އެޕަލް ކުންފުނިން މި އަހަރު ނެރޭނެ ކަމަށް ބެލެވޭ ސްމާޓް އައިނުގައި އަތުގެ ހަރަކާތުން ކޮންޓްރޯލް ކުރެވޭ "ޖެސްޗާ" ފީޗާއެއް ހިމެނޭނެ ކަމަށް ބުނާ ވާހަކަތަކާމެދު ޓެކްނޮލޮޖީ ދާއިރާގެ ތަޖުރިބާކާރުން ސުވާލު އުފައްދަން ފަށައިފިއެވެ. މިފަދަ ފީޗާއެއް ހިމަނައިފާނެ ކަމަށް މެކްރޫމާސް ފަދަ ވަސީލަތްތަކުން ރިޕޯޓުކުރި ނަމަވެސް، މިއީ އަމަލީ ގޮތުން ކުރެވިދާނެ ކަމެއްތޯ މިހާރު ވަނީ ބޮޑު ބަހުސަކަށް ވެފައެވެ. މި ޚަބަރުތައް ބުނާގޮތުން އެޕަލްގެ އައިނުގައި ހުންނަ ދެ ކެމެރާގެ ތެރެއިން އެއް ކެމެރާ ބޭނުންކުރާނީ އަތުގެ ހަރަކާތްތައް ދެނެގަތުމަށެވެ. މިއީ މެޓާ ކުއެސްޓް 3 އާއި އެޕަލްގެ ވިޜަން ޕްރޯ ފަދަ ޑިވައިސްތަކުގައި މިހާރުވެސް ބޭނުންކުރަމުން އަންނަ ޓެކްނޮލޮޖީއެކެވެ. ނަމަވެސް، މިހާ ބޮޑު ޓެކްނޮލޮޖީއެއް ކުޑަ އައިނެއްގެ ތެރެއަށް ފައްތާލުމަކީ އާދަޔާ ޚިލާފު އުނދަގޫ ކަމަކަށް ވާނެއެވެ. https://sun.mv/220558 ބްލޫމްބާގްގެ މާކް ގާމަން ފަދަ ތަޖުރިބާކާރުން ފާހަގަކުރާ ގޮތުގައި، ހޭންޑް ޖެސްޗާ ބޭނުންކުރުމަށްޓަކައި ވަރަށް ބޮޑު ޕްރޮސެސިން ބާރެއް ބޭނުންވާނެއެވެ. މިއީ އައިނުގެ ބެޓެރީ ވަރަށް އަވަހަށް ހުސްވުމަށް މެދުވެރިވާނެ ކަމެކެވެ. ސްމާޓް އައިނަކީ ސައިޒުގެ ގޮތުން ކުޑަ އެއްޗަކަށް ވާތީ، ބެޓެރީގެ މައްސަލައަކީ އެޕަލްއިން ވަރަށް ބޮޑަށް ސަމާލުވާނެ ކަމެކެވެ. މީގެ އިތުރުން އެޕަލްގެ ފުރަތަމަ ސްމާޓް އައިނުގައި ޑިސްޕްލޭއެއް ނުހުންނާނެ ކަމަށް ބެލެވޭތީ، މިފަދަ ވަރުގަދަ ކޮންޓްރޯލް ނިޒާމެއްގެ ބޭނުމެއް ވެސް މިވަގުތަކު ނެތެވެ. ސްކްރީނެއް ނުހިމެނޭ އައިނުތައް ކޮންޓްރޯލް ކުރުމަށް އާދައިގެ ޓަޗް ފީޗާތައް މާ ފުރިހަމައެވެ. އެހެންކަމުން، ބެޓެރީގެ ބާރު ދަށްކޮށްލާފައި މިފަދަ ފީޗާއެއް ހިމެނުމުގެ މާ ބޮޑު ފައިދާއެއް ނެތް ކަމަށް ތަޖުރިބާކާރުން ދެކެއެވެ. އެހެންކަމުން، މިހާރު ފެތުރިފައިވާ މި ވާހަކަތަކަކީ ހަގީގަތަކަށް ވުމަށްވުރެ ބޮޑަށް ދުރު ކަމެއްގެ ގޮތުގައި ބެލެވެއެވެ. އެޕަލްއިން މިވަގުތު އެންމެ ބޮޑު އިސްކަމެއް ދޭނީ އައިނުގެ ރީތި ފަރުމާއަށާއި އައިފޯނާ ފަސޭހައިން ގުޅާލެވޭނެ ނިޒާމަކަށެވެ. މިކަންކަން ފުރިހަމަވެއްޖެ ނަމަ، އާދަޔާ ހިލާފު ފީޗާއެއް ނެތަސް މި އައިނު ބާޒާރުގައި ކާމިޔާބުވުމުގެ ފުރުސަތު ބޮޑެވެ.