ޗައިނާގެ ރައީސްގެ ދައުވަތަކަށް ރައީސް މުއިއްޒު ފާއިތުވު ހަފްތާގައި ޗައިނާއަށް ކުރެއްވި ދަތުރުފުޅުގައި ހދ. މަކުނުދޫގައި ޗައިނާގެ މިލިޓަރީ ބޭސްއެއް ގާއިމްކުރަން ސިއްރު އެއްބަސްވުމެއްގައި ސޮއި ކޮށްފައިކަމަށް ގިނަ ބަޔަކު ތުހުމަތު ކުރަމުން ދަނިކޮށް, މި ދަތުރުފުޅުގައި, ޑިފެންސް މިނިސްޓަރ ޢައްސާން މައުމޫން ސޮއި ކުރެއްވީ ކޮން އެއްބަސްވުމެއްގައިކަން ހާމަކުރުމަށް ސަރުކާރުން ދެކޮޅު ހަދައިފިއެވެ.
ރައީސް މުއިއްޒުގެ ޗައިނާއަށް ކުރެއްވި މިދަތުރުފުޅުގައި ޗައިނާއާއެކީ ވަނީ 20 އެއްބަސްވުމެއްގައި ސޮއިކުރައްވާފައިވާކަމަށް ރައީސް އޮފީހުން ވަނީ ވިދާޅުވެފައެވެ. އަދި އެ އެއްބަސްވުންތަކުގެ ތަފްސީލުތައް ރައީސް އޮފީހުން ހާމަކޮށްފައިވާއިރު, ޑިފެންސް މިނިސްޓަރ ޢައްސާން މައުމޫން ސޮއި ކުރެއްވި އެއްބަސްވުމުގެ ތަފްސީލު އޭގެ ތެރޭގައި ހިމަނާފައެއް ނުވެއެވެ.
ރައީސް މުއިއްޒުގެ ޗައިނާ ދަތުރުފުޅުގައި ޢައްސާން މައުމޫން ސޮއި ކުރެއްވި އެއްބަސްވުމުގެ ތަފްސީލު ހޯދާލުމަށް “ދިޔަވަރު އޮންލައިން”އިން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލުއަށް ގުޅާލުމުން އޭނާ ވިދާޅުވީ އެ މައުލޫމާތު ފަހުން ހާމަ ކުރައްވާނެ ކަމަށެވެ.
ހާމަކުރަނަޖެހޭ މައުލޫމާތެއްވިއްޔާ ފަހުން ހާމަކުރާނަން.
ޚަލީލު ވިދާޅުވިއެވެ.
”ދިޔަވަރު އޮންލައިން“އަށް މައުލޫމާތު ދިން, ނަން ހާމަކުރުމަށް ނޭދޭ, މި ސަރުކާރުގެ އިސް އޮފިޝަލަކު ވިދާޅުވި ގޮތުގައި, ރައީސް މުއިއްޒުގެ މި ދަތުރުފުޅުގައި ސިއްރު އެއްބަސްވުމެއްގެ ގޮތުގައި ސޮއިކޮށްފައިވާ މި އެއްބަސްވުމުގައި ވަނީ ރާއްޖޭގެ މަކުނުދޫގައި ޗައިނާގެ އަސްކަރީ ބޭސްއެއް ގާއިމް ކުރުމަށް އެއްބަސް ވެފައެވެ. މި މިލިޓަރީ ބޭސް އަށް ދީފައިވާ ނަމަކީ ”ނޭވީ މަރުކަޒު“ ނުވަތަ ”މެރިޓައިމް ސެންޓަރު“ ކަމަށްވެސް އޮފިޝަލް ވިދާޅުވިއެވެ.
މެރިޓައިމް ސެންޓަރު ނުވަތަ ނޭވީ މަރުކަރުގެ ގޮތުގައި އެއްބަސްވުމުގައި ލިޔެފައިވަނީ, މި ސިއްރު އެއްބަސްވުން ހާމަކުރުމަށް ސަރުކާރަށް މަޖުބޫރުވެއްޖެ ހާލަތެއްގައިވެސް, ޗައިނާއިން ރައްޖޭގައި މިލިޓަރީ ބޭސްއެއް ގާއިމް ކޮށްފައި ނުވާކަމަށް ސާބިތު ކޮށްދިނުމުގެ ގޮތުން ކަމުގައިވެސް އޮފިޝަލް ވިދާޅުވިއެވެ.
މަކުނުދޫއަކީ ރާއްޖޭގެ އުތުރުން ހުޅަނގަށް ވާގޮތަށް, އިންޑިއާ ކަނޑުން ދަތުރުކުތާ އުޅަނދުތަކާއި ސަބްމެރިންތަކަށް ފާރަލެވޭގޮތަށް, މުހިންމު ލޮކޭޝަނެއްގައި އޮންނަ ރަށެކެވެ. އަދި ޗައިނާއިން މި ރަށުގައި އަސްކަރީ ބޭސްއެއް ގާއިމް ކުރުމުން މުޅި އިންޑިއާ ކަނޑުގެ ސާވައިލަންސް ބެލެހެއްޓުމުގެ އިތުރުން އިންޑިއާ ކަނޑު ހުރަސްކޮށް ދަތުރުކުރާ އެއްވެސް އުޅަނދަކަށް ޗައިނާގެ ނޭވީގެ ރާޑަރުތަކަށް ނާރާ ދަތުރެއް ނުކުރެވޭނެއެވެ.
މިއީ އިންޑިޔާއައި އާއި ވީހާވެސް ކައިރީގައި އަސްކަރީ މަރުކަޒުތައް ޤާއިމުކޮށް އިންޑިޔާ ކަނޑުގެ ހަމަ ޖެހުން ނަގާލައި، ހަނގުރާމައިގެ ތުންފަތްމައްޗަށް އިންޑިޔާ ކަނޑުގެ ސަރަހައްދު ގެނައުމަށް ޗައިނާއިން ރާވައިގެން ހިންގާ އަސްކަރީ ރޭވުންތަކުގެ ތެރޭގައި ހިމެނޭކަމެއް ކަމަށް އަސްކަރީ ތަޖުރިބާކާރުން ދަނީ ބުނަމުންނެވެ.
ސަރަހައްދީ ހަމަ ނުޖެހުން ނަގާލައި، އިންޑިޔާއާއި، ޗައިނާއާއި ދެމެދުގައި އޮތް ނުތަނަވަސް ކަމުގެ ތެރެއަށް، ދިވެހިރާއްޖެއިން ވަދެ، އިންޑިޔާގެ އަސްކަނި ދޮށަށް ޗައިނާގެ އަސްކަރިއްޔާ ގެނައުމަށް ފައިސާގެ ދަހިވެތިކަމުގައި ރައީސް މުއިއްޒު ކުރައްވަމުން ގެންދަވާ މި މަސައްކަތަކީ ދިވެހިންގެ ޤައުމިއްޔަތާއި ދިވެހިން ލޯބި ކުރާ އަމާން ދިރިއުޅުމުގެ މަސްލަހަތަށް ފުށުއަރާ ކަމެއްކަމަށް ގިނަ ދިވެހީންވެސް ދެކެއެވެ.
ރާއްޖެއަކީ ޗައިނާއާއި އިންޑިއާދެމެދު އޮތް ހަމަނުޖެހުމުގައި ފިތެން ބޭނުން ނުވާ ގައުމެއްކަމަށް ރައީސް މުއިއްޒު ވިދާޅުވި ނަމަވެސް, މަކުނުދޫގައި އަޅާ ޗައިނާގެ މި މިލިޓަރީ ބޭސްގެ ސަބަބުން ޗައިނާއާއި އިންޑިއާއާ ދެމެދު އުފެދިގެންދާނެ ހަމަނުޖެހުމުގައި ހަގީގަތުގައި ގުރުބާން ވެގެންދާނީވެސް ދިވެހިރާއްޖެކަމަށްވެސް ސިޔާސީ އަދި އަސްކަރީ ތަޖުރިބާކާރުން ދަނީ ވިދާޅުވަމުންނެވެ.
އަދި މިއީ ފައިސާގެ ދަހިވެތިކަމުގައި ރައީސް މުއިއްޒު ދިވެހި ބިމުން ބައެއް ޗައިނާއަށް ވިއްކާލި ވިއްކާލުމެއްގެ ގޮތުގައިވެސް މި އެއްބަސްވުން ގިނަބަކު ދަނީ ސިފަކުރަމުންނެވެ.
ދިވެހި ޤައުމުގެ އެންމެ އިންޗިއެއްވެސް ބޭރުގެ ބައެއްގެ އަތް މައްޗަށް ނުދޭނެ ކަމަށް ބުނެ، ވެރިކަމަށް އައިސް މަކުނުދޫގައި ޗައިނާއިން މެރިޓައިމް ސެންޓަރެއްގެ ނަމުގައި މިލިޓަރީ ބޭސް އެއް އަޅަން ރައީސް މުއިއްޒު އެއްބަސްވުމަކީ ދިވެހި ރައްޔިތުން ބަލައިގަންނާނެ ކަމެއް ނޫނެވެ.
”ދިޔަވަރު އޮންލައިން“އަށް މައުލޫމާތު ލިބިފައިވާ ގޮތުގައި ރައީސް މުއިއްޒުގެ މި ދަތުރުފުޅުގައި ވަނީ ސިއްރު 10 އެއްވަސްވުމެއްގައި ސޮއި ކޮށްފައެވެ.