ސައުތު އޭޝިއަން ފުޓްބޯޅަ ފެޑެރޭޝަން (ސާފް) ގެ ނައިބު ރައީސަކަށް ރާއްޖޭގެ ކުރީގެ މަޝްހޫރު ފުޓްބޯޅަ ތަރި އަލީ އުމަރު އިންތިހާބުކޮށްފި އެވެ.
އޭނަ އަކީ ރާއްޖޭގެ ފުޓްބޯޅައިގެ މައި އިދާރާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމްގެ) ގެ ނައިބު ރައީސް ވެސް މެ އެވެ.
ދެކުނު އޭޝިއާގެ ފުޓްބޯޅައިގެ މައި އިދާރާގެ ނައިބު ރައީސަކަށް އަލީ އުމަރު އިންތިހާބުކޮށްފައި މި ވަނީ މިދިޔަ އަހަރު ބޭއްވި ސާފްގެ ކޮންގްރެސް އިން ފެށިގެން ފެޑެރޭޝަންގެ ނައިބުގެ މަގާމު އޮތީ ހުސްކޮށް އޮއްވަ އެވެ.
އަލީ އުމަރަކީ މީގެ ކުރިން ސާފްގެ އެގްޒެކެޓިވް ކޮމިޓީގައި ވެސް ރާއްޖެ ތަމްސީލުކޮށްފައިވާ މީހެކެވެ. އޭނަ ސާފްގެ ނައިބު ރައީސަކަށް އިންތިހާބުކުރީ 2026 އާ އަށެވެ. އޭނައާ އެކީ ނައިބު ރައީސެއްގެ ގޮތުގައި ނޭޕާލުގެ ސުންދަރު ނަރްސިންގް ޖޯޝީ ވެސް މަސައްކަތް ކުރައްވާނެ އެވެ.
އަލީ އުމަރާއި ޖޯޝީ މަގާމަށް އިއްޔެ އިންތިހާބުކުރީ ބަންގްލަދޭޝްގެ ޑާކާގައި އިއްޔެ ބޭއްވި ސާފްގެ ކޮންގްރެސްގަ އެވެ.
އިއްޔެ ބޭއްވި ކޮންގްރެސްގައި ސާފްގެ ފަރާތުން މަންދޫބެއްގެ ގޮތުގައި އޭއެފްސީ އެގްޒެކެޓިވް ކޮމިޓީ އަށް ކަނޑައެޅީ، އޯލް އިންޑިއާ ފުޓްބޯލް ފުޓްބޯލް ފެޑެރޭޝަން (އޭއައިއެފްއެފް) ގެ ޖެނެރަލް ސެކްރެޓަރީ ޝާޖީ ޕްރަބާކަރަން އެވެ.