އައްޑޫން ކަރަންޓް ކެނޑޭ މައްސަލަ ވަގުތުން ވަގުތަށް ހައްލު ކުރަން ގޮވާލައި ރައްޔިތުންގެ މަޖިލީހަށް މިއަދު އެމްޑީޕީން ހުށަހެޅި ކުއްލި މައްސަލަ ބޭރުކޮށްލައިފި އެވެ.
އެ މައްސަލަ ހުށަހެޅުއްވީ އެ ޕާޓީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލެވެ.
އޭނަ ހުށަހެޅުއްވި މައްސަލަ ބޭރުކޮށްލީ ވެރިކަން ކުރާ ޕީއެންސީގެ 47 މެންބަރުންގެ ވޯޓާ އެކީގަ އެވެ. ކުއްލި މައްސަލަ ބަލައިގަންނަން ވޯޓު ދެއްވީ 13 މެންބަރެކެވެ. އޭގެތެރޭގައި ހިތަދޫ މެދު ދާއިރާގެ ޕީއެންސީ މެންބަރު، އަހުމަދު އަޒާން ހިމެނިވަޑައިގަންނަވަ އެވެ.
ނާޒިލް ހުށަހެޅުއްވި ކުއްލި މައްސަލައިގައި ބުނެފައި ވަނީ އައްޑޫގެ ގުޅިފައިވާ އަވަށްތަކުން ކަރަންޓު ކެނޑެމުން ދިޔުމުގެ ސަބަބުން ރަައްޔިތުންގެ އަގުބޮޑު މުދަލަށް ގެއްލުންވަމުންދާ ކަމަށާއި މިކަމާ ހެދި ރައްޔިތުން ތިބީ ހާސްކަމާއި ދަތިކަމުގެ ތެރޭގައި ކަމަށެވެ. އަދި އެ ކަންކަން އެހެން ހުއްޓައި އައްޑޫގެ ކަރަންޓު މައްސަލަ ހައްލު ކުރުމަށް ބޭނުންވާ ކެޕޭސިޓީއަ ށްވުރެ މާ ދަށް ކެޕޭސިޓީގެ ޖަނެރޭޓާރެއް ގެންގޮސްގެން، އެ މައްސަލަ ހައްލު ކުރަން އުޅޭ ކަމަށް ދައްކައި އައްޑޫގެ ކަރަންޓު މައްސަލަ ހައްލުކޮށް ދެއްވާނެ ކަމަށް އެންވަރަމެންޓް މިނިސްޓަރު، ތޯރިގު އިބްރާހިމް ވިދާޅުވި ތާރީހު ފަހަނައަޅައި ދިޔައިރު ވެސް އެއްވެސް ވަރަކަށް ކަރަންޓުގެ މައްސަލަ ހައްލުވެފައި ނުވާ ކަމަށް ބުނެފައިވެ އެވެ.
އެގެންވެ ކުއްލި މައްސަލައިގައި ސަރުކާރަށް ގޮވާލީ އައްޑޫގެ ކަރަންޓު ހާލަތު ރަނގަޅު ކުރުމަށް އަޅަން ޖެހޭ ފިޔަވަޅުތައް ވަގުތުން ވަގުތަށް އެޅުމަށެވެ.
މީގެ ކުރިން ވެސް އައްޑޫގެ ކަރަންޓް މައްސަލައާ ގުޅޭ ގޮތުން ހުށަހެޅި ކުއްލި މައްސަލަތައް ބޭރުކޮށްފައިވެ އެވެ.
އައްޑޫގެ ގުޅިފައިވާ އަވަށްތައް ކަމަށްވާ ހިތަދު އާއި މަރަދު އާއި މަރަދޫފޭދޫގެ އިތުރުން ފޭދޫން ކަރަންޓް ކެނޑޭ މައްސަލައިގައި ފެނަކައާ ދެކޮޅަށް މިދިޔަ ހުކުރު ދުވަހު ހިތަދޫގައި މުޒާހަރާ ވެސް ކޮށްފައިވެ އެވެ. އެ މުޒާހަރާގައި ބައެއް ކައުންސިލަރުން އިސްކޮށް ތިއްބެވި އެވެ.