ސެމްސަންގްގެ އެންމެ ފަހުގެ ފްލެގްޝިޕް ފޯނު ސީރީޒް، "ގެލެކްސީ އެސް26" މިމަހު 25 ގައި ބާޒާރަށް ނެރުމަށް ތައްޔާރުވަމުންދާއިރު، މި ފޯނުތައް ދުރާލައި ރިޒާވްކުރާ ފަރާތްތަކަށް ހިލޭ ސްޓޯރޭޖް އަޕްގްރޭޑް ކޮށްދޭނެކަން އެ ކުންފުނިން ކަށަވަރުކޮށްދީފިއެވެ. އިންޑިއާގެ މާކެޓުގައި މިހާރު ޕްރީ-ރިޒަވޭޝަނަށް ހުޅުވާލާފައިވާއިރު، ގެލެކްސީ އެސް26، އެސް26 ޕްލަސް ނުވަތަ އެސް26 އަލްޓްރާ ރިޒާވްކުރާ ކަސްޓަމަރުންނަށް އެއްވެސް އިތުރު އަގަކާ ނުލައި، އެ ފޯނުގެ ސްޓޯރޭޖް ލެވެލްއަށް ވުރެ މަތީ ލެވެލްއަށް ފޯނު އަޕްގްރޭޑް ކޮށްދޭނެއެވެ. އެގޮތުން 256ޖީބީގެ މޮޑެލްއަކަށް އޯޑަރުކުރާ ފަރާތްތަކަށް ހަމަ އެ އަގުގައި 512ޖީބީގެ ފޯނެއް ލިބޭނެ ކަމަށް ސެމްސަންގުން ބުނެއެވެ. https://sun.mv/217992 މި ފޯނުތައް ރިޒާވްކުރުމަށް 999 ރުޕީސް ދައްކައިގެން "ގެލެކްސީ ޕްރީ-ރިޒާވް ވީއައިޕީ ޕާސް" އެއް ހޯދުމުގެ ފުރުސަތު ވަނީ ހުޅުވާލާފައެވެ. މި ޕާސް ބޭނުންކޮށްގެން ފޯނު ގަންނަ މީހުންނަށް 2,699 ރުޕީސްގެ އީ-ސްޓޯރް ވައުޗަރެއް ލިބުމުގެ އިތުރުން، ކޮންމެ ދުވަހަކު ގުރުއަތުން ހޮވޭ މީހަކަށް 5,000 ރުޕީސް އަދި ބޮޑު އިނާމެއްގެ ގޮތުގައި 50,000 ރުޕީސްގެ ވައުޗަރެއް ހޯދުމުގެ ފުރުސަތު ވެސް ލިބޭނެއެވެ. https://www.samsung.com/uk/unpacked/ މީގެ އިތުރުން ކުރީގެ ފޯނު ދީފައި އާ ފޯނު ގަންނަ މީހުންނަށް "އެކްސްޗޭންޖް ވެލިއު" ލޮކް-އިން ކުރުމުގެ ފުރުސަތު ވެސް ސެމްސަންގުން ވަނީ ދީފައެވެ. މީގެ ސަބަބުން ކަސްޓަމަރުން ގެންގުޅޭ ކުރީގެ ފޯނަށް އެންމެ މަތީ އަގު ލިބޭނެކަން ކަށަވަރުވާނެއެވެ. މި ފަދަ ބޮޑެތި އިނާޔަތްތަކެއް ސެމްސަންގުން ދޭން ނިންމާފައި މިވަނީ، ފޯނު އުފެއްދުމަށް ބޭނުންވާ މެމޮރީ ޗިޕްތަކުގެ އަގު ދުނިޔޭގެ ބާޒާރުގައި ބޮޑުވަމުންދާތީ އެސް26 ސީރީޒްގެ އަގުތައް އުފުލިދާނެ ކަމަށް ބެލެވޭ ދަނޑިވަޅެއްގައެވެ. ކުންފުނީގެ އަމާޒަކީ އަގު ބޮޑުވި ނަމަވެސް، މިފަދަ އޮފާތަކުގެ އެހީގައި ކަސްޓަމަރުންގެ ޝައުގުވެރިކަން ދަމަހައްޓައި ޑިމާންޑް އިތުރުކުރުމެވެ. ރާއްޖޭގެ މާކެޓަށް ބަލާއިރު، ސެމްސަންގްގެ ރަސްމީ ޑިސްޓްރިބިއުޓަރުން މެދުވެރިކޮށް ދިވެހިންނަށް ވެސް މި ފުރުސަތުތަކުގައި ބައިވެރިވުމުގެ ފުރުސަތު އޮންނާނެ ކަމަށް ބެލެވެއެވެ. އަދި އާންމުކޮށް މި ސަރަހައްދުގެ މާކެޓްތަކަށް އަންނަ މިފަދަ ބޮޑެތި އޮފާތަކުގެ ފައިދާ، ރާއްޖޭގެ ސެމްސަންގް ފިހާރަތައް ނުވަތަ އޮންލައިން ޕްލެޓްފޯމްތައް މެދުވެރިކޮށް ދިވެހި ކަސްޓަމަރުންނަށް ލިބިގެންދާނެއެވެ.