ދުނިޔޭގައި ތިބި އެންމެންނަކީ އެއް ފިކުރެއްގެ ބައަކު ނަމަ އެއްވެސް ޚިޔާލުތަފާތުވުމެއްވެސް އެއްވެސް މައްސަލައެއްވެސް ނުއޮންނާނެއެވެ. މައްސަލަތައް މިއޮތީ މީސްތަކުގެ ޚިޔާލާއި ފިކުރު ތަފާތުވީމައެވެ. އެއީ ﷲ ތަޢާލާ އެކަން މިންވަރުކުރައްވަވާފައި އޮތް ގޮތެވެ. އަހުރެމެންނަށް އޮތީ އެކަން ބަލައިގަތުމެވެ.
ޚިޔާލާއި ފިކުރު ތަފާތު މީހުންނަށް ދުނިޔޭގައި ޖާގަ ނެތްނަމަ ﷲ ތައާލާ ދުނިޔޭގައި ކާފަރުން ނުބައިތިއްބަވާނެއެވެ. ﷲ ތަޢާލާ ބޭނުންފުޅުވެވޮޑިގެންފި ކޮންމެ ހިނދެއްގައި ދުނިޔޭގައި އުޅޭ ހުރިހާ ކާފަރުން ނައްތަވައިލެއްވެވިދާނެއެވެ.   ﷲ ތަޢާލާއަށް އުރެދުމުގައި ހައްދުފަހަނައަޅައި ދިދިއުމުން ފަނާ ކުރައްވަވާފައިވަނީ ކިތައް ޤައުމުގެ މީޙުން ހެއްޔެވެ؟ ވީއިރު މިކަމުގައި އިތުރު ހެއްކަކަށް ބޭނުމެއް ނުވެއެއް ނޫން ހެއްޔެވެ؟  
ދުނިޔެއާއި ދުނިޔޭގައި ވާހައި ތަކެއްޗެއްގެ މިލްކުވެރިފަރާތަކީ ﷲ ތަޢާލާއެވެ. ދުނިޔޭގައި މިއުޅެވެނީ އެކަމަށް ﷲ ތައާލާ މިންވަރުކުރެއްވެވުމުންނެވެ. އަދި ދުނިޔޭގައި މިއުޅެވެނީވެސް ﷲ ތަޢާލާ މިންވަރު ކުރައްވަވާ ނިޢްމަތްތަކުގެ ބޭނުންކޮށްގެންނެވެ. އެހެންކަމާއިއެކުވެސް ﷲ ތަޢާލާއަށް އުރެދި ނުކިޔަމަންތެރިވަނީއެވެ. ނުކިޔަމަންތެރިވުމުންވެސް އެމީހަކު ދުނިޔޭގައި ލެއްވެވި މުއްދަތު ހަމަވަންދެން ދުނިޔޭގައި އުޅުމުގެ ފުރުޞަތު އެމީހަކަށް ﷲ ތަޢާލާ ދެއްވަވައެވެ. ނިޢްމަތްތައްވެސް ދެއްވަވައެވެ.  
ނަމަވެސް މިއަދު މިފެންނަނީ ތިމާގެ ޚިޔާލާ ފިކުރަށް ތާއީދު ނުކުރާ ނަމަ އެމީހަކަށް ހަސަދަވެރިވެ ދުނިޔޭގައި އެމީހކު ހުރުމަށްވެސް ނޭދި ނުބައި އަމަލުތައް ކުރަމުން ގެންދާތަނެވެ. އެއީ ދުނިޔޭގައި ހުރެގެން ނުވާނެ މީހެއް ކަމަށް އަމިއްލައަށް ކަނޑައަޅައި އެމީހަކު ނުވަތަ އެބައަކު މަރައި ހުސްކުރަމުން ގެންދާތަނެވެ. އިސްލާމް ދީނުގެ ނަމުގައިވެސް އެކަން އެބަކުރެއެވެ. އަހަރެންގެ ސުވާލަކީ އެގޮތަށް މީހުން މަރަން ހުއްދަ ދިނީ ކާކު ހެއްޔެވެ؟ ހަމަޤައިމުވެސް ﷲ ތަޢާލާ އެފަދަ އެއްވެސް ހުއްދައެއް އެއްވެސް މީހަކަށް ދެއްވަވާފައެއް ނުވެއެވެ. ޝަރުޢީ ޙުކުމަކާއި ނުލައި މީހަކު މެރުން ހުއްދަވާނެ އެއްވެސް ދީނީ ޙުކުމެއް ނުދެއްކޭނެއެވެ.  
ނިކަން ވިސްނައިލަބަލާށެވެ. މިއަދު ދުނިޔެއަށް ކުރިމަތިވެފައިވާ އެންމެ ބޮޑު އެއް ވަބާއަކީ މަސްތުވާތަކެތީގެ ވަބާއެވެ. އެވަބާގައި ތިބާގެ ދަރިފުޅު ޖެހުމުން ކުރާ ކަމަކީ ދަރިފުޅު މަރައިލުން ހެއްޔެވެ؟ ބުއްދި ސަލާމަތުން ހުރި އެއްވެސް ބެލެނިވެރިއަކު އެގޮތަށް އެކަމެއް ނުކުރާނެއެވެ. ބަލާނީ ފަރުވާ އާއި ނަޞޭޙަތްދީގެން އިޞްލާޙްކުރެވޭތޯއެވެ. ތިބާ ހުންނާނީ ދަރިފުޅަށް ތެދުމަގު ދައްކަވައި އެވަބާއިން ސަލާމަތްކޮށްދެއްވެވުން އެދި ދުޢާކުރުނަމްތީގައެވެ. އެގޮތަށް ހުއްޓައި މީހަކު އައިސް ތިބާގެ ދަރިފުޅު މަރާލަން ޖެހޭ ކަމަށް ބުނުމުން ތިބާއަށް ކުރާނެ އަސަރާއިމެދު ނިކަން ވިސްނައިބަލާށެވެ. އަދި މީހަކު ތިބާގެ ދަރިފުޅު މަރާލައިފި ކަމަށް ބުނެފިނަމަ ކުރާނެ އަސަރާއިމެދު ވެސް ނިކަން ވިސްނައިލަބަލާށެވެ. 
ވީމާ ޝަރުޢީ ޙުކުމަކާއި ނުލައި އިސްލާމް ދީނުގެ ނަމުގައި މީހުން ނުމަރާށެވެ. އަދި ތިމާ އާއި ޚިޔާލު ތަފާތުވުމަކީ މީޙަކު މަރަން ޖެހޭ ކަމެއް ކަމަށް ނުވިސްނާށެވެ. މީހަކު ގޯސް މަގަކުން ކަންކަން ކުރަނީ ނަމަ ނަޞޭޙަތްތެރިވާށެވެ. އިޞްލާޙްކުރަން މަސައްކަތްކުރާށެވެ. ހެޔޮ ދުޢާ ކުރާށެވެ. އިޞްލާޙް ނުވާނަމަ އެމީހެއްގެ މައްސަލަ ޝަރީޢަތާއި ހަމައަށް ގެންދާށެވެ. ޝަރީޢަތުން ކުރާ ޙުކުމަށް ތަބައަވާށެވެ.  
މިއަދު މިފެނަނަނީ ޢާއިލާގެ މީހުންގެ މެދުގައި ޚިޔާލުތަފާތުވާ ކަންކަމާއި ގުޅިގެން ވެސް އަތް އިސްކޮށް ބޮޑެތި އަނިޔާތައް ކުރަމުން ގެންދާ ތަނެވެ. ބައެއް ޙާލަތުގައި އަމިއްލަ އަޚުން މަރަމުން ގެންދާތަނެވެ. އެއްގޮތަކަށްވެސް އެފަދަ ކަންކަން ނުކުރާށެވެ. ޚިޔާލު ތަފާތުވުމަށް ފުރުޞަތުދޭށެވެ. އުފެދޭ މައްސަލަތައް މަޝްވްރާކުރުމުގެ ތެރެއިން ޙައްލުކުރަން މަސައްކަތްކުރާށެވެ.  
އަތް އިސް ކުރެވެނީ ކެތްތެރިކަން ނެތުމުންނެވެ. ނުވަތަ ކެތްތެރިކަން ކުޑަވުމުންނެވެ. ﷲ ތަޢާލާ އަންގަވާފައިވަނީ ކެތްތެރިކަމާއިއެކު ނަމާދުކުރުމުން ވާގިއެދުމަށެވެ. އަދި ﷲ ތަޢާލާ ވޮޑިގެންވަނީ ކެތްތެރިންނާއިއެކުގައި ކަމަށެވެ. ވީމާ ކެތްތެރިވުމުގެ ޤާބިލުކަން ހުންނަން ޖެހޭނެއެވެ. ނޫން ނަމަ އެމީހެއްގެ ދީން ފުރިހަމަވެސް ނުވާނެއެވެ.
 
- މުފްތީ މެންކުގެ ދަރުސަކުން