އިސްރާއީލުން ލުބުނާނަށް ދޭން ފަށާފައިވާ އުދުވާނީ ހަމަލާތަކުގައި, ފާއިތުވި 24 ގަޑިއިރުތެރޭ ލުބުނާނުގެ 356 މީހުން ޝަހީދު ކޮށްލައިފިއެވެ.
އިސްރާއީލުން ލުބުނާނަށް އުދުވާނީ ހަމަލާ ދޭން ފަށާފައި މިވަނީ, ފަލަސްތީނުގެ މިނިވަންކަމަށް ޖިހާދު ކުރަމުންދާ, ލުބުނާނުގެ ހިޒްބުالله ޖަމާއަތުން އިސްރާއީލަށް ދެމުންދާ ރޮކެޓް ހަމަލާތައް ހުއްޓުވުމުގެ ނަމުގައެވެ. އަދި އިސްރާއީލުން ބުނެފައިވަނީ, ހިޒްބުالله ޖަމާއަތުގެ ހަމަލާތަކުގެ ސަބަބުން ލުބުނާނުގެ ބޯޑަރު ކައިރިން އެހެން ހިސާބުތަކަށް ގެންދާން ޖެހިފައިވާ އެގައުމުގެ ރައްޔިތުނަށް ރައްކާތެރި މާހައުލެއް ގާއިމް ނުކުރެވެނީސް މިހާރު ދޭން ފަށާފައިވާ އަސްކަރީ ހަމަލާތައް ހުއްޓާ ނުލާނެ ކަމުގައެވެ. މި ހަމަލާތަކުގައި މިހާތަނަށް ލުބުނާނުގެ 1,200 މީހުން ވަނީ ޒަޚަމް ވެފައެވެ.
ލުބުނާނުގެ ހިޒްބުالله ޖަމާއަތުން އިސްރާއީލަށް ރޮކެޓް ހަމަލާތައް ދެމުންދަނީ, 2023 ވަނަ އަހަރުގެ އޮކްޓޯބަރމަހުގެ 7 ވަނަ ދުވަހަށްފަހު އިސްރާއީލުން ފަލަސްތީނުގެ ޢައްޒާއަށް ދޭން ފަށާފައިވާ ހަމަލާތަކުގެ ބަދަލު ހިފުމުގެ ގޮތުންކަމަށް އެޖަމާއަތުން ދަނީ ބުނަމުންނެވެ.
އިސްރާއީލުން ޢައްޒާގައި ހިންގަމުންދާ ގަތުލުޢާންމު ތަކުގައި މިހާތަނަށް ފަލަސްތީނުގެ 42,000 އަށްވުރެ ގިނަ ރައްޔިތުން ވަނީ ޝަހީދު ވެފައެވެ.
އަދި އިސްރާއީލުގެ މި އުދުވާންއާއި ދެކޮޅަށް އިސްލާމީ ހުރިހާ ގައުމުތަކުންވެސް ވަނީ އިސްރާއީލާއި ދެކޮޅަށް އެކި ބާވަތުގެ ފިޔަވަޅުތައް އަޅާފައެވެ. އޭގެ ތެރޭގައި ބައެއް ގައުމުތަކުން އިސްރާއީލުގެ ރައްޔިތުން އެގައުމުތަކަށް ދަތުރުކުރުން މަނާ ކޮށްފައިވާއިރު, އަނެއްބައި ގައުމުތަކުން ވަނީ އިސްރާއީލާއެކު ވިޔަފާރިކުރުން ހުއްޓާލާފައެވެ. އަދި އަނެެއްބައި ގައުމުތަކުން ވަނީ އިސްރާއީލުގެ އުފެއްދުންތައް އެގައުމުތަކުގައި ވިއްކުންވެސް މަނާ ކޮށްފައެވެ.
އެހެންނަމަވެސް ދިވެހިރާއްޖެ ހިމެނިގެންދަނީ, އިސްރާއީލާ ދެކޮޅަށް މިހާތަނަށް އެއްވެސް ފިޔަވަޅެއް އަޅާފައި ނުވާ ހަމައެކަނި މުސްލިމް ގައުމު ކަމުގައެވެ. އަދި އިސްރާއީލާ ދެކޮޅަށް އެއްވެސް ފިޔަވަޅެއް މިސަރުކާރުން އަޅާފައި ނުވާތާގަ, މުއިއްޒު ގެންދަވަނީ އިސްރާއީލުގެ ގާތިލުންނަށް މިފަސްގަޑުގައި ޗުއްޓީ ހޭދަކުރުމުގެ މަގު ފަހިކޮށްދީ, މިފަސްގަޑުން މަރުހަބާވެސް ކިޔަމުންނެވެ.
ފަލަސްތީނު ޕާސްޕޯޓު މަނާކުރުމަށް ރައްޔިތުންގެ މަޖިލީހަށް ހުށަހެޅުނު ބިލު، ރައީސް މުއިއްޒުގެ އަމުރަށް މަޖިލިހުގެ ކޮމިޓީގައި ޕާކް ކޮށްފައި އޮންނަތާ މިހާރުވަނީ 90 ދުވަސް ފާއިތުވެގެން ގޮސްފައެވެ. އިސްރާއީލުގެ ގާތިލުން ރާއްޖެއަށް އެތެރެވުން މަނާކުރުމަށް ރައްޔިތުންގެ މަޖިލީހަށް ބިލެއް ހުށަހެޅުއްވީ ގަލޮޅު ދެކުނު ދާއިރާގެ މެމްބަރު މީކާއިލް ނަސީމުއެވެ.
މީކާއިލް ހުށަހެޅުއްވި ބިލު 241 ކޮމިޓީގައި އެޖެންޑާ ނުކޮށް ބާއްވާފައި އޮންނަތާ 90 ދުވަސް ވެގެންދިޔައިރުވެސް އެއްވެސް މަސައްކަތެއް ކުރިއަށް ނުގޮސް، އެންމެ ކުޑަމިނުން އެޖެންޑާވެސް ނުކުރާ ސަބަބު ސާފުކޮށްދެއްވުމަށް މީކާއީލް ނަސީމް މިހާރުވަނީ ރައްޔިތުންގެ މަޖިލީހަށް ސިޓީއެއްވެސް ފޮނުއްވާފައެވެ.
އެ ސިޓީގައި އޭނާ އެދިވަޑައިގެންފައިވަނީ މި ބިލުގެ މަސައްކަތް ކޮމިޓީގައި އެޖެންޑާ ނުކޮށް ބާއްވާ ސަބަބު ސާފުކޮށްދެއްވުމަށެވެ. މަޖިލީހުގެ ރައީސަށް ފޮނުއްވި ސިޓީގައި މީކާއީލް ފާހަގަކުރައްވާފައިވަނީ، މި ބިލް 29 މެއި 2024 ގައި މަޖިލީހަށް ހުށަހެޅި، އަދި 10 ޖޫން 2024 ވަނަ ދުވަހު މި ބިލް ބަލައިގަތުމަށް ފާސްވެސްކޮށް, ސަލާމަތީ ޚިދުމަތްތަކާބެހޭ ކޮމިޓީއަށް ފޮނުވާފައިވާ ކަމުގައެވެ.
މީކާއިލް އިސްލާހު ހުށަހަޅުއްވާފައިވަނީ ދިވެހިރާއްޖޭގެ އިމިގްރޭޝަންގެ ޤާނޫނަށް އިޞްލާޙު ގެނައުމަށެވެ.
އެހެންނަމަވެސް މީކާއިލްގެ ސިޓީއަށް މަޖިލިސް ރައީސްވެސް މިހާތަނަށް އެއްވެސް ޖަވާބެއް ދެއްވާފައެއް ނުވެއެވެ.
އޭގެ އިތުރަށް އިޒްރޭލުގެ ވިޔަފާރިތަކަށް ރާއްޖޭގައި މަގުފަހިކޮށްދީ، އެފަދަ ވިޔަފާރިތައް ހިންގުމުގެ މުއިއްޒުގެ ސަރުކާރުން ވަނީ ހުއްދަ ދީފައެވެ. އަދި ފަލަސްތީނަށް ތާއީދުކޮށް, އިސްރާއީލުގެ ގަތުލު އާންމާ ދެކޮޅަށް އަޑު އުފުލި އަންހެން ކަނބަލުންތަކެއް މުއިއްޒުވަނީ ހިފާ ހައްޔަރުކޮށް ޖަލަށްވެސް ލާފައެވެ. ފަލަސްތީނާއި އެއްކޮޅަށް އަޑު އުފުލައިގެން ރާއްޖޭގެ އެއްވެސް ވެރިކަމެއްގައި މިނޫނީ މިހާތަނަށް ދިވެހިން ހިފާ ހައްޔަރު ކޮށްފައި ނުވާކަން ފާހަގަ ކޮށްލެވެއެވެ.
މި ސަރުކާރުން ދަނީ ބޭރުގެ ބާރުތަކުގެ އުނގަށް ވެއްޓި, ރާއްޖޭގެ ދީނާއި މިނިވަންކަން ގުރުބާން ކުރަމުންނެވެ. އެގޮތުން ރައްޖޭގެ ކަނޑުގައި ޖާސޫސް ކުރުމުގެ ބާރު ޗައިނާއަށް ދޫކޮށް, އެމެރިކާއާއި ހުޅަނގުގެ ގައުމުތަކުގެ ނުފޫޒަށް ދީލާލައި, އިޒްރޭލުގެ ޕާސްޕޯޓު މަނާކުރުމަށް ދިވެހި ރައްޔިތުން އުފުލަމުންދާ އަޑުތަކަށް މުއިއްޒު ދަނީ ބީރުކަންފަތެއް ދެމުންނެވެ.
ހަގީގަތުގައިވެސް, ޣައްޒާގެ ރައްޔިތުންގެ އިހުސާސްތަކާއި, އެ ސިޓީގައި ހިންގަމުންދާ ގަތުލުއާންމުތަކަށް ދެލޯ މަރާލުމަށްފަހު, އިސްރާއީލުގެ ގާތިލުން ރާއްޖެއަށް ދޭ މަދު ފައިސާކޮޅެއްގެ ދަހިވެތިކަމުގައި, އެމީހުންނަށް ރާއްޖޭގެ ބޯޑަރުތައް ހުޅުވާލައިގެން މުއިއްޒުއަށް ކަހާތަން ހިރުވާވެސް ނުލާ ހުރެވެނީ އަގަލެއް ކުލުނެއް ނެތުމުންނެވެ.
ރާއްޖޭގައި ހިންގަމުންދާ އިޒްރާއީލުގެ ފުޑް ޗެއިންތަކުން ލިބޭ މަދު ފައިސާކޮޅެއްގެ ދަތިވެތިކަމުގައި އެތަންތަނަށް ފިޔަވަޅު ނާޅާ މުއިއްޒުއަށް ހުރެވެނީ ތިމާއަކީ އިންސާނިއްޔަތުކަމުގެ ކަންފުޅެއްވެސް ނެތް މީހަކަށް ވާތީއެވެ. މިއީ މުއިއްޒު ދީނާއި ގައުމަށްވަމުންދާ ބޮޑު ޚިޔާނާތެކެވެ.