ބިރު ދައްކައިގެން ތިނަދޫ ރައްޔިތުން ނުހުއްޓުވޭނެކަމަށާ އެ ރައްޔިތުން ދެމިތިބޭނީ އިސްލާހީ މަސައްކަތުގެ އެންމެ ކުރީ ސަފުގައިކަމަށް ތިނަދޫ ދެކުނު ދާއިރާގެ މެންބަރު އަބުދުﷲ އަހުމަދު ވިދާޅުވެއްޖެއެވެ.
އަބުދުﷲ އަހުމަދު މިހެން ވިދާޅުވީ ރައީސް އަބްދުﷲ ޔާމީންގެ ވެރިކަމުގައި ގދ. ތިނަދޫއަށް ވަރަށް ބޮޑު އިސްކަމެއް ދެއްވައިގެން ތަރައްގީގެ އެތައް މަޝްރޫއެއް ހިންގުމުން ތިނަދޫ ރައްޔިތުންގެ ފަރާތުން ރައީސް ޔާމީނަށް އިޚްލާސްތެރިކަން ދައްކައިދީފައި ނުވާ ކަމަށް ދޭހަވާ މޭރުމުން ތިނަދޫއަށް ނިސްބަތްވާ މަޖިލީހުގެ ވިލިމާލެ ދާއިރާގެ މެންބަރު އަހުމަދު ނިހާން ހުސައިން މަނިކު ވާހަކަދައްކަވާފައިވާތީއެވެ. އަދި ތިނަދޫގެ ދެ މެންބަރުންނަކީ ގައުމަށް ޣައްދާރުވެފައިވާ ދެ މެންބަރުންކަމަށް ވިދާޅުވެ ނިހާން ދެއްކެވި ވާހަކަތަކަށް ރައްދު ދެއްވަމުންނެވެ.
މެންބަރު އަބުދުﷲ އަހުމަދު ވިދާޅުވީ ފާސިގުންނާއި، ޚާއިނުންނާއި ބާޢީންގެ ކިބައިން މިހާރު ތިނަދޫ ސަލާމަތްކޮށްފައިވާކަމަށާ ދެން އޮތީ އެބައިމީހުންގެ ކިބައިން ދިވެހި ގައުމު ސަލާމަތްކުރުންކަމަށެވެ. އަދި އެކަމަށް ގިނަ ދުވަސްތަކެއް ދެން ނެތްކަމަށްވެސް އަބުދުﷲ ވިދާޅުވިއެވެ.
ނިހާންގެ އިތުރަށް ފޮނަދޫ ދާއިރާގެ މެންބަރު އަބުދުއްރަހީމް އަބުދުﷲއާއި ޓްއަރިޒަމް މިނިސްޓަރު މޫސާ ޒަމީރަށް ޓެގް ކުރައްވާ އަބުދުﷲ ކުރައްވާފައިވާ ޓްވީޓްތަކުގައި އިތުރަށް ވިދާޅުވީ ބިރު ދައްކައިގެން ތިނަދޫ ރައްޔިތުން ނުހުއްޓުވޭނެކަމަށާ އެ ރައްޔިތުން ދެމިތިބޭނީ އިސްލާހީ މަސައްކަތުގެ އެންމެ ކުރީ ސަފުގައިކަމަށެވެ.
އަދި ކިތަންމެ ބިރު ދެއްކިނަމަވެސް ބުރާސްފަތި ދުވަހުގެ ރޭ ތިނަދޫގައި ޕާޓީތަކުން ބާއްވާ ޖަލްސާގައި ރައްޔިތުން ބައިވެރިވާނެކަމަށްވެސް އަބުދުﷲ އަހުމަދު ވިދާޅުވިއެވެ.
އަބުދުﷲ އަހުމަދު ވިދާޅުވީ ރައީސް އަބުދުﷲ ޔާމީން ބަލިވެއްޖެކަމަށާ ގޮތްހުސްވެފައިވާކަމަށެވެ.
އަދި ރަތަފަންދޫ ކޯޓު މެދުވެރިކޮށް ކޯޓް އަމުރެއް ހޯދައިގެން ތިނަދޫގައި ބަހައްޓާފައިވާ ލިޔުންތަކެއް ފުލުހުން ނަގަމުންދާއިރު ތިނަދޫ ކޯޓް ކޮބައިތޯވެސް އަބުދުﷲ އަހުމަދު ވަނީ ސުވާލު ކުރައްވާފައެވެ.