މި އަހަރުގެ ރިޔާސީ އިންތިހާބުގައި ޕީޕީއެމްގެ ރިޔާސީ ޓިކެޓް ހޯއްދެވުމަށް މަސައްކަތް ކުރައްވާ އަބްދުﷲ ޔާމީންގެ ޓީމާ ގުޅިވަޑައިގަތުމަށް އެ ޓީމުން ހުށަހަޅާފައިވާއިރު ވިސްނަންޖެހޭ ކަންތައްތަކެއް އެބަހުރި ކަމަށް ކުޅުދުއްފުށީ ދެކުނު ދާއިރާގެ މެމްބަރު މުހަންމަދު ނަޝީދު މިއަދު ވިދާޅުވެއްޖެ އެވެ.
ވީޓީވީގެ "އަމީންގެ މަލާފަތް" ޕްރޮގްރާމްގައި ވާހަކަ ދައްކަވަމުން ނަޝީދު ވިދާޅުވީ ރާއްޖޭގެ ސިޔާސީ މަސްރަހުގައި މިހާތަނަށް އޭނާ ހުންނެވީ "މެދުގައި" ކަމަށާއި އެއް ފަރާތަށް އަރާއިރު ވިސްނަންޖެހޭ ކަންތައްތަކެއް އެބަހުރި ކަމަށެވެ.
"ޔާމީނާ އަޅުގަނޑާ އަނެއްހެން އިޝޫއެއް އޮތީކީއެއް ނޫން. އަދި ޕާޓީގެ އިސް ސަފުގައި ތިއްބެވި ބޭފުޅުން، މަޖިލިސް މެމްބަރުންނަކީ ވެސް އަޅުގަނޑަށް އިޝޫއަކަށްވާ ބޭފުޅުންނެއް ނޫން. އެހެން ނަމަވެސް އެ ބޭފުޅުންނަކީ ސިޔާސީ ފިކުރެއްގައި ތިއްބެވި ބޭފުޅުންނަށް ވެފައި އެ ބޭފުޅުން ވެސް ސިޔާސީ ގޮތުން ވަކި ޕޮޒިޝަނެއް ނަންގަވައިގެން ތިއްބެވީ. ކިހިނެއްތޯ މި ދެ ޕޮޒިޝަން ގުޅޭނީ. އަޅުގަނޑަށް ކޮން ކަމެއްތޯ ދޫކޮށްލާފައި، ގަބޫލުކޮށްފައި އެ ބޭފުޅުންނަށް ކޮށްދެވޭނީ. އެ ބޭފުޅުން އަޅުގަނޑަށް މަރުހަބާ ވިދާޅުވެ އެ ބޭފުޅުން އަޅުގަނޑުގެ ފަރާތުން ކޮން ކަމެއްތޯ ގަބޫލުކުރާނީ؟ މިކަހަލަ ވިސްނުންތަކެއްގައި މިދަނީ،" ނަޝީދު ވިދާޅުވި އެވެ.
ޔާމީންގެ ރަނިންމޭޓަކަށްވެ ވަޑައިގެންފާނަންތޯ ދެންނެވުމުން އޭނާ ވިދާޅުވީ ސިޔާސީ ގޮތުން ދުވަހަކު ވެސް ކަމެއް ނުވާނެއޭ ބުނާކަށް ނުވާނެ ކަމަށެވެ. ނަޝީދު ވިދާޅުވީ ޔާމީންގެ ރަނިންމޭޓަކަށް ވަޑައިގަތުމާ މެދު މާ ބޮޑަށް ވާހަކަތަކެއް ދެކެވިފައި ނެތް ކަމަށާއި ހިޔާލު ވެސް މުޅިން ބަދަލުވެދާނެ ކަމަށެވެ.
އޭނާ ކުރިން ވިދާޅުވެފައި ވަނީ ޔާމީންގެ ޓީމާ ގުޅިވަޑައިގަތުމަށް އެދި ޔާމީން ވާހަކަ ދައްކަވާތާ ދުވަސްތަކެއް ވެފައިވާ ކަމަށެވެ.
މިއަދުގެ އިންޓަވިއުގައި ނަޝީދު ވިދާޅުވީ މިއަދު "ދެ ފަރާތަށް ކެހިގެން ގޮސްފައި ތިބި މީހުން"ގެ ދުރުމިން ގާތްކޮށްގެން އެކުގައި މަސައްކަތް ކުރެވޭނެ މާހައުލެއް ހޯދައި ދިނުމަކީ ދެން ރައީސުލްޖުމްހޫރިއްޔާގެ މަގާމަށް ވަޑައިގަންނަވާ ބޭފުޅަކު ކުރައްވަން ވާނެ ކަމެއް ކަމަށް ދެކެވަޑައިގަންނަވާ ކަމަށެވެ. އަދި އެއްބަޔަކު އަނެއް ބަޔަކާ އަބަދު ދެކޮޅުވެރިވުމަކީ އަބަދު ކުރެވޭނެ ކަމެއް ނޫން ކަމަށް އޭނާ ވިދާޅުވި އެވެ.
"މިހާރު އަޅުގަނޑުމެންގެ ތެރޭގައި މިވާ ގޮތަކީ ޕީޕީއެމުން ދައްކާ އެއްވެސް ވާހަކައެއް އެމްޑީޕީއަކުން ގަބޫލެއް ނުކުރާނެ. އެމްޑީޕީން ދައްކާ އެއްވެސް ވާހަކައެއް ގިނަ ފަހަރު ޕީޕީއެމަކުން ގަބޫލެއް ނުކުރާނެ. ތިއަރަޓިކަލީ އަޅުގަނޑު މި ދެންނެވީ. ސިޔާސީ ގޮތުން ކިތަންމެ ހިޔާލު ތަފާތުވިޔަސް ޕީޕީއެމަށް ވެސް ފެންނަންވާނެ އެމްޑީޕީން ރަނގަޅު ކަމެއް ކޮށްފިއްޔާ އެކަން. އަދި އެމްޑީޕީއަށް ވެސް ފެންނަންވާނެ ޕީޕީއެމުން ރަނގަޅުކޮށްފިއްޔާ އެކަން. އެހާކަންހާ ވަރަށް އަޅުގަނޑުމެން ކުރިއަށް އޮތް ފަސް އަހަރު ނުވަތަ ދިހަ ވަރަކަށް އަހަރު އަޅުގަނޑުމެންގެ ގައުމުގައި ތިބި މީހުން އެއްތަން ކޮށްލެވޭ ކަމަށް ވަންޏާ ވެސް ލައްކަ ބޮޑުވަރަކަށް ވާނެއޭ މިހާރު މިތިބަ ހިސާބަށް ވުރެ. މިހާރު މި ތިބެނީ ދެ ފަރާތަށް މޫނު އެނބުރިގެން ނޫންތޯ؟،" ނަޝީދު ވިދާޅުވި އެވެ.
ނަޝީދު ވިދާޅުވީ އޭނާގެ މިޒާޖު ހުންނަ ގޮތުން ކޮންމެ މީހެއްގެ ކައިރިއަށް ވަޑައިގެން ވެސް "ހުއްޓިދާނެ" ކަމަށެވެ.
ރައްޔިތުންގެ މަޖިލީހާ ގުޅޭ ގޮތުން އޭނާ ވިދާޅުވީ އެއީ "ޑިމޮކްރެޓިކް ނިޒާމު ދައްކައިދޭ ރަމްޒު" ކަމަށާއި އެ މުއައްސަސާ ތެރޭގައި ހިނގާ ކަންތައްތަކަށް ފާޑުކިޔެން ޖެހޭނެ ކަމަށެވެ. އަދި މަޖިލީހަށް ފާޑުނުކިޔޭނަމަ ރާއްޖޭގައި ޑިމޮކްރެސީއެއް ނޯންނާނެ ކަމަށް ނަޝީދު ވިދާޅުވި އެވެ. އޭނާ ވިދާޅުވީ މަޖިލީހުގެ ތެރެއިން ނުކުރެވޭ ކަމަކީ ޒިންމާ އުފުލުގެ ކަންތައް ކަމަށެވެ. ނަޝީދު ވިދާޅުވީ މަޖިލީހުގެ ނިޒާމުގެ ތެރޭގައި ސުލޫކީ ފިޔަވަޅު އެޅޭނެ ގޮތެއް ނުވަތަ މެމްބަރުން ޑިސިޕްލިން ކުރެވޭނެ ގޮތެއް ނެތް ކަމަށެވެ.
"އެހެންވީމަ މިވާ ގޮތަކީ މިނިވަންކަން އެކަނި މި ބޭނުންކުރެވެނީ،" އޭނާ ވިދާޅުވި އެވެ.
ނަޝީދު ވިދާޅުވީ މިހާރުގެ ހާލަތަށް ބަލާއިރު ރައްޔިތުންގެ މަޖިލީހުގެ އިމްތިޔާޒުގެ ބިލު ގާނޫނަކަށްވި ކަމީ "ވަރަށް ބޮޑު ނުރައްކަލެއް" ކަމަށެވެ. އެކަމަކު މަޖިލީހުގެ ސުލޫކީ މިންގަނޑު ބައްޓަންކޮށް ރައްޔިތުންގެ މެދުގައި އިތުބާރު މަޑުމަޑުން އުފެއްދުމަށް ފަހު އިމްތިޔާޒުގެ ގާނޫނު ތައާރަފު ކުރުމަކީ ރަނގަޅު ކަމެއް ކަމަށް އޭނާ ވިދާޅުވި އެވެ.
ސުޕްރީމް ކޯޓާ ގުޅޭ ގޮތުން ނަޝީދު ވިދާޅުވީ އެތަނުން ނެރޭނީ އެންމެ ފަހުގެ ނިންމުން ގަބޫލުކުރައްވާ ކަމަށެވެ. އެކަމަކު ހުކުމްތަކުގައި ހުންނަ އުނި ކަންތައްތަކާ މެދު އިލްމީ ގޮތުން ވާހަކަ ދެއްކެންވާނެ ކަމަށް އޭނާ ވިދާޅުވި އެވެ.
"އެކަމަކު އަޅުގަނޑު ނުވާނެ އެތާނގައި ކަންކުރަން ތިބޭ މީހުން އޭތިމީތި ގޮވާ މީހަކަށް. އެ ހިސާބުން އެ ގޯސްވަނީ. ދުނިޔޭގެ ހުރިހާ ތަނެއްގައި ވެސް ޓެކްސްޓްތައް ވެސް ލިޔާނެ، ކަރުދާސްތައް ވެސް ޗާޕްކުރާނެ، އެކިއެކި ދިރާސާ ކަރުދާސް ވެސް ނެރޭނެ ހުކުމްތަކާ ބެހޭ ގޮތުން. އެހެންވީމާ އަޅުގަނޑު ދެކޭ ގޮތުގައި ފަނޑިޔާރުންގެ ހުކުމްތައް ދިރާސާ ނަޒަރަކުން ބަލާފައ އޭގެ އުނި ކަންތައްތައް ލިޔެވޭނެ. އޭގެއިން ފައިދާކުރާނެ އެ މީހުންނަށް ވެސް. އެ މީހުން ވެސް ގަބޫލުކޮށްގެން ނުވާނެ މި ގައުމުގައި ތިބޭނެ ކަމަކަށް އެ މީހުން ކުރާ ކަންތައް ނޭނގޭނެ ބައެއް،" ނަޝީދު ވިދާޅުވި އެވެ.