ވެރިކަން ބަދަލުވީ ގޮތް ތަހުގީގު ކުރުމަށް ރައީސުލްޖުމްހޫރިއްޔާ ޑރ.މުހައްމަދު ވަހީދު ހަސަން މަނިކު އުފައްދަވާފައިވާ ކޮމިޝަނާ މެދު ހިތްހަމަ ނުޖެހޭ ކަމަށް ކުރީގެ ރައީސް މައުމޫނު އަބުދުލް ގައްޔޫމު ވިދާޅުވެއްޖެއެވެ.
ވެރިކަން ބަދަލުވުމާ ގުޅޭ ގޮތުން ބަޔާން ދެއްވުމަށް މިރޭ 10 ޖެހިއިރު ކޮމިޝަނަށް ވަޑައިގެންނެވުމަށްފަހު ޕީޕިއެމުގެ އޮފީހުގައި ނޫސްވެރިންނާ ބައްދަލު ކުރައްވާ މައުމޫނު ވިދާޅުވީ، ބޭރުގެ ފިއްތުންތަކުގެ ސަބަބުން މިހާރުގެ ސަރުކާރުން ކުރީގެ ރައީސް މުހައްމަދު ނަޝީދުގެ ފަރާތުން ކޮމިޝަނަށް ބޭފުޅަކު އައްޔަން ކުރުން އެއީ ގަބޫލުކުރެވޭނެ ކަމެއް ނޫން ކަމަށެވެ. އަދި ނަޝީދުގެ ފަރާތްޕުޅުން ބޭފުޅަކު ބައިވެރި ވާނަމަ ރައީސް މައުމޫންގެ ފަރާތުން ވެސް މެންބަރަކު ބައިވެރި ކުރަން ޖެހޭނެ ކަމަށް މައުމޫނު ވިދާޅުވިއެވެ. އަދި ވަކި ފަރާތަކަށް ނިސްބަތްވާ މެންބަރަކު ހިމެނި އަނެއްބައި މެންބަރުން ނުހިމެނުމަކީ އިންސާފުވެރި ކަމެއް ކަމުގައި ނުދެކޭ ކަމަށް މައުމޫން ވިދާޅުވިއެވެ.
އިތުރަށް ވާހަކަ ދައްކަވަމުން މައުމޫނު ވިދާޅުވީ، 14 ޖެނުއަރީން ފެށިގެން ފެބުރުއަރީ 8ކާ ހަމައަށް ހިންގާ ދިޔަ ކަންތައްތައް އެކަނި ކޮމިޝަނުން ތަހުގީގު ކުރުމަކީ ވެސް ހަމަޖެހޭ ކަމެއް ނޫން ކަމަށައި، ވެރިކަން ބަދަލު ވެގެން ދިޔައީ ހަމައެކަނި 14 ފެށިގެން ހިންގަމުން ދިޔަ ކަންތައްތަކުގެ ސަބަބުން އެކަނި ނޫން ކަމަށެވެ.
އަދި 7 ފެބުރުއަރީގައި އައި ބަދަލަކީ ރައީސް ނަޝިދު ވެރިކަމަށް ވަޑައިގެންނެވި ފަހުން ހިންގަވަމުން ގެންދެވި ގާނޫނާ ހިލާފު އަދި އިސްލާމްދީނާއި ހިލާފު ކަންތައް ތަކުގެ ސަބަބުން ރައްޔިތުން ނުރުހި ބަދަލެއް ބޭނުން ވުމުގެ ސަބަބުން އައި ބަދަލެއް ކަމަށް މައުމޫނު ވިދާޅުވިއެވެ.
ކޮމިޝަނުން ކުރި ސުވާލު ތަކަށް އަލިއަޅުއްވަމުން މައުމޫން ވިދާޅުވީ ހަތެއް ފެބްރުއަރީގައި ވެރިކަމަށް އައި ބަދަލުގައި ފައިސާގެ ގޮތުން އެއްވެސް ހަރަދެއް ކޮށްފައި ނުވާނެ ކަމަށެވެ. އަދި މިހާރު ވެރިކަމާއި ހަވާލުވެގެން ހުންނެވި ރައީސް ޑރ. މުހައްމަދު ވަހީދު ހަސަން މަނިކާއި ވެރިކަމަށް ވަޑައިގެންނެވުމުގެ ކުރިން އެއްވެސް ގޮތަކަށް ބައްދަލުކޮށްފައި ނުވާނެ ކަމަށް ވިދާޅުވިއެވެ.
ހަތެއް ފެބްރުއަރީ ގައި ރާއްޖޭގެ ވެރިކަން ބަދަލުވެފައިވަނީ ބަޣާވާތަކުން ނޫން ކަމަށާއި ވެރިކަން ބަދަލު ވެފައިވާ ގޮތަކީ އޭގައި އެއްވެސް ޝައްކެއް ކަމެއް ކަމަށް މައުމޫން ވިދާޅުވިއެވެ.