ހަވީރު ނޫހުގެ މަސްއޫލުވެރިޔާ ޑރ. ޒާހިރު ހުސެއިން އާއި އެ ނޫހުގެ އެއްވެސް މުވައްޒަފަކަށް އައު ނޫހެއް ނުއުފެއްދޭ ގޮތަށް ސިވިލް ކޯޓުގައި އަމުރަކަށް އެދެފިއެވެ.
މި އަމުރު ނެރެދިނުމަށް ސިވިލް ކޯޓަށް ހުށައަޅާފައިވަނީ، ހަވީރު ނިއުސް އެޖެންސީގެ ދެ ހިއްސާދާރުން ކަމުގައި ފާރޫގު ހަސަން އާއި އިބްރާހިމް ރަޝީދު މޫސާއެވެ. މި މައްސަލައިގެ ފުރަތަމަ އަޑުއެހުން މާދަމާ އޮންނާނެއެވެ.
ސިވިލް ކޯޓުގެ އަމުރަކާ ގުޅިގެން ހިންގުން ހުއްޓާލާފައިވާ ހަވީރު ނޫހާއި ހަވީރު އޮންލައިން އަލުން ފެށުމުގެ ހުއްދަކައަށް އެދި، ހަވީރު ނޫހުގެ ތިން ހިއްސާދާރުން ވަނީ ސިވިލް ކޯޓަށް މައްސަލައެއް ހުށައަޅާފައެވެ. އެ ތިން ބޭފުޅުން ސިވިލް ކޯޓުގައި އެދިފައިވަނީ، ތިން ހިއްސާދާރުންނަކީ 75 ޕަސެންޓް ހިއްސާ އޮންނަ ތިން މީހުންނަށް ވުމުން އެމީހުން ހިއްސާވެގެން އަލުން ހަވީރު ހިންގަން ފެށުމަށެވެ.
އެ މައްސަލަ ސިވިލް ކޯޓުގައި މިހާރު ވަނީ ފަށާފައެވެ.
ހަވީރު ނޫހުގެ މިލްކުވެރިކަމާއި މެދު ސިވިލް ކޯޓަށް ހުށައަޅާފައިވާ މައްސަލަ ވަކިގޮތަކަށް ނިމެންދެން، އަބްދުﷲ ފާޜޫޤް ހަސަން އާއި އިބްރާހީމް ރަޝީދު މޫސާގެ ބައިވެރިވުމެއް ނެތި، ހަވީރު ނޫސް އަދި ހަވީރު ނޫހުގެ އޮންލައިން އެޑިޝަންގެ މަސައްކަތް ކުރިއަށް ނުގެންދިޔުމަށް ސިވިލް ކޯޓުން ވަނީ އަންގާފައެވެ.
ސިވިލް ކޯޓުން އެ އަމުރު ނެރުނީ އެ މައްސަލާގައި ދައުވާ ކުރާ ދެ މީހުންގެ 50 ޕަސެންޓް އޮތުމާއި މިހާރު ހަވީރު ހިންގާ، ޑރ މުހައްމަދު ޒާހިރު ހުސައިންގެ ހިއްސާ އޮންނަނީ 25 ޕަސެންޓަށް ވުމުން، އެގޮތަށް އެދުނު މީހުންނަށް ލިބޭނެ ގެއްލުމަކަށް ބަލާފައި ކަމަށް، އެ ކޯޓުން ހާމަކުރެއެވެ.