ދުނިޔޭގެ ކަނޑުތަކުގެ ދުވަސް ފާހަގަކުރުމުގެ ގޮތުން 'އެންމެން މޫދަށް' މި ނަމުގައި މުޅި ރާއްޖެއަށް ހުޅުވާލައިގެން ކުރިއަށްގެންދިޔަ ހާއްސަ ހަރަކާތް އިއްޔެ ބާއްވައިފިއެވެ. މި ހަރަކާތަކީ ދިވެހިންނާއި ކަނޑާ އޮތް ގާތް ގުޅުން ރަމްޒުކޮށްދިނުމުގެ ގޮތުން ކުރިއަށްގެންދިޔަ ހަރަކާތެކެވެ.
މި އިސްނެގުމުގެ ދަށުން ރާއްޖޭގެ އެކި ރަށްރަށުގެ ރައްޔިތުން އެއްވަގުތެއްގައި މޫދަށް އެރި، ތަފާތު ކުޅިވަރުތަކާއި ފެނުގެ ހަރަކާތްތަކުގައި ބައިވެރިވެފައިވެއެވެ. މުޅި ރާއްޖެއަށް ހުޅުވާލައިގެން ބޭއްވި މި ހަރަކާތުގައި ގިނަ އަދަދެއްގެ އާންމު ރައްޔިތުން ބައިވެރިވިކަން ފާހަގަކުރެވެއެވެ.
މި ހަރަކާތް ރަސްމީކޮށް އިފްތިތާހުކޮށްދެއްވީ ކަނޑުތަކުގެ ދުވަހާ ގުޅުވައިގެން ހުޅުމާލޭގައި ބޭއްވި 'އޯޝަން ފެސްޓިވަލް' ގައެވެ. މި ރަސްމިއްޔާތުގައި މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަހުމަދު ޝިޔާމާއި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިންގ ޑިރެކްޓަރ ބްރިގޭޑިއަރ ޖެނެރަލް (ރިޓަޔަރޑް) އަލީ ޒުހައިރުގެ އިތުރުން ސަރުކާރުގެ ކަމާބެހޭ އިސްވެރިން ބައިވެރިވެވަޑައިގެންނެވިއެވެ.
ފިޝަރީޒް މިނިސްޓްރީން ބުނި ގޮތުގައި މި ހަރަކާތަކީ ސިޓީ ކައުންސިލްތަކާއި، ރަށު ކައުންސިލްތަކާއި، ސަރުކާރުގެ މުއައްސަސާތަކުގެ އިތުރުން އާންމު ރައްޔިތުންނާ ގުޅިގެން އިންތިޒާމުކުރި ހަރަކާތެކެވެ. މީގެ މައިގަނޑު މަގްސަދަކީ ރާއްޖޭގެ ކަނޑުގެ މާހައުލާއި އައްސޭރިފަށުގެ ދިރުންތަކުގެ މުހިންމުކަން ހާމަކޮށް ހޭލުންތެރިކަން އިތުރުކުރުމެވެ.
މީގެ އިތުރުން، އޯޝަން ފެސްޓިވަލްގެ ހަރަކާތްތައް މި މަހުގެ 20 ވާ ބުރާސްފަތި ދުވަހު ހުޅުމާލޭ ދިރާގު ބީޗުގައި ކުރިއަށްދާނެ ކަމަށް މިނިސްޓްރީން ވަނީ އިއުލާނުކޮށްފައެވެ. ހެނދުނު 9:00 އިން ހަވީރު 5:30 އަށް ކުރިއަށްދާ މި ފެސްޓިވަލްގައި ކުޑަކުދިންނަށް ހާއްސަ ފެނުގެ ކުޅިވަރުތަކާއި، އެކި ޖަމިއްޔާ ޖަމާއަތްތަކުގެ މަސައްކަތްތައް ދައްކާލާ މައުލޫމާތު ދޭ ސްޓޯލްތައް ހުންނާނެއެވެ.