މިދިޔަ މަހުގެ 28 ވަނަ ދުވަހު އިޒްރޭލާ ގުޅިގެން އީރާނަށް ހަމަލާދޭން ފެށި ފަހުން، އެމެރިކާއިން އެ ހަނގުރާމައަށް ގާތްގަނޑަކަށް 12 ބިލިއަން ޑޮލަރު ހޭދަކޮށްފައިވާ ކަމަށް ވައިޓް ހައުސްގެ އިގްތިސާދީ މުޝީރަކު އިއްޔެ ވިދާޅުވެއްޖެ އެވެ.
ވައިޓް ހައުސްގެ ނޭޝަނަލް އިކޮނޮމިކް ކައުންސިލްގެ ޑިރެކްޓަރު ކެވިން ހެސެޓް މި އަދަދު ހާމަކުރެއްވީ ސީބީއެސްގެ 'ފޭސް ދަ ނޭޝަން' ޕްރޮގްރާމަށް ދެއްވި އިންޓަވިއުއެއްގަ އެވެ. އޭނާ ވިދާޅުވި ގޮތުގައި، މިއީ އޭނާއަށް އެންމެ ފަހުން ލިބިވަޑައިގެންފައިވާ އަންދާޒާ ރިޕޯޓުތަކުން ދައްކާ އަދަދެވެ.
ހަނގުރާމައިގެ ހަރަދުތައް އިތުރުވެ، ހަކަތައިގެ ބާޒާރަށް ލޮޅުން އަރަމުންދިޔަ ނަމަވެސް، ހެސެޓް ވަނީ އެމެރިކާގެ އިގްތިސާދަށް އޮތް ނުރައްކާ ކުޑަ ކަމަށް ވިދާޅުވެފަ އެވެ.
"އީރާނުން ކުރާ ކަންތައްތަކުގެ ސަބަބުން އެމެރިކާގެ އިގްތިސާދަށް ގެއްލުމެއް ނުވާނެ،" އޭނާ ވިދާޅުވި އެވެ.
އެމެރިކާއަކީ މިހާރު ގިނަ އަދަދަކަށް ތެޔޮ އުފައްދާ ގައުމެއްކަން ފާހަގަކުރައްވަމުން، "އަޅުގަނޑުމެންގެ އަތުގައި ވަރަށް ގިނަ ތެޔޮ އެބަހުރި" ކަމަށް ވެސް އޭނާ ވިދާޅުވި އެވެ.
ދުނިޔޭގެ ތެލުގެ ސަޕްލައިގެ %20 ދަތުރުކުރާ ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރަށް ހުރަސްއަޅާނެ ކަމަށް ބުނެ އީރާނުން ދެމުންދާ އިންޒާރުތަކާ ގުޅިގެން ބާޒާރުތަކުގައި ވަނީ ނުތަނަވަސްކަން އުފެދިފަ އެވެ.
މި ދަނޑިވަޅުގައި، އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވަނީ އަސްކަރީ ހަރަކާތްތައް އިތުރަށް ވަރުގަދަވެދާނެ ކަމުގެ އިންޒާރު ދެއްވާފަ އެވެ. އޭނާ ވިދާޅުވި ގޮތުގައި، އީރާނަށް ދެމުންދާ ހަމަލާތައް "ވަރަށް ބޮޑަށް އިތުރުވާން" ވަނީ ކައިރިވެފަ އެވެ.
ހަނގުރާމައިގެ ހަރަދުތައް ބޮޑުވެ، އޭގެ މަގްސަދުތައް ބަދަލުވަމުންދާތީ އެމެރިކާގެ ގާނޫނު ހަދާ މަޖިލީހުގެ މެންބަރުންގެ މެދުގައި ވަނީ ކަންބޮޑުވުން އުފެދިފަ އެވެ. ސެނެޓްގެ މައިނޯރިޓީ ލީޑަރު ޗަކް ޝޫމާ، ސިއްރު ބްރީފިންއަކަށް ފަހު ވިދާޅުވީ، ހަމަލާތަކުގެ މަގްސަދާ ބެހޭ ގޮތުން ސަރުކާރުން ކޮންމެ ދުވަހަކު ދައްކަނީ ތަފާތު ވާހަކަތަކެއް ކަމަށާއި، މިއީ އަސްލު މަގްސަދުން ބޭރުވެ ހަނގުރާމަ ފުޅާވަމުންދާ ކަމުގެ ނިޝާނެއް ކަމަށެވެ.
މި ހަނގުރާމައިގައި މިހާތަނަށް އީރާނުން މަދުވެގެން 1,444 މީހުން މަރުވެފައިވާއިރު، އެމެރިކާގެ 13 ސިފައިން މަރުވެ 140އަށް ވުރެ ގިނަ ސިފައިން ވަނީ ޒަހަމްވެފަ އެވެ. ހަނގުރާމައިގެ އަސަރު ލުބުނާނާއި ގަލްފުގެ ގައުމުތަކަށް ފެތުރިފައިވާއިރު، އީރާނުން ދަނީ އެ ސަރަހައްދުގެ އެކި ތަންތަނަށް ޑްރޯން އަދި މިސައިލް ހަމަލާތައް ދެމުންނެވެ.
ނުތަނަވަސްކަން ދެމިއޮތްއިރު، އިންޑިއާ ހިމެނޭ ގޮތަށް ބައެއް ގައުމުތަކުން ވަނީ ހޮރްމޫޒް ކަނޑުއޮޅިން ތެޔޮ ޓޭންކަރުތަކަށް ރައްކާތެރިކަމާ އެކު ދަތުރުކުރެވޭނެ މަގު ފަހިކުރުމަށް ތެހެރާނާ އެކު ސީދާ މަޝްވަރާތައް ފަށާފަ އެވެ.