ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ ކުރީގެ އެމްޑީ އަހުމަދު ޝަރީފުގެ ޕާސްޕޯޓް ހިފަހައްޓައިފިއެވެ.
މިކަމާ ގުޅިގެން "ދިޔަރެސް" އަށް މައުލޫމާތު ދެމުން އެންޓި ކޮރަޕްޝަން ކޮމިޝަން ގެ އޮފިޝަލަކު ވިދާޅުވީ އެ ކުންފުނީގެ ކުރީގެ އެމްޑީގެ ޕާސްޕޯޓު ހިފަހައްޓާފައިވާ ކަމަށާއި އޭނާގެ ޕާސްޕޯޓު ހިފެހެއްޓީ އިއްޔެ ކަމަށެވެ.
ޝަރީފް ގެ ޕާސްޕޯޓު ހިފަހައްޓާފައިވަނީ ކޯޓު އަމުރެއްގެ ދަށުން ކަމަށާއި ޕާސްޕޯޓް ހިފެހެއްޓީ ބަލަމުންދާ މައްސަލައަކާ ގުޅިގެން ކަމަށް ވިދާޅުވިއެވެ.
ސްޓެލްކޯގެ އެމްޑީ ކަމުގެ މަގާމުގެ އިތުރުން އަހުމަދު ޝަރީފް އިލެކްޝަންސް ކޮމިޝަނުގެ ރައީސްކަމުގެ މަގާމު އަދި ފެނަކައިގެ މެނޭޖިން ޑިރެކްޓަރުކަމުގެ މަގާމު ވެސް އަދާކޮށްފައިވެއެވެ. ސްޓެލްކޯގެ މެނޭޖިން ޑިރެކްޓަރުގެ މަގާމަށް އޭނޭ އައްޔަންކުރީ 2022 ވަނަ އަހަރުގެ މާޗް މަހު އެވެ.
މިދިޔަ އެމްޑީޕީގެ ވެރިކަމުގައި އިސް މަގާމުތައް ފުރުއްވި ބޭފުޅުންނާއި ކުންފުނިތަކުގެ ވެރިންގެ މައްސަލަތައް އެކި އިދާރާތަކުން ބަލަމުން އަންނަ އިރު އޭގެ ތެރޭގައި ކޮރަޕްޝަނާ ގުޅުންހުރި ބޮޑެތި ތުހުމަތުތައް ކުރެވޭ މައްސަލަތައް ހިމެނެ އެވެ.