ޑިމޮކްރެޓިކް އުސޫލުތައް ދެމެހެއްޓެމުގައި އިންޑިއާއަކީ ރާއްޖެއަށް ނަމޫނާއެއް ކަމަށް ފޮރިން މިނިސްޓަރު ޑރ. ޢަބްދުﷲ ޚަލީލް މިއަދު ވިދާޅުވެއްޖެއެވެ. ޚަލީލް އެހެން ވިދާޅުވީ، އިންޑިއާގެ 76 ވަނަ ޖުމްހޫރީ ދުވަހުގެ މުނާސަބަތުގައި އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް. ޖައިޝަންކަރަށް ފޮނުއްވި ތަހުނިޔާގެ މެސެޖެއްގައެވެ. އެ މެސެޖުގައި އޭނާ ވަނީ ޖުމްހޫރީ ދުވަހުގެ މުނާސަބަތުގައި ދިވެހި ސަރުކާރާއި ރައްޔިތުންގެ ނަމުގައި، އިންޑިއާގެ ސަރުކާރަށާއި، ރައްޔިތުންނަށް، ތަހުނިޔާ އާއި ހެޔޮއެދުންތައް އަރިސްކުރައްވައިފައެވެ. ޚަލީލް ވިދާޅުވީ، ޑިމޮކްރަސީގެ މައިގަނޑު އަސާސަކީ ސުލްހައާއި ހަމަޖެހުމާއި ކުރިއެރުން ކަމުގައި ހެދިދާނެ ގޮތުގެ ލާމަސީލު މިސާލު އިންޑިއާއިން މުޅި ދުނިޔެއަށް ދައްކަމުން އަންނަ ކަމަށެވެ. މިގޮތުން، ޑިމޮކްރެޓިކް އުސޫލުތައް ދެމެހެއްޓެމާއި، ޑިމޮކްރެޓިކް މުއައްސަސާތައް ބިނާކޮށް ހަރުދަނާކުރުމަށްޓަކައި، އިންޑިއާ ވާނީ ރާއްޖެއަށް ނަމޫނާ ގައުމަކަށް ކަމަށް ވެސް އޭނާ ވިދާޅުވިއެވެ. މިނިސްޓަރު ވިދާޅުވީ ރާއްޖެއާއި އިންޑިއާއާ ދެމެދު އޮތް ގާތް ރަހުމަތްތެރިކަން ހާމަކޮށްދެނީ އިންޑިޔާ ސަރުކާރުން ދިވެހި ސަރުކާރާ ދެމެދު ބާއްވާ ގާތްކަމާއި، ދޭ އެހީތެރިކަމުން ކަމަށެވެ. މީގެއިތުރުން ޚަލީލް ވަނީ ރާއްޖެއަށް ދިމާވާ ކޮންމެ ދަތި ހާލަތެއްގައި އެންމެ ފުރަތަމަ އެހީތެރިކަން ފޯރޮކޮށްދީފައިވަނީ އިންޑިއާކަމަށްވާއިރު، ޒަމާނުއްސުރެ ދެ ގައުމުގެ ދެމެދުގައި އޮތް ގާތް ގުޅުން އެކަމުން ވެސް ރަމްޒުކޮށްދޭކަމަށެވެ. "އިންޑިއާގެ އެކި ކަންކޮޅުތަކުގައި އުފާވެރިކަމާއެކު ޖުމްހޫރީ ދުވަސް ފާހަގަ ކުރާ މުނާސަބަތުގައި، އިންޑިއާގެ ސަރުކާރަށާއި، އެ ގައުމުގެ ރައްޔިތުންނަށް، އަމަންއަމާންކަމާއި، ކުރިއެރުމާއި، ފާގަތިކަމަށް އެދެމް،" އޭނާ ވިދާޅުވިއެވެ. ރާއްޖޭގައި ތިބި އިންޑިއާގެ ސިފައިން އަނބުރާ ފޮނުވާލުމުގެ ބޮޑު ކެމްޕެއިނަކަށް ފަހު ވެރިކަމަށް އައި މި ސަރުކާރުގެ ފުރަތަމަ ދުވަސްކޮޅު އިންޑިއާއާ ވަރަށް ގުޅުން ގޯސްވިއެވެ. އެގޮތުން ތިން ނައިބު ވަޒީރުންތަކެއް އިންޑިއާގެ ވެރިންނާއި ރައްޔިތުންނަށް ކުޑައިމީސްކޮށް ދެއްކި ވާހަކައަކާ ގުޅިގެން ރާއްޖޭގެ ފަތުރުވެރިކަން ބޮއިކޮޓް ކުރުމަށް ގޮވާލައި، އިންޑިއާގައި ކެމްޕެއިނެއް ވެސް ކުރިއަށްގެންދިޔައެވެ. އެއަށްފަހު މި ސަރުކާރުން ވަނީ އިންޑިއާއާ ގުޅުން ރަނގަޅު ކުރުމަށް ގިނަ މަސައްކަތްތަކެއް ކޮށްފައެވެ. އަދި އެގައުމުގެ އޮފިޝަލުންނާއި ދިވެހި ސަރުކާރުން ވެސް ވަނީ އެ މަސައްކަތްތަކާއެކު އިންޑިއާއާ ގުޅުން ރަނގަޅުވެފައިވާ ކަމަށް ބުނެފައެވެ.