ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ހިކުމަތްތެރި ސިޔާސަތުތަކުގެ ސަބަބުން، ރާއްޖެއަށް ބޭނުންވާ ކާބޯތަކެއްޗާއި ތެޔޮ ހުސްނުވާނެކަމުގެ އިތުބާރު ބައިނަލްއަގުވާމީ މުޖުތަމައުން ލިބެމުންދާކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
ނިމިދިޔަ ކައުންސިލް އިންތިޚާބުގައި ހއ. ފިއްލަދޫން ސަރުކާރު ހިންގާ ޕީއެންސީއަށް ލިބުނު ކާމިޔާބީ ފާހަގަކުރުމަށް މާލޭގައި މިރޭ ބޭއްވި ޖަލްސާގައި ވާހަކަދައްކަވަމުން މިނިސްޓަރު ސަޢީދު ވަނީ ދުނިޔޭގެ މަސްރަހަށް އަންނަމުންދާ ބަދަލުތަކަށް އަލިއަޅުއްވާލައްވާފައެވެ. މިގޮތުން، މެދުއިރުމަތީގައި އީރާނާއި އިސްރާއީލް އަދި އެމެރިކާއާ ދެމެދު އުފެދިފައިވާ ނުތަނަވަސްކަމުގެ ސަބަބުން، ދުނިޔޭގެ ގިނަ ގައުމުތަކަކަށް ތެލާއި، ގޭހާއި އަދި ކާޑުގެ ބާވަތްތައް ހޯދުމުގައި ބޮޑެތި ގޮންޖެހުންތަކެއް ކުރިމަތިވެ، އެ ތަކެތި ހުސްވާ ހިސާބަށް ކަންތައްތައް ގޮސްފައިވާކަން މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވި ގޮތުގައި، ދިވެހިރާއްޖެއަށް ލިބިފައިވާ އެންމެ ބޮޑު އެއް ނަސީބަކީ ސައްތަ އިންސައްތަ އިސްލާމީ ގައުމަކަށް ވުމެވެ. އަދި އޭގެ އިތުރުން ރާއްޖޭގެ ވެރިކަމުގައި ހުންނެވި ރައީސްގެ ކެތްތެރިކަމާއި، ރީތިކޮށް ވެރިކަން ކުރެއްވުމުގެ ސިޔާސަތަށް ދުނިޔޭގެ ގައުމުތަކުން އިތުބާރު ކުރާކަމަށް ސަޢީދު ވިދާޅުވިއެވެ.
ދުނިޔޭގެ ބާޒާރުގައި ތެލާއި ކާބޯތަކެތީގެ އަގަށް އަންނަ ބަދަލުތަކަކީ އެއްވެސް ގައުމަކަށް ފުރިހަމައަށް ކޮންޓްރޯލް ކުރެވޭނެ ކަންކަން ނޫން ނަމަވެސް، ދިވެހި ސަރުކާރުގެ އަމާޒަކީ އެ ބަދަލުތަކުގެ ސަބަބުން ރައްޔިތުން އުފުލަންޖެހޭ ތަކުލީފުތައް ވީހާވެސް ކުޑަކުރުން ކަމަށް މިނިސްޓަރު ވިދާޅުވިއެވެ. މިގޮތުން ދުނިޔޭގެ ބާޒާރުގައި އަގުތައް އުފުލުނު ކަމުގައިވިޔަސް، ރައްޔިތުންނަށް ދިމާވާ ދަތިތައް ހައްލުކޮށްދިނުމަށް ސަރުކާރުން މެދުނުކެނޑި މަސައްކަތް ކުރަމުންދާނެ ކަމުގެ ޔަގީންކަން މިނިސްޓަރު ސަޢީދު ދެއްވިއެވެ.