ރައީސް މުހައްމަދު މުއިއްޒުގެ ނާގާބިލު ސަރުކާރުން ދޮޅު އަހަރުގެ ތެރޭގައި ހއ. ދިއްދޫއަށް އެއްވެސް ކަމެއް ކޮށްދީފައި ނުވާކަން ދިޔަވަރު ނޫހަށް ހާމަވެއްޖެއެވެ. އަދި ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބުގައި ވެވަޑައިގެންނެވި ގިނަ ވައުދުތައް މި އަހަރުގެ ބަޖެޓުގައި ހިމަނާފައި ނުވާކަންވެސް ވަނީ ފާހަގަކުރެވިފައެވެ.
ރައީސް މުއިއްޒު ދިއްދޫއަށް ވެވަޑައިގެންނެވި އެންމެ މުހިންމު ވައުދަކީ އާ ހޮސްޕިޓަލެއް އެޅުމެވެ. ނަމަވެސް މި އަހަރުގެ ބަޖެޓުގައި މި މަޝްރޫއު ހިމަނާފައި ނުވާކަން ވަނީ ކަށަވަރުވެފައެވެ. މީގެ އިތުރުން، އެއާޕޯޓު އެޅުމަށް ބޭނުންވާ ބިން ހިއްކުމުގެ މަޝްރޫއުވެސް ވަނީ ހުއްޓިފައެވެ.
“އަޅުގަނޑުވީ ހުރިހާ ވައުދެއް އިރާދަކުރެއްވިއްޔާ ފުއްދާނަން” މިހެން ވިދާޅުވެ، ރައީސް މުއިއްޒު ފެބްރުއަރީ 25، 2024 ގައި ދިއްދޫގައި ވާހަކަފުޅު ދައްކަވާފައިވީ ނަމަވެސް، އެއިން އެއްވެސް ވައުދެއް ފުއްދަވާފައި ނުވެއެވެ. ދޮގު ވައުދުގެ މައްޗަށް ވައުދު ވަމުން ދާއިރު، 2 އަހަރު ނިމިގެން ދަނީއެވެ. ދައުރުގެ ބާކީ އޮތް މުއްދަތުގައި ނުފަށާ ހުރި ޕްރޮޖެކްޓް ތަކެއް ފަށައި ދެނެއް ނުނިންމޭނެއެވެ. 2026 ގައި ޤައުމުގެ މާލީ ހާލަތު އަދި އިޤްތިޞާދީ ހާލަތު ދާނީ މިއަށްވުރެ އެތައް ގުނައެއް ދަށަށެވެ.
މުޅި ރާއްޖޭގެ ޕީއެސްއައިޕީގެ ޖުމުލަ ބަޖެޓު 12.4 ބިލިއަން ރުފިޔާގެ ތެރެއިން ސިއްހީ ދާއިރާއަށް 964 މިލިއަން ރުފިޔާ ކަނޑައަޅާފައިވީ ނަމަވެސް، ދިއްދޫ ހޮސްޕިޓަލް ތަރައްގީކުރުމަށް އެއްވެސް ފައިސާއެއް އެއިން ކަނޑައަޅާފައި ނުވެއެވެ. އަދި ވައިގެ ބަނދަރުތަކަށް 2.4 ބިލިއަން ރުފިޔާ ކަނޑައަޅާފައިވާއިރު، ދިއްދޫ އެއާޕޯޓަށްވެސް އެއްވެސް ފައިސާއެއް ހިމަނާފައި ނުވެއެވެ.
މި އަހަރުގެ ބަޖެޓުގައި ދިއްދޫއަށް ހިމަނާފައިވާ މަޝްރޫއުތަކަކީ ކުރީގެ ސަރުކާރުން ފެށި ނުވަތަ ރޭވި މަޝްރޫއުތަކެވެ. އޭގެ ތެރޭގައި ބަނދަރު ހެދުމަށް 2.04 މިލިއަން ރުފިޔާ އާއި މަގު ހެދުމަށް 21.3 މިލިއަން ރުފިޔާ ހިމެނެއެވެ. އަދި ތައުލީމީ މަރުކަޒަށް 4.5 މިލިއަން ރުފިޔާ އާއި ޖޫނިއަރ ކޮލެޖަށް 11.3 މިލިއަން ރުފިޔާ ކަނޑައަޅާފައިވެއެވެ.
ދިއްދޫ ކައުންސިލުގެ ރައީސް އަބްދުﷲ ރަޝީދު ވިދާޅުވި ގޮތުގައި، ބިން ހިއްކުމުގެ މަޝްރޫއާ ގުޅޭ އެއްވެސް މައުލޫމާތެއް ކައުންސިލާ ހިއްސާކޮށްފައި ނުވެއެވެ. މިއީ ސަރުކާރުގެ ނާގާބިލުކަން ދައްކުވައިދޭ އިތުރު ހެއްކެކެވެ.
އަތޮޅުތަކަށް ކުރައްވާ ދަތުރުފުޅުގެ ތެރެއިން މި ހަފުތާގައި ރައީސް މުއިއްޒު ދިއްދޫއަށް ޒިޔާރަތްކުރައްވާ ގޮތަށް ހަމަޖެހިފައިވާއިރު، އެ މަނިކުފާނުގެ ސަރުކާރުން ދިއްދޫއަށް ވެވަޑައިގެންނެވި އެއްވެސް ވައުދެއް ފުއްދާފައިނުވާކަން ރައްޔިތުންނަށް ވަނީ ފާޅުވެފައެވެ.