ކުރީގެ ރައީސް ޑރ. މުހައްމަދު ވަހީދު ހަސަން މަނިކު އިސްކޮށް ހުންނަވައިގެން އުފެއްދެވި ގައުމީ އިއްތިހާދު ޕާޓީ އުވާލައިފި އެވެ.
އިލެކްޝަންސް ކޮމިޝަނުން ބުނީ ގައުމީ އިއްތިހާދު ޕާޓީ މިދިޔަ އަންގާރަ ދުވަހު އުވާލާފައިވަނީ ޕާޓީ އުފެއްދުމުގައި އުޅުނު ފަރާތްތަކުން އިލެކްޝަންސް ކޮމިޝަނަށް ހުށަހެޅުމުން ކަމަށާއި އެގޮތަށް އެޕާޓީން ހުށަހެޅުމުން އެޕާޓީ މިހާރު ސިޔާސީ ޕާޓީތަކުގެ ރަޖިސްޓްރީގައި ނޯންނާނެ ކަމަށެވެ.
ގައުމީ އިއްތިހާދު ޕާޓީ އުވާލަން ކައުންސިލުން ނިންމާފައިވަނީ ރައީސް ވަހީދުގެ ހުށަހެޅުމަކަށެވެ. އަދި އެގޮތަށް ފާސްވުމުން ރައީސް ވަހީދާއިއެކު ގައުމީ އިއްތިހާދު ޕާޓީގެ އިސް ބޭފުޅުން ޕީޕީއެމަށް ސޮއިކުރެއްވި އެވެ.
ކައުންސިލުން އެގޮތަށް ނިންމީ ރާއްޖޭގެ ސިޔާސީ މަސްރަހު އޮތް ގޮތުން ކުދި ޕާޓީތައް ހިންގުމަކީ އިގްތިސާދީ ގޮތުން ހުރި ބޮޑު ގޮންޖެހުމެއް ކަމަށް ބުނެ އެވެ.
ގައުމީ އިއްތިހާދު ޕާޓީ، ސިޔާސީ ޕާޓީ ތަކުގެ ދަފްތަރުގައި ރަޖިސްޓްރީ ކޮށްފައިވަނީ 2008 ވަނަ އަހަރުގެ ސެޕްޓެމްބަރު 8 ވަނަ ދުވަހު އެވެ.
އިލެކްޝަންސް ކޮމިޝަނުން މީގެ ކުރިން ވަނީ މޯލްޑިވްސް ރިފޯމް މޫވްމަންޓް (އެމްއާރްއެމް) ވެސް އުވާލާފަ އެވެ.