ސ. ފޭދޫން މުހައްމަދު ސައީދު މޫސާ ވަޖުދީ
އިރުގެ ހަކަތަ ބޭނުންކޮށްގެން އަވިން ކަރަންޓް އުފައްދަން ދަސްކޮށްދިނުމާ ބެހޭ ކޯހެއް މޯލްޑިވްސް ކޮލެޖް އޮފް ހަޔާ އެޑިޔުކޭޝަންގެ ސ. ހިތަދޫ ކެމްޕަސްގައި ހިންގައިފި އެވެ.
ރާއްޖޭގައި މުޅިން އަލަށް ހިންގި އެ ކޯހުގައި އަތޮޅުގެ 16 ފަރާތަކުން ބައިވެރިވެ ކޯސް ފުރިހަމަ ކޮށްފައި ވެ އެވެ.
ހިތަދޫ ކެމްޕަސްގައި 15 ދުވަހުގެ މުއްދަތަށް ހިންގި ކޯހުގައި ސޯލާ ޕެނަލްއާ ބެހޭ މައުލޫމާތާއި ސޯލާ ޕަވާ ސިސްޓަމެއްގައި ހިމެނޭ ކޮންޓްރޯލް ނިޒާމުގެ މައުލޫމާތާއި ސޯލާ ޕަވާ ސިސްޓަމެއް ޑިޒައިންކޮށް، ބަހައްޓައި، ބަލަހައްޓާނެ ގޮތް ބައިވެރީންނަށް ދަސްކޮށްދެއްވި އެވެ.
"މިއީ ރާއްޖެ ފަދަ ގައުމެއްގެ މީހުން ކަރަންޓް ހޯދަން ބޭނުންކުރަން ވަރަށް އެކަށީގެންވާ ނިޒާމެއް،" ކެމްޕަސް ހިންގެވުމާ ހަވާލުވެ ވަޑައިގެން ހުންނެވި އަބްދުﷲ ޒުބައިރު ވިދާޅުވި އެވެ. "އެފަދަ ސިސްޓަމެއް ގާއިމުކުރަން ފުރަތަމަ ކުރަން ޖެހޭ ޚަރަދު ބޮޑުކަމަށް ހީވެދާނެ. އެކަމަކު ދިގު މުއްދަތަކަށް ބަލަންޏާ މިއީ ވަރަށް ފައިދާހުރި ޚަރަދު ކުޑަ ނިޒާމެއް."
އިރުގެ އަލިން ހަކަތަ އުފައްދައިގެން ބޭނުން ކުރުމަކީ މިހާރު މުޅި ދުނިޔޭގައި ތަހުލީލުތައްކޮށް ތަރައްގީ ކުރަމުންދާ ދާއިރާއެކެވެ. ރާއްޖޭގައި އާންމުކޮށް ކަރަންޓް އުފައްދަނީ ޑީސެލް އިންޖީނު ބޭނުން ކޮށްގެންނެވެ. އެފަދަ ޖެނެރޭޓަރުން އަންދާ ތެލުގެ ސަބަބުން ތިމާވެއްޓަށް ނޭދެވޭ އަސަރު ކުރެ އެވެ.
ސޯލާ އިލެކްޓްރިކް ޕަވާ ސިސްޓަމަކީ ރާއްޖޭގެ ތިމާވެއްޓާ ވަރަށް ރަހުމަތްތެރި ކަރަންޓެއް އުފައްދާ ނިޒާމެކެވެ.