މާޗް މަހުގެ ކަރަންޓް ބިލް އާދަޔާ ހިލާފަށް ބޮޑުކޮށްފައިވާތީ އައްޑޫގެ ގިނަ ވިޔަފާރިވެރިން ކަރަންޓް ބިލާއި ހަވާލުވާން ދެކޮޅު ހަދައިފި އެވެ.
"އައްޑޫލައިވް" އާ ވާހަކަ ދެއްކި ބައެއް ވިޔަފާރިވެރިން ބުނީ އެއްވެސް ކަހަލަ އެންގުމަކާއި ނުލައި ކަރަންޓް ބިލު ދެގުނަ ބޮޑު ކޮށްފައިވާ ކަމަށެވެ. އަދި ފިއުލް ސާ ޗާޖާއި އެކު އެވްރެޖް 2000 ރުފިޔާ ދައްކަމުން އައި ބައެއް ވިޔަފާރިތަކަށް މި މަހު ލިބުނު ބިލްގައި 6،000 ރުފިޔާ އަރާފައިވާ ކަމަށެވެ.
އައްޑޫގެ ވިޔަފާރިތަކަށް ފެނަކަ ކޯޕަރޭޝަނުން ފޮނުވި ބިލްގައި 0 ޔުނިޓުން 100 ޔުނިޓަށް 3.25ރ ނަގާއިރު 101ން 200 ޔުނިޓަށް ނަގަނީ 3.75ރއެވެ.
އަދި 201 ޔުނިޓުން 300 ޔުނިޓަށް 4.75 ރުފިޔާ ނަގާއިރު 301 ޔުނިޓުން ފެށިގެން މައްޗަށް ނަގާ އަގު ވަނީ 6 ރުފިޔާއަށް ބޮޑުކޮށްފައެވެ.
ފެނަކަ ކޯޕަރޭޝަންގެ ދަށުން ހިންގަމުން އަންނަ އައްޑޫ މަރުކަޒީ އިންޖީނުގެ އާއި ހުޅުމީދޫ އިންޖީނުގެއިން ފޮނުވި ކަރަންޓް ބިލް ތަކުގައި ކޮންމެވެސް ވަރަކަށް މައްސަލަ ދިމާވެފއިވާ ކަމަށްވެސް ވަނީ އަޑު ފެތުރިފައެވެ. އަދި އެފަދަ ބިލްތައް ފެނަކަ އޮފީހާއި ހަވާލު ކުރުމަށް އަންގާފައިވެއެވެ.
ކަރަންޓް ކުއްލި ގޮތަކަށް ބޮޑުކޮށްފައިވާ އިރު މިމަހުގެ 1 ވަނަ ދުވަހުން ފެށިގެން ގިނަ ބާވަތްތަކުން ޑިއުޓީ ނެގުމަށްވެސް ސަރުކާރުން ވަނީ ނިންމާފައެވެ.
"އައްޑޫލައިވް" އާއި ވާހަކަ ދެއްކި ބައެއް ވިޔަފާރިވެރިން ބުނީ މި ވަގުތަކީ ހުރިހާ ވިޔަފާރިވެރިން އެކަތި ގަޑަކަށްވެ، މި ކަމާއި ދެކޮޅަށް އެންމެން އެކުގައި ނިކުތުމަށް ގޮވާލާފައެވެ.
ކަރަންޓް ބިލްގެ މައްސަލާގައި ހދ. ކުޅުދުއްފުށީ ވިޔަފާރިވެރިން ވަނީ ކަރަންޓް ބިލް ނުދައްކަން ނިންމާފައެވެ. އަދި ބިލް އަގު ބޮޑުކުރި މައްސަލަ ރައީސް އޮފީހަށާއި، ފެނަކަ ކޯޕަރޭޝަން އަދި އެންސްޕާއަށް ހުށަހަޅާފައެވެ. އަދި މިކަމަށް އެކަށީގެންވާ ހައްލެއް ނުލިބިއްޖެނަމަ ގައުމީ ފެންވަރުގެ ހަރަކާތެއް ހިންގާނެ ކަމަށް ބުނެފައެވެ.