ކަރަންޓު ޔުނިޓަކުން ހަތަރު ލާރި ފިއުލް ސާޗާޖުގެ ގޮތުގައި ނަގަން ފެށުމާއެކު ރަށްރަށުގެ ކަރަންޓުގެ އަގު ވެސް މިހާރު ވަނީ ބޮޑުވެފަ އެވެ.
ފެނަކަ ކޯޕަރޭޝަނުން އޮކްޓޯބަރު މަހުގެ ބިލު ގޭގެ އަށް ފޮނުވި އިރު ބުނެފައި ވަނީ އެ ކުންފުންޏަށް ސެޕްޓެމްބަރު 19 ވަނަ ދުވަހުން ފެށިގެން ޑީސަލް ލީޓަރެއް ގަންނަން ލިބޭ އަގު ވަނީ 8.12ރ. އަށް ބޮޑުވެފައި ކަމަށެވެ.
އޭގެ އިތުރުން މޯލްޑިވްސް އެނާޖީ އޮތޯރިޓީން ވަނީ ޑީސަލް ގަންނަން ލިބޭ އަގު ލީޓަރެއް 8ރ. އަށް ވުރެ ބޮޑު ވާ ނަމަ އިތުރުވާ ކޮންމެ 10 ލާރިއަކަށް ތިން ލާރި ފިއުލް ސާޗާޖުގެ ގޮތުގައި ނެގުމުގެ ހުއްދަ ފެނަކާ ކޯޕަރޭޝަނަށް ދީފައެވެ.
ސްޓެލްކޯއިން ވެސް ވަނީ އޮކްޓޯބަރު މަހުން ފެށިގެން ކަރަންޓް ޔުނިޓަކަށް ހަތަރު ލާރި ފިއުލް ސާޗާޖުގެ ގޮތުގައި ނަގަން ފަށައިފަ އެވެ. އަދި މިދިޔަ ފެބްރުއަރީ މަހު އެނާޖީ އޮތޯރިޓީން ކަރަންޓްގެ އަގަށް ގެނައި ބަދަލުތަކާ ގުޅިގެން މާލެ އާއި މާލެ ސަރަހައްދުގައި ކަރަންޓް ޔުނިޓަކަށް ނަގާ އަގަށް ވުރެ ފެނަކަ އިން ކަރަންޓް ދޭ ރަށް ރަށުގައި ޔުނިޓަކަށް ނަގާ އަދަދު ބޮޑެވެ.