މިއަދުގެ ދުނިޔޭގައި އެންމެ ގިނައިން އިވޭ ޝަކުވާއަކީ އެންމެން ބިޒީވެގެން "ވަގުތެއް ނެތް" ކަމުގެ ޝަކުވާއެވެ. ސިކުނޑި އަށް ވަނީ ބާރުބޮޑުވެފައެވެ. ގޭތެރެ ވަނީ އެކި ކަހަލަ ސާމާނުން ފުރިފައެވެ. އެކަމަކު ސުވާލަކީ، މިހާ ގިނަ ތަކެތި ހުރެމެ، އަޅުގަނޑުމެންގެ ހިތްތަކަށް ހަމަޖެހުން ލިބޭ ހެއްޔެވެ؟ މި ސުވާލުގެ ޖަވާބު ފެންނަނީ "މިނިމަލިޒަމް" (Minimalism) ނުވަތަ މަދު ތަކެއްޗާއެކު ދިރިއުޅުމުގެ ފަލްސަފާއިންނެވެ. މިއީ މާއްދިއްޔަތުގެ އަޅުވެތިކަމުން ނަފްސު މިނިވަންކޮށް، ދިރިއުޅުމުގެ ޙަޤީޤީ މަޤްޞަދު ހޯދައިދޭ "މައިންޑްސެޓް" ބަދަލުކޮށްލުމެކެވެ. ތަކެތި ގިނަވުމަކީ ސިކުނޑީގެ ހާސްކަން އިތުރުވެ، ނަފްސާނީ ގޮތުން ބަލިކަށިވާ ކަމެއްކަން ދިރާސާތަކުން ދައްކައެވެ. އަބަދުވެސް ފަހަށް ބޭނުމެއް ޖެހިދާނެ ކަމަށް ބައެއްތަކެތި ފޮރުވާފައި އެތަކެއް އަހަރެއް ވަންދެން ބެހެއްޓިފައި ހުރޭ ނޫންތޯއެވެ. ގިނަފަހަރަށް މިހެން ހުންނަ ތަކެތި ބެހެއްޓިފައި ހުރިކަންވެސް ހަނދާންނެތި ބޭނުންމެއް ޖެހޭ ހިނދު އަލުން ގަނެގެން ބޭނުން ކުރެވޭތަން އޮންނަނީ އައިސްފައެވެ. އެހެންކަމުން، ގޭތެރޭގައި ހުންނަ ބޭނުންނުވާ ތަކެތި އުކާލުމަކީ ހަމައެކަނި ޖާގަ ހުސްކުރުމެއް ނޫނެވެ. އެއީ ތިމާގެ ވިސްނުމާއި، އިސްކަންދޭ ކަންކަން ރަނގަޅަށް ދެނެގަތުމަށް ކޮންމެހެން ކުރަންޖެހޭނެ ކަމެއް ކަމުގައި ބެލެވެއެވެ. ސިކުނޑީގެ ވިސްނުމަށް އަންނަ ބޮޑު ބަދަލު މިނިމަލިޒަމްއަކީ ހަމައެކަނި ތަކެތި ތަރުތީބުކުރުމެއް ނޫނެވެ. މިއީ ސިކުނޑިއަށް ގެންނަ ފުން ބަދަލެކެވެ. ނަފްސާނީ ޢިލްމުވެރިން ފާހަގަކުރާ ގޮތުގައި، ތަކެތި ގިނަވެ ތަރުތީބު ގެއްލިފައިވާ މާޙައުލުތަކުގެ ސަބަބުން އިންސާނާގެ ހަށިގަނޑުގައި ސްޓްރެސް ހޯމޯން ކަމަށްވާ 'ކޯޓިސޯލް' އުފައްދާ މިންވަރު އިތުރުވެއެވެ. ގިނަ ފަހަރަށް އަޅުގަނޑުމެންނަށް ތަކެތި ގަނެވެނީ އަމިއްލަ ބޭނުމަކަށްވުރެ ބޮޑަށް، އެހެން މީހުންނަށް ދެއްކުމަށެވެ. ނަމަވެސް، ތަކެއްޗަށްވުރެ ނަފްސަށް އިސްކަންދޭން ފެށުމުން، މި ބޭކާރު ވާދަވެރިކަމުން އެއްކިބާވެވެއެވެ. މީހާގެ އަގު ގުޅިފައިވަނީ އޭނާގެ އަޚުލާޤާއި، އޯގާތެރިކަމާއި، މުޖުތަމަޢަށް ކޮށްދޭ ފައިދާއާ ކަން ޤަބޫލުކުރެވެން ފަށައެވެ. ބޭރުފުށުގެ ޒީނަތްތެރިކަމަށްވުރެ އެތެރެހަށީގެ ހަމަޖެހުމަށް އިސްކަންދެވޭނެއެވެ. މިއީ މާއްދިއްޔަތުގެ އަޅުވެތިކަމުން މީހާ ސަލާމަތްކޮށްދީ، މިނިވަންކަމާއެކު އަމިއްލަ ނަފްސު ދެނެގަތުމަށް މަގުފަހިކޮށްދޭ ވިސްނުމެކެވެ. ކާބަފައިންގެ ސާދާ ދިރިއުޅުން: ދިވެހިންނަކީ އަބަދުވެސް ސާދާ ބައެކެވެ. މީގެ އަހަރުތަކެއް ކުރިއަށް ބަލާލާއިރު، ދިވެހި ގެދޮރުގައި ހުންނަނީ ހަމައެކަނި އަސާސީ ބޭނުންތަކަށް ބޭނުންވާ ތަކެއްޗެވެ. "އޭރު އުފާވެރިކަން ހޯދީ މުދަލަކުން ނޫނެވެ. އެއީ ޖޯލިފަތީގައި ކުރި މަޝްވަރާތަކާއި، އާއިލާއާއެކު ހޭދަކުރި ވަގުތުތަކާއި، ގުދުރަތީ ރީތި އަޑުތަކާއި މަންޒަރުތަކުން ލިބުނު ހިތްހަމަޖެހުމެވެ." މިއަދު މާލެ ފަދަ ތޮއްޖެހިފައިވާ ތަންތަނުގައި، ސޯޝަލް މީޑިއާގެ ނުފޫޒުން އަޅުގަނޑުމެން މިވަނީ "މާއްދީ ރޭހެއްގައި" ބެދިފައެވެ. އޮންލައިން ޕޭޖްތަކުން އެކަކަށް ވުރެ ގިނައިން، އަވަހަށް އަނެކަކު އެއްޗިހި ހޯދުމާއި، ބޭނުމެއް މާބޮޑު ނެތަސް ކޮންމެ ދުވަހަކު ވެސް އެއްޗެއް ގަނެލުމުގެ ނޭދެވޭ އާދަ މިވަނީ އަށަގަނެފައެވެ. އެންމެ ފަހުގެ މޮޑެލްތަކުގެ ފޯނާއި ގަޑިފަދަ ތަކެއްޗަކީ އެތަކެތި ބާޒާރަށް ނެރޭ ދުވަހު އަޅުގަނޑުމެންގެ އަތުގައި ހުންނަން ޖެހޭނެ ތަކެތި ކަމަށް މިވަނީ ޤަބޫލް ކުރެވެން ފަށާފަ ނޫންތޯއެވެ. މި ފޯރީގައި އަޅުގަނޑުމެން މިހާރު މިވަނީ ދަރަނީގެ މަޅީގައި ރަނގަޅަށް ޖެހި، ޙަޤީޤީ އުފާވެރިކަމަކީ ކޮބައިކަން ވެސް ނޭނގޭ ހިސާބަށް އާދެވިފައެވެ. ހެޔޮ ބަދަލަކަށް މިއަދު ފަށަމާ މަދު ތަކެއްޗާއެކު ދިރިއުޅުމަކީ އަމިއްލަ ނަފްސަށް ދެވޭ އެންމެ ބޮޑު ހަދިޔާއެވެ. ތަކެތި މަދުކުރުމުން ލިބޭ ހުސް ޖާގައަކީ، ސިކުނޑީގެ ހަމަޖެހުމާއި އުފެއްދުންތެރިކަމަށް ހުޅުވޭ ދޮރެކެވެ. މިއަދު ތަރުތީބުކޮށްލާ އެންމެ ވަތްގަނޑަކީ، މާދަމާގެ އުފާވެރި ދިރިއުޅުމަށް އެޅޭ ފުރަތަމަ ފިޔަވަޅެވެ.