ދެކުނު އިންޑިއާގެ މަޝްހޫރު ފިލްމު ޑައިރެކްޓަރު އަދި އެކްޓަރު ކޭ ބާގިއަރާޖް މަރުވެއްޖެއެވެ. އުމުރުން 73 އަހަރުގެ އެކްޓަރު މަރުވީ އިއްޔެގެ ވަގުތެއްގައި ހާޓް އެޓޭކެއް ޖެހިގެން ޗެންނާއީގެ އެޕޯލޯ ހޮސްޕިޓަލުގައި ފަރުވާދެމުން ދަނިކޮށެވެ. އިންޑިއާގެ ތަމަޅަ ސިނަމާގެ އެންމެ މަގުބޫލު ފިލްމު އުފެއްދުންތެރިންގެ ތެރޭ ހިމެނޭ ކޭ ބާގިއަރާޖް އަކީ ސްކްރީން ލިޔުންތެރިއެއްގެ ގޮތުގައި ވެސް މަސައްކަތްކޮށްފައިވާ ޝަހްސިއްޔަތެކެވެ. ފާހަގަކޮށްލެވޭ ގޮތުގައި ބާގިއަރާޖް މަރުވެފައި މި ވަނީ، އޭނާގެ އުސްތާޒު ބާރަތީރާޖާ ނިޔާވިތާ މާގިނަ ދުވަސްތަކެއް ނުވަނީހެވެ. ބާރަތީރާޖާ މަރުވެފައި ވަނީ މި މަހުގެ 10 ވަނަ ދުވަހެވެ. ބާގިއަރާޖްގެ ވަކިވުމާ ގުޅިގެން ދެކުނު އިންޑިއާގެ ފިލްމީ ދާއިރާއަށް ނިސްބަތްވާ ގިނަ ބަޔަކު ވަނީ ސޯޝަލް މީޑިއާގައި ހިތާމަފާޅުކޮށް ތައުޒިއްޔާގެ މެސެޖުތައް ބަދަލުކޮށްފައެވެ. މީގެ އިތުރުން ދާދި ފަހުން ތަމަޅަ ނާޑޫގެ ޗީފް މިނިސްޓަރު ކަމުގެ މަގާމާ ހަވާލުވެވަޑައިގެންނެވި ކުރީގެ އެކްޓަރު، އެސް ޖޯސެފް ވިޖޭ ވަނީ ބާގިއަރާޖްގެ ގެއަށް ޒިޔާރަތްކުރައްވައި، އާއިލާއަށް ތައުޒިޔާ ދަންނަވައިފައެވެ. ތަމަޅަ ނާޑޫގެ ޗީފް މިނިސްޓަރު އެސް ޖޯސެފް ވިޖޭ ބާގިއަރާޖްއާ އެކު -- ފޮޓޯ/ އިންޑިއަންއެކްސްޕްރެސް ބާގިއަރާޖަކީ 1980 އަދި 90ގެ އަހަރުތަކުގައި ތަމަޅަ ސިނަމާގެ މިސްރާބު ބަދަލުކޮށްލި ނުފޫޒުގަދަ ލިޔުންތެރިއެއް އަދި ޑައިރެކްޓަރެކެވެ. މެދުފަންތީގެ އާއިލީ ދިރިއުޅުމުގެ މައްޗަށް ބިނާކޮށް އޭނާ ލިޔެ ޑައިރެކްޓްކުރި ފިލްމުތަކަކީ އާންމުންގެ ބޮޑު މަގުބޫލުކަމެއް ލިބުނު ފިލްމުތަކެކެވެ. އޭނާ ވަނީ 25 އަށްވުރެ ގިނަ ފިލްމު ޑައިރެކްޓްކޮށް، 75 އަށްވުރެ ގިނަ ފިލްމުގައި އެކްޓްކޮށްފައެވެ. އޭނާގެ އެންމެ ފާހަގަކޮށްލެވޭ ފިލްމުތަކުގެ ތެރޭގައި "މުންދާނައި މުޑިޗޫ"، "އަންދާ 7 ނާޓްކަލް" އަދި "ޑާލިންގް، ޑާލިންގް، ޑާލިންގް" ހިމެނެއެވެ. ތަމަޅަ ސިނަމާގެ އިތުރުން ހިންދީ ސިނަމާއަށް ވެސް އޭނާ ވަނީ މަސައްކަތްތަކެއް ކޮށްދީފައެވެ. އެގޮތުން 1986 ވަނަ އަހަރު އަމީތާބް ބައްޗަން ޑަބަލް ރޯލަކުން ފެނިގެންދިޔަ "އާޚިރީ ރާސްތާ" އަކީ ބާގިއަރާޖް ޑައިރެކްޓްކުރި ފާހަގަކޮށްލެވޭ ފިލްމެކެވެ.