ކުރީގެ ރައީސް އިބްރާހީމް މުޙައްމަދު ޞާލިހްގެ ފަހު އަހަރު ރައީސް އޮފީހުން ހަރަދުތައް ކޮށްފައިވަނީ މާލިއްޔަތު ގަވައިދާ އެއްގޮތަށް ވަރަށް ރަނގަޅަށް ކަމަށް އޮޑިޓް ރިޕޯޓުން ދައްކައިފިއެވެ. އޮޑިޓް އޮފީހުން އިއްޔެ އާއްމު ކުރި ރައީސް އޮފީހުގެ 2023 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓްގައި ބުނެފައިވަނީ އެ އަހަރު ރައީސް އޮފީހުން މައިގަނޑު ގޮތެއްގައި ހަރަދުތައް ކޮށްފައިވަނީ އެ އޮފީހަށް ފާސްކޮށްދީފައިވާ ބަޖެޓުގައި ކަނޑައަޅާފައިވާ ކަންތައްތަކަށް, ފާސްކޮށްދީފައިވާ އަދަދަށް ކަމަށެވެ. ހަމައެހެންމެ އެ އަހަރު ރައީސް އޮފީހުން މާލީ ކަންކަން ބަލަހައްޓާފައި ވަނީ މާލިއްޔަތު ގަވާއިދާ އެއްގޮތަށް ކަމަށް އޮޑިޓް ރިޕޯޓްގައި ބުނެފައިވެއެވެ. ފޯރިގަދަ ރިޔާސީ އިންތިޚާބެއް ބޭއްވި, 2023 ވަނަ އަހަރު ރައީސް އޮފީހަށް ފާސްކޮށްދީފައިވަނީ 230 މިލިއަން ރުފިޔާގެ ބަޖެޓެކެވެ. އެ އޮފީހުން ހަރަދު ކޮށްފައިވަނީ އޭގެ ތެރެއިން 210 މިލިއަން ރުފިޔާއެވެ. އެ ބަޖެޓުން އެންމެ ބޮޑު ހޭދައެއް ކޮށްފައިވަނީ ރިކަރަންޓް ހަރަދަށެވެ. އެއީ މުވައްޒަފުންގެ ހަރަދާއި އޮފީސް ހިންގުމުގެ ހަރަދުގެ އިތުރުން ދަތުރުފަތުރު ފަދަ ހަރަދުތަކެވެ. އެ ހަރަދުތައް ކުރުމަށް 220 މިލިއަން ރުފިޔާ ފާސްކޮށްފައިވާއިރު ހަރަދު ކޮށްފައިވަނީ 201 މިލިއަން ރުފިޔާއެވެ. ހުރިހާ ހަރަދެއް ކުރުމަށް ފަހު އެ އަހަރު ރައީސް އޮފީހަށް ފާސްކުރި ޖުމުލަ ބަޖެޓުން 19 މިލިއަން ރުފިޔާ ވަނީ ބާކީވެފައެވެ.