މިއަހަރުގެ ފުރަތަމަ ތިން މަސްދުވަހުގެ ތެރޭގައި މިފްކޯއިން މަސްވެރިންނަށް 379 މިލިޔަން ރުފިޔާ ދޫކޮށްފިއެވެ. މިއީ މަސްވެރިންނަށް 48 ގަޑިއިރު ތެރޭގައި ފައިސާ ދޫކުރުމުގެ އައު އުސޫލުގެ ދަށުން ދޫކުރެވުނު ފައިސާއެވެ.
މިފްކޯގެ ތަފާސްހިސާބުތަކުން ދައްކާގޮތުގައި، މިއަހަރުގެ ޖަނަވަރީ މަހު 177 މިލިޔަން ރުފިޔާ، ފެބްރުއަރީ މަހު 120 މިލިޔަން ރުފިޔާ އަދި މާރިޗު މަހު 81.9 މިލިޔަން ރުފިޔާ މަސްވެރިންނަށް ދޫކޮށްފައިވެއެވެ. މާރިޗު މަހު ދޫކުރެވުނު ފައިސާގެ އަދަދު ދަށްވެފައިވަނީ ރޯދަމަހާ ދިމާވުމާއެކު މަސްވެރިކަމަށް ނުކުތް ދޯނިތަކުގެ އަދަދު މަދުވުމުގެ ސަބަބުންނެވެ.
މަސްވެރިންނަށް 48 ގަޑިއިރު ތެރޭގައި ފައިސާ ދޫކުރަން ފެށިފައިވަނީ މިދިޔަ އަހަރުގެ މަސްވެރިންގެ ދުވަހާ ދިމާކޮށް، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދެއްގެ ގޮތުގައެވެ. މި އުސޫލުގެ ދަށުން މިހާތަނަށް ޖުމްލަ 409.1 މިލިޔަން ރުފިޔާ މަސްވެރިންނަށް ދޫކޮށްފައިވެއެވެ.
މިފްކޯއިން މަސްވެރިންނަށް ފައިސާ ދޫކުރަމުންދަނީ އެ ކުންފުންޏާއި، ބޭންކް އޮފް މޯލްޑިވްސް އަދި މާލީ ވުޒާރާއާ ދެމެދު ވެފައިވާ އެއްބަސްވުމެއްގެ ދަށުންނެވެ. މި އެއްބަސްވުމުގެ ދަށުން، މިފްކޯއިން މަސް އެކްސްޕޯޓްކޮށްގެން ލިބޭ ބޭރު ފައިސާ މާރުކުރަނީ ބޭންކަށެވެ.
ފާހަގަކޮށްލެވޭ ގޮތުން، މިދިޔަ ފެބްރުއަރީ މަހުގެ 12 ވަނަ ދުވަހަކީ ފަހުގެ ތާރީޚެއްގައި މިފްކޯއަށް އެންމެ ގިނަ އަދަދަކަށް މަސް ކިރުވި ދުވަހެވެ. އެ ދުވަހު 546 ޓަނުގެ މަސް ކިރުވައި، 48 މަސްދޯންޏަކަށް 7.6 މިލިޔަން ރުފިޔާ ދޫކުރެވުނެވެ.