އެމެރިކާ، ކެނެޑާ އަދި މެކްސިކޯ ގުޅިގެން ބާއްވާ މިއަހަރުގެ ވޯލްޑްކަޕަށް ނޯވޭއިން އެމެރިކާއަށް އެގައުމުގެ މުޅި ބަދިގެ ހިފައިގެން ދަތުރުކޮށްފި އެވެ.
މިފަހަރުގެ ވޯލްޑްކަޕަށް ނޯވޭއިން އެމެރިކާގެ ކޭމްޕަށް ދަތުރުކުރީ އެގައުމުގެ ސަގާފީ ކެއުމުގެ ބޮޑު ޝިޕްމަންޓަކާއެކު އެވެ. މިއީ ނޯވޭގެ ތަރި ހާލަންޑާއި އޮޑެގާޑް އަދި ޓީމުގެ ބާކީ ކުޅުންތެރިން ވޯލްޑްކަޕަށް ތައްޔާރުވުމަށް ނޯވޭއިން ޕްލޭންކޮށްގެން ގެނައި ކާ އެއްޗެއްސެވެ.
ފުޓްބޯޅަ ދުނިޔޭގައި މިކަމަށް ބޮޑު ސަމާލުކަމެއް ލިބިގެން ގޮސްފައިވާއިރު ރިޕޯޓުތައް ބުނާގޮތުން 300 ކިލޯގެ މަހާއި 116 ކިލޯގެ ނޯވީޖިއަން ޗީސް އަދި 6000 އޮރެންޖު އެޓީމުން ވަނީ އެމީހުންގެ އެމެރިކާގެ ކޭމްޕަށް ގެނެސްފަ އެވެ. އަދި މިއާއެކު ލަފާކުރެވޭގޮތުގައި ނޯވޭއިން ވޯލްޑްކަޕާ ދިމާކޮށް އެޓީމުގެ ކުޅުންތެރިންނަށް ހާއްސަކޮށްގެން ގެނައި އެގައުމުގެ ސަގާފީ ކެއުމާއި އޮރެންޖުތަކާއެކު މުޅި ޝިޕްމަންޓް 1000 ކިލޯއަށް އަރާނެ އެވެ.
1998 ގެ ފަހުން ފުރަތަމަ ފަހަރަށް ވޯލްޑްކަޕަކާ ނޯވޭއިން ކުރިމަތިލާއިރު މުބާރާތަށް ތައްޔާރުވުމުގެ ގޮތުން ނޯވޭއިން ކުރާ މަސައްކަތުގައި މިވާހަކަ ވެގެން ގޮސްފައިވަނީ ތަފާތު މުޅިން އާ ކަމަކަށެވެ. އަދި އެގައުމުން އަންނަނީ މިވޯލްޑްކަޕުގައި ކުޅުންތެރިންނާއި ރައްޓެހި ކެއުންތަކަށް ވަރަށް ބޮޑު ސަމާލުކަމެއް ދެމުންނެވެ.
މި ތައްޔާރީ ތަކަކީ ހަމައެކަނި ރަހައާއި ފަސޭހައަށް ކުރެވޭ ކަމެއް ނޫނެވެ. މި ކަމުގެ މައިގަނޑު މަގުސަދަކީ އެމީހުންގެ އަމިއްލަ ފަސްގަނޑާއި އެތައް ހާސް މޭލެއް ދުރުގައި ކުޅެވޭ މިފަދަ ބޮޑު މުބާރާތެއްގައި ކުޅުންތެރިންނާއި ބީރައްޓެހި ނޫން ރަނގަޅު ރުޓީންއެއް ދެމެހެއްޓުމެެވެ.
ނޯވޭއިން މުބާރާތަށް ކޮލިފައިވުމަށްފަހު ގިނަ ބޮޑެތި ތައްޔާރީތަކެއް ވަމުން އަންނަ ދަނޑިވަޅުގައި އެމީހުންގެ ކާއެއްޗެހީގެ އޮޕަރޭޝަން ވެފައިވަނީ ފާހަގަކޮށްލެވޭ ކަމަކަށެވެ. ރިޕޯޓުތައް ބުނާގޮތުން މި ޝިޕްމަންޓްގައި ކުޅުންތެރިންނާއި ރައްޓެހި އެކި ބާވަތުގެ ތަފާތު ގިނަ ކެއުންތަކެއް އެކުލެވެ އެވެ. އޭގައި އެންމެ ފާހަގަވެގެންދިޔައީ ނޯވޭޖިއަން ޗީސްއާއި މަހެވެ.
އެހެން ރިޕޯޓެއްގައިވާ ގޮތުން މި އޮޕަރޭޝަނުގައި ސީދާ ނޯވޭއިން އެގައުމުގެ ކައްކާއިން ވެސް ބައިވެރިވެ އެވެ. އޭގެ ތެރޭގައި ހިމެނޭ އެރޮން އެސްޕްލޭންޑް ބުނި ގޮތުގައި އެމީހުން ބޭނުންވަނީ އެމީހުންނަށް ބެލެވޭ ގޮތުގައި އެންމެ ރަނގަޅު އަދި ލިބެން ހުރި އެންމެ ބަރާބަރު ނޯވޭގެ ބާވަތްތައް ބޭނުންކުރާށެވެ. އަދި އެކަމަށް އެންމެ ބޭނުންވާ ދަނޑިވަޅުގައި އެ ހިދުމަތް ދިނުމުގެ ފުރުސަތު އޮތުމަކީ އެމީހުންގެ ވަރަށް ބޮޑު ޝަރަފެއް ކަން އޭނާ ފާހަގަކޮށްފައިވެ އެވެ.
ބައިނަލްއަގްވާމީ ބޮޑެތި އެތައް މުބާރާތެއްގައި އަބަދުވެސް އެތައް އުދަނގޫ ކަންކަމެއް ދިމާވެ އެވެ. ފުޓްބޯޅަ ކުޅެވެން ފެށުމުގެ ކުރިން އެތައް ޓެސްޓްތަކަކާ ކުޅުންތެރިން ކުރިމަތިލާން ޖެހެ އެވެ. އޭގެ ތެރޭގައި ބީރައްޓެހި ޓްރެއިނިން ރުޓީންތަކާއި ހޮޓެލް، ދަތުރުފަތުރާއި އަދި ފިނިހޫނުމިން އެކުލެވެ އެވެ. އެގޮތަށް ވިސްނައިފިނަމަ ކުޅުންތެރިންނާއި ރައްޓެހި ކެއުންތައް ގެންދިޔުމަކީ ވަރަށް މުހިންމު ކަމެއް ކަމަށް ގިނަ ބަޔަކު ދެކެ އެވެ. އަދި މިއީ ކުޅުންތެރިން ރަނގަޅަށް މާހައުލަށް ހޭނެން އެޓީމުގެ މުއައްޒަފުން އެޅި ވަރަށް މުހިންމު ފިޔަވަޅެއްކަމަށް ގިނަ ބަޔަކު ގަބޫލުކުރެ އެވެ.
މިވާހަކަ މުހިންމުވާ އަނެއް ސަބަބަކީ މިފަހަރުގެ ވޯލްޑްކަޕަށް ނޯވޭއިން އަންނަނީ ހަމައެކަނި ކުޅޭކަށް ނޫނެވެ. ތަފާތު ދެއްކުމަށެވެ. ވޯލްޑްކަަޕަށް އެޓީމު އެނބުރި އައީ ހާލަންޑާއި އޮޑެގާޑް ފަދަ ތަރިންގެ މައްޗަށް އެކުލެވޭ ސްކޮޑަކާއެކު ދުނިޔޭގެ އެންމެ ބޮޑު މައިދާނުގައި ތަފާތު ދައްކާށެވެ. ވޯލްޑްކަޕް ކޮލިފައިންގައި ވެސް އެޓީމުން ދެއްކި ކުޅުމަށް މުޅި ދުނިޔޭގެ ސަމާލުކަން ހުއްޓުނެވެ. ކުޅުނު ކޮލިފައިން ހުރިހާ މެޗެއް ކާމިޔާބުކުރުމުގެ އިތުރުން އެޓީމުން ވަނީ ޖުމްލަ 37 ލަނޑު 8 މެޗުން ކާމިޔާބުކޮށްފަ އެވެ. އަދި އެޓީމުގެ ތަރި ހާލަންޑް ވަނީ ކޮލިފައިންގައި 16 ލަނޑު ޖަހާފަ އެވެ.
މި އަދަދުތަކުން އެނގިގެންދިޔައީ އެއްމަހަށް މުބާރާތަކަށްދާއިރު މިގޮތަށް ތައްޔާރުވުމަކީ ވަރަށް މުހިންމު އަދި ބޭނުންހުރި ކަމެއް ކަމެވެ. ފެންވަރު ސާބިތުކޮށް ރަނގަޅު ކުޅުމެއް ދައްކަން އައި ޓީމެއްގައި އެޓީމުގެ މާހައުލުގައި އޮތް ސީރިއަސް ކަން ފާހަގަކުރެވެ އެވެ. އަދި ނޯވޭއިން ހުރިހާ ކަންކަމާއި އޮތީ ވަރަށް ބޮޑަށް ވިސްނާފައި ކަމަށް ވެސް ގިނަ ބަޔަކު ފާހަގަކުރި އެވެ. ކެއުން މުބާރާތްތަކަށް ގެނެސް މިގޮތަށް ކަންތައް ކޮށްގެން މީގެކުރިން ވެސް ނޯވޭއިން ހަބަރުތަކުގެ ފަލަ ސުރުހީއަށް އެރި އެވެ. 2018 ވަނަ އެގައުމުގެ އޮލިމްޕިކް ޓީމުން 1500 ބިހަށް ކުރި އޯޑަރެއް 15000 ބިހަށްވީ ކަމަކީ ވަރަށް ގިނަ ބައެއްގެ ސަމާލުކަން ލިބުނު ކަމެކެވެ.
އެހެންނަމަވެސް މިފަހަރުގެ ހާލަތް ވަރަށް ވެސް ތަފާތެވެ. ނަމަވެސް މިކަމުން އަންގައިދެނީ ކެއުމުގެ ކަންކަން ނޯވޭގެ އެތްލީޓުންގެ ވަށައިގެން ރޭވުމަކީ އެމީހުންނަށް އާކަމެއް ނޫން ކަމެވެ. ވޯލްޑްކަޕަކީ ފުޓްބޯޅައާއި މާ ގުޅުންހުރި ވަރަށް ކޮންޓްރޯލް ކުރެވިފައިވާ އިވެންޓެކެވެ. ނޯވޭއިން މަސައްކަތް ކުރަމުން އަންނަނީ ހާލަންޑާއި އޮޑެގާޑާއި ދެން ތިބި ކުޅުންތެރިންނަށް ޖެހިދާނެ ބޭކާރު ކަންކަމުން ދުރުކޮށް އެމީހުންނާއި ރައްޓެހި ކެއުންތަކަކާ ރުޓީންތަކެއް ފޯރުކޮށްދިނުމަށް މަސައްކަތް ކުރަމުންނެވެ.
އެއީ ވަރަށް ވެސް ވިސްނައިގެން ވަމުން އަންނަ ތައްޔާރީތަކެވެ. ވޯލްޑްކަޕެއްގައި މިކަމުން މެޗެއްގެ ނަތީޖާ އަމިއްލައަށް އޭގެ ޒާތުގައި ނޭނގުނަސް މެޗެއްގެ ކުރިން ކުޅުންތެރިން އެންމެ ވަރުގަދަ ފޯމުގައި ތިބުމަށް މިކަމުން އެހީވެދެ އެވެ. ނޯވޭގެ އަމާޒަކަށްވެފައިވަނީ އެކަމެވެ. މިކަމުން އެންމެ ބޮޑަށް ފާހަގަވެގެންދަނީ ގެނައި ކާއެއްޗެއްސެއް ނޫނެވެ. ހުނަރުވެރި ޓީމަކުން އެޓީމުގެ ކުޅުމާ ކުޅުންތެރިންގެ ހިތްހަމަޖެހުމަށް ބުރޫއެއްް އެރިޔަނުދިނުމަށް އަޅަމުން އަންނަ މުހިންމު ފިޔަވަޅުތަކެވެ.