިގެން ބޮޑުވަޒީރު ކޭޕީ ޝަރުމާ އޯލީ އިސްތިއުފާ ދެއްވަން މަޖުބޫރުވި އެވެ.
މިއަދު އެ ގައުމުގެ އެކި ހިސާބުތަކުގައި ވޯޓު ލުމަށް ގާއިމުކޮށްފައިވާ ސްކޫލުތަކާއި ޓެމްޕަލްތަކާއި އާސާރީ ކޯޓުޔާޑްތަކަށް މީހުން ވޯޓު ލުމަށް ޖަމާވަމުން އެބަދެ އެވެ. އޭގެ ތެރޭގައި ހެނދުނުގެ ފިނިކަމުގެ ތެރޭގައި ވެސް ވެރިރަށް ކަތުމަންޑޫގައި ގިނަ ބަޔަކު ވޯޓު ލުމަށް ވަނީ އަވަސްވެގެންފަ އެވެ.
އެ ގައުމުގެ އިލެކްޝަން ކޮމިޝަނުން ބުނި ގޮތުގައި، ވޯޓުލުން ފަށާނީ ހެނދުނު 7ގަ އެވެ. އަދި ވޯޓުލުން ނިމޭނީ ހަވީރު 5ގަ އެވެ. 
އޮފިޝަލުން ވިދާޅުވާ ގޮތުގައި އެ ގައުމުގެ އެކި ކަންކޮޅުތަކުގައި 23،000އަށް ވުރެ ގިނަ ވޯޓުލާ މަރުކަޒު ގާއިމުކޮށްފައިވެ އެވެ. އަދި ސުލްހަވެރިކަމާ އެކު ވޯޓުލުން ކުރިއަށް ގެންދިއުމަށް 300،000އަށް ވުރެ ގިނަ ސަލާމަތީ ސިފައިން ހަރަކާތްތެރިވަމުން ވެސް އެބަދެ އެވެ.
އެ އިންތިހާބުގައި 65 ޕާޓީއަކުން 3،400 ކެންޑިޑޭޓުން ވާދަ ކުރެ އެވެ.
އޭގެ ތެރޭގައި އެ ގައުމުގެ އެންމެ ދުވަސްވީ ޕާޓީ، ދަ ނޭޕާލީ ކޮންގްރެސްގެ ފަރާތުން ގަގަން ތާޕާ، 49، ވާދަ ކުރައްވާ އިރު، ސިޔާސީ މައިދާނަށް ނުކުތް ކުރީގެ މާއޮއިސްޓް ހަނގުރާމަވެރިން ހިމެނޭ ނޭޕާލީ ކޮމިއުނިސްޓް ޕާޓީ (އެންސީޕީ) ވެސް ހިމެނެ އެވެ. މެދުމިނުގެ ކޮމިއުނިސްޓް ޕާޓީ، ޔުނިފައިޑް މާކްސިސްޓް-ލެނިނިސްޓްގެ ލީޑަރަކީ އޮލީ އެވެ.
ފާއިތުވި 35 އަހަރުގެ ތެރޭގައި ނޭޕާލުގައި 32 ސަރުކާރު ބަދަލުވި އިރު، ފާއިތުވި 30 އަހަރުދުވަހުގެ ތެރޭގައި އެ ޕާޓީތަކުން ވަނީ ނޭޕާލްގެ ސިޔާސީ މަސްރަހު ކޮންޓްރޯލް ކޮށްފަ އެވެ.
މި އިންތިހާބުގައި އެންމެ ކުރީގައި އުޅެނީ ތިން އަހަރުގެ ރާސްޓްރިޔާ ސްވަތަންތުރާ ޕާޓީ (އާރްއެސްޕީ) އެވެ. އެ ޕާޓީގެ ބޮޑުވަޒީރު ކަމަށް ވާދަ ކުރައްވަނީ ރެޕް ލަވަކިޔުންތެރިޔާ ބާލަންދްރަ ޝާހް އެވެ.
ނޭޕާލްގެ ވެރިރަށް ކަތުމަންޑޫގެ ކުރީގެ މޭޔަރު މިލިކް، 35، އަންނަނީ ވަނީ ގިނަ އަދަދެއްގެ ބަޔަކު އެއްކުރައްވަމުންނެވެ.
ނޭޕާލުގައި އޮންނަ މަސްހުނި އިލެކްޓޯރަލް ސިސްޓަމެއްގެ ތެރެއިން، ރައްޔިތުންގެ މަޖިލީހުގެ 275 ގޮނޑިއަށް 19 މިލިއަން މީހުންނަށް ވޯޓުލުމުގެ ހައްގު ލިބިގެންވެ އެވެ. އޭގެ ތެރެއިން 165 ގޮނޑިއަށް މެމްބަރުން ހޮވާނީ ފަސްޓް ޕާސްޓް އުސޫލުންނެވެ. އަދި އަނެއް 110 ގޮނޑިއަށް މެމްބަރުން ހޮވާނީ ޕްރޮޕޯޝަނަލް ރެޕްރެޒެންޓޭޝަންގެ ތެރެއިންނެވެ.