1-2 ގެ ނަތީޖާއަކުން ސްޓޯކް ސިޓީގެ މައްޗަށް ކުރި ހޯދާ، ޗެލްސީން އެޓީމުގެ ލީޑު ދަމަހައްޓައިފިއެވެ.
ޗެލްސީ ލީގުގެ އެއްވަނައިގައި މިހާރު އޮތީ 70 ޕޮއިންޓާއެކީގައެވެ. ޗެލްސީއަށް ވުރެ އެއް މެޗު އިތުރަށް ކުޅެ 63 ޕޮއިންޓާއެކީ ލީގުގެ ދެވަނައިގައި އާސެނަލް އޮތްއިރު، މި މެޗުން ބަލިވި ސްޓޯކް ސިޓީ އޮތީ 42 ޕޮއިންޓާއެކީ ލީގުގެ ދިހަވަނައިގައެވެ.
ޗެލްސީގެ ދަނޑުގައި ކުޅުނު މި މެޗުގެ ފުރަތަމަ ގޯލްޖަހާ ލީޑުނެގީ ވެސް އެޓީމުންނެވެ. ޗެލްސީއަށް ލިބުނު ޕެނަލްޓީއަކުން މި ގޯލް މެޗުގެ 39 ވަނަ މިނެޓްގައި ކާމިޔާބުކޮށްދިނީ މި މެޗުގައި މޮޅު ކުޅުމެއްދެއްކި އެޑެން ހަޒާޑްއެވެ.
ނަމަވެސް ފުރަތަމަ ހާފް ނިމުމުގެ ކުރިން ސްޓޯކް ސިޓީގެ ޗާލީ އެޑަމް ވަނީ ހިތްގައިމު ގޯލެއް ކާމިޔާބުކޮށްދީ މެޗުގެ ނަތީޖާ އެއްވަރުކޮށްދީފައެވެ. ޗާލީ އެޑަމް މި ގޯލް ކާމިޔާބުކުރީ ޗެލްސީގެ ގޯލާ 65 ޔާޑު ދުރުންކަން ފާހަގަކޮށްލެވެއެވެ.
މެޗުގެ ދެވަނަ ހާފްގައި ޗެލްސީން ގިނައިރު ބޯޅަ ގެންގުޅެ ކުޅެމުންދިޔައިރު، މެޗުގެ 62 ވަނަ މިނެޓްގައި ޗެލްސީން ވަނީ ދެވަނަ ފަހަރަށް މި މެޗުގައި ލީޑުނަގާފައެވެ. ހަޒާޑް ދިން ޕާހަކުން މި ގޯލް ޗެލްސީއަށް ކާމިޔާބުކޮށްދިނީ ލޮއިކް ރެމީއެވެ.
މި ގޯލަށްފަހު ވެސް ޗެލްސީއަށް ގޯލްޖަހާނެ ފުރުސަތުތަކެއް ލިބި ވަނީ ބޭކާރުވެފައެވެ.
މެޗަށްފަހު ވާހަކަދައްކަމުން ޗެލްސީގެ ކޯޗު ހޯޒޭ މޮރީނިއޯ ބުނީ، މި މެޗުގައި ކުޅުންތެރިން ދެއްކި ކުޅުމާ މެދުވެސް އަދި 3 ޕޮއިންޓް ލިބުމުންވެސް ހިތްހަމަޖެހޭ ކަމަށެވެ.
"ދެވަނަ ގޯލްޖެހުމަށްފަހު ތިންވަނަ ގޯލެއްޖަހަން ވެސް ފުރުސަތު ލިބުނު. އެކަމަކު ސްޓޯކްގެ ކީޕަރު ވަރަށް މޮޅު. އަދި ސްޓޯކްއިން ވަރަށް ރަނގަޅަށް މި މެޗުގައި ޑިފެންސް ވެސް ކުރި" މޮރީނިއޯ ބުންޏެވެ.
މި މެޗުގައި އަނިޔާވި ޑިއޭގޯ ކޯސްޓާ ދުވަސްކޮޅަކަށް ކުޅުމާ ދުރުގައި ހުންނަންޖެހޭނެ ކަމަށާއި، ނަމަވެސް ޑްރޮގްބާ އަދި ރެމީ ޓީމަށް އެހީތެރިވާން ހުރިކަން މޮރީނިއޯ ފާހަގަކުރިއެވެ.