ޕީޕީއެމްގެ ޕްރައިމަރީގައި ވާދަކުރައްވާ ނާކާމިޔާބުވެވަޑައިގެންނެވި އުމަރު ނަސީރަށް ހޯމް މިނިސްޓަރުކަން ދެއްވުމަށް ޖުމްހޫރީ ޕާޓީން ހުށަހަޅައިފި އެވެ.
ޖުމްހޫރީ ޕާޓީން އުމަރަށް ހޯމް މިނިސްޓަރުކަންދޭން ހުށަހެޅީ އެޕާޓީ ކައުންސިލުގެ ރޭގެ ބައްދަލުވުމުގައި އެގޮތަށް ނިންމުމާއި ގުޅިގެންނެވެ.
މައުލޫމާތު ލިބިފައިވާ ގޮތުގައި މިއަދު ހަވީރު ހަތަރެއް ޖަހާއިރު ހޯމް މިނިސްޓަރު ކަމުގެ ހުވާ އުމަރު ނަސީރު ކުރައްވާނެ އެވެ. އަދި އިތުރު ވަޒީރުންތަކެއް ވެސް މިއަދު ހުވާކުރެއްވުމަށް ވަނީ ހަމަޖެހިފައެވެ.
ޖުމްހޫރީ ޕާޓީގެ ކައުންސިލް މެންބަރަކު ވަނީ އެކަން އެމްވީޔޫތަށް ކަށަވަރުކޮށްދެއްވާފައެވެ. ކައުންސިލް މެންބަރު ވިދާޅުވީ ޖުމްހޫރީ ޕާޓީއަށް ފަސް މިނިސްޓްރީއެއް ދިނުމަށް ޕީޕީއެމުން އެއްބަސްވެފައިވާ ކަމަށެވެ. ސަރުކާރުގެ 33 ޕަސެންޓް ޖޭޕީއަށް ދޭން ޕީޕީއެމުން ވަނީ މީގެކުރިން އެއްބަސްވެފައެވެ.
ބައެއް މީޑިއާތަކަށް މައުލޫމާތުދެއްވަމުން އުމަރު ނަސީރު ވިދާޅުވީ އަމިއްލަ ވިޔަފާރީގައި ވަރަށް ބުރަކޮށް އުޅުއްވި ނަމަވެސް ސަރުކާރުގެ މަގާމެއް ހުށަހެޅުއްވި ނަމަވެސް އެއަށްވުރެ ގާބިލް ބޭފުޅަކު އެމަގާމަށް އެދިވަޑައިގަންނަވާނަމަ އެބޭފުޅަކަށް ފުރުސަތު ދެއްވަން ތައްޔާރަށް ހުންނެވި ކަމަށެވެ.
އެހެންނަމަވެސް ރައީސް ބޭނުންފުޅުވެގެން ވަކި މަގާމެއް ހުށަހަޅުއްވައި އެމަގާމުގެ މަސްއޫލިއްޔަތު އަދާކުރެއްވުމަށް އެންމެ ގާބިލް ބޭފުޅަކީ ޢުމަރުކަމަށް ދެކެވަޑައިގަންނަވާނަމަ، އެކަމެއް ކުރައްވަން ތައްޔާރަށް ހުންނެވިކަމަށްވެސް ޢުމަރު ވިދާޅުވިއެވެ.
އުމަރު ވިދާޅުވީ އޭނާއާ ހަވާލުކުރެއްވި ކޮންމެ މަގާމެއް ތެދުވެރިކަމާ އެކު އަދާކުރައްވާނެ ކަމަށެވެ.
އެމްވީޔޫތަށް މައުލޫމާތު ލިބިފައިވާ ގޮތުން ޖޭޕީއަށް ދިނުމަށް ޕީޕީއެމުން އެއްބަސްވެފައިވާ މިނިސްޓްރީތަކުގެ ތެރޭގައި ހޯމް މިނިސްޓްރީ، ފިޝަރީޒް މިނިސްޓްރީ، ޓްރާންސްޕޯޓު މިނިސްޓަރީ، އަދި އެންވައިރަމެންޓް މިނިސްޓަރީ ހިމެނެ އެވެ. ނަމަވެސް ދެން, ދޭން އެއްބަސްވެފައިވަނީ ކޮން މިނިސްޓްއެއް ކަމެއް އަދި އެނގިފައެއް ނުވެ އެވެ.
ޓްރާންސްޕޯޓު މިނިސްޓަރުކަމަށް ރައީސް ޔާމީން ވަނީ ޖޭޕީގެ ނައިބު ރައީސް އަމީން އިބްރާހިމް އައްޔަންކުރައްވާފައެވެ.