ބެންކް އޮފް މޯލްޑިވްސްގެ ސްޓްރެޓެޖީއާ އެއްގޮތްވާ ގޮތުގެ މަތިން ބ. އޭދަފުށި، އދ. މަހިބަދޫ އަދި އައްޑޫ ސިޓީ ގަން ބްރާންޗް ބީއެމްއެލް އިސްލާމިކްގެ ބްރާންޗްތަކަށް ރީބްރޭންޑްކޮށްފި އެވެ.
ބީއެމްއެލްއިން ބުނީ އޭދަފުށި، މަހިބަދޫ އަދި އައްޑޫ ގޭން ބްރާންޗްތައް ބީއެމްއެލް އިސްލާމިކްގެ ބްރާންޗްތަކަށް ރީބްރޭންޑް ކުރުމާ ގުޅިގެން، އެ ބްރާންޗުތަކުން ހިދުމަތް ދެމުންދާނީ އިސްލާމިކް ބޭންކިންއަށް އިސްކަންދީގެން ކަމަށެވެ.
މިއަދަކީ ބީއެމްއެލްގެ އިސްލާމިކް ބޭންކިން ހިދުމަތްތައް ދެމުން އަންނަތާ 10 އަހަރު ފުރުނު ދުވަސް ކަމަށްވާއިރު، އެ ބޭންކުގެ ސީއީއޯ އަދި އެމްޑީ މުހައްމަދު ޝަރީފް ވިދާޅުވީ ރާއްޖޭގެ އެންމެ ބޮޑު އިސްލާމިކް ބޭންކުގެ ހައިސިއްޔަތުން، އެ ބޭންކުން އެކައުންޓާއި ކާޑުގެ އިތުރުން ފައިނޭންސިން ހިދުމަތްތައް ވެސް ފޯރުކޮށްދެމުންދާ ކަމަށެވެ.
"މި ބޭންކަކީ އިސްލާމިކް އޯވާޑްރާފްޓް ފައިނޭންސިން، ކޭޝް ފައިނޭންސިން، ހައިބްރިޑް ހޯމް ފައިނޭންސިން، އިސްލާމިކް ޑެބިޓް ކާޑު ރާއްޖެއަށް ތައާރަފްކުރި ބޭންކް. އަދި ހަމައެހެންމެ މި ބޭންކަކީ ރާއްޖޭގައި ހަމައެކަނި ޝަރީއާ ކޮމްޕްލައެންޓް ކްރެޑިޓް ކާޑުގެ ހިދުމަތްދޭ ބޭންކު ވެސްމެ،" އޭނާ ވިދާޅުވި އެވެ.
ބީއެމްއެލް އިސްލާމިކް ގާއިމު ކުރެވުނީސުރެ އިސްލާމިކް ބޭންކިން ހިދުމަތް އެ ބޭންކުން ދެމުން އަންނަނީ ޝަރިއާއާ އެއްގޮތްވާ ގޮތުގެ މަތިން ފަރުމާ ކޮށްފައިވާ ޕްރޮޑަކްޓްތަކާއި، ބީއެމްއެލް އިސްލާމިކްގެ ފަންޑު މުޅީން ވަކިކޮށް، އިސްލާމިކް ބޭންކިންގެ ދާއިރާގައި ބައިނަލްއަގުވާމީ ގޮތުން ބޭނުންކުރާ އެންމެ ރަނގަޅު މިންގަނޑުތަކާ އެއްގޮތަށެވެ.
މުޅި ރާއްޖެ ހިމެނޭ ބޭންކިން ވިއުގަޔަކާ އެކު 20 އަތޮޅުގައި 39 ބްރާންޗް، 95 ސެލްފްސާވިސް ބޭންކިން ސެންޓަރު، 150 އޭޓީއެމް އޭޖެންޓު ބޭންކިން ހިދުމަތުގެ އިތުރުން އެންމެ ޒަމާނީ އޮންލައިން ބޭންކިން ހިދުމަތާ އެކު ބީއެމްއެލްގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށް އެ ބޭންކުން ބުންޏެވެ.