ބޯހޯލް ތޮރުފައިގެން ތެޔޮ ހޯދާ ބޯޓު ރާއްޖެ އަތުވެއްޖެ އެވެ.
ރާއްޖެއިން ތެޔޮ ހޯދުމަށް ކުރާ މަސައްކަތުގެ ދެވަނަ މަރުހަލާ ކުރިއަށް ގެންދަން ބޯހޯލް ތޮރުފައިގެން ތެޔޮ ހޯދާ ބޯޓު ރާއްޖެ އައިސްފައި ވަނީ މިއަދު މެންދުރު 11:00 ޖަހާކަށް ހާއިރު އެވެ.
އިންޓަނޭޝަނަލް ރިސާޗް ޕްރޮގްރާމްގެ ދަށުން އެކި ގައުމުތަކުގެ ސައިންޓިސްޓުން ހިމެނޭ މި ބޯޓުގައި އެންމެ އިސްކޮށް ހަރަކާތްތެރި ވަނީ ޖިއޮލޮޖިކަލް ސާވޭ ހަދަން މިދިޔަ އޮގަސްޓުމަހު ރާއްޖެ އައި ޖަރުމަނުގެ "ސޮންނޭ" ބޯޓުގެ މާހިރެކެވެ.
އީއައިއޭ ހަދައިގެން އެ ބޯޓުން ބޯ ހޯލް ތޮރުފާނީ ބ. ގޮއިދޫގެ އެތެރެވަރިން ދެ ތިން ތަނެއްގައި ކަމަށް ފިޝަރީޒް މިނިސްޓްރީން ބުނެއެެވެ.
ފިޝަރީޒް މިނިސްޓްރީން ބުނީ، މިއަދު ރާއްޖެ އައި މި ބޯޓް ރާއްޖޭގައި ގާތްގަނޑަކަށް 15 ދުވަސް ހޭދަ ކުރާނެ ކަމަށެވެ.
ރާއްޖޭގެ ސަރަހައްދުގައި ތެޔޮ ހުރި ކަމަށް ބެލެވުނީ ރާއްޖޭގެ ސަރަހައްދުގެ ބިމުގެ އަޑީގައި އެފަދަ މީރު ފެނުގެ ކޯރެއް ހުރިކަން ހާމަވުމުން ކަމަަށް ފިޝަރީޒް މިނިސްޓަރު މުހައްމަދު ޝައިނީ މީގެ ކުރިން ވަނީ ވިދާޅުވެފައެވެ. އެގޮތުން ތެޔޮ ހޯދަން ނުވަތަ އުފެދެން ބޭނުންވާ ބަޔޮލޮޖިކަލް މާއްދާތައް ހިމެނެނީ އެފަދަ ކޯރުތަކުގައި ކަމަށް ވެސް މިނިސްޓަރު ވަނީ ވިދާޅުވެފައެވެ.
ތެޔޮ ހޯދުމުގެ މަސައްކަތަކީ ވަރަށް ބޮޑު ހަރަދެއްކޮށްގެން ކުރާ މަސައްކަތެއް ކަަމަށް މިނިސްޓަރު ވިދާޅުވި އެވެ. ނަމަވެސް ރާއްޖެއިން އެމަސައްކަތް ކުރަމުން މިގެންދަނީ ޖަރުމަންގެ ޖިއުލޮލިކަލް ސާވޭއެއް ކުރިއަށްގެންދާ ސައިޓިސްޓުންތަކަކާއި ގުޅިގެން އެއްވެސް ހަރަދެއް ނުދާ ގޮތަށް ކަމަށް ވެސް މީގެ ކުރިން މިނިސްޓަރު ވަނީ ވިދާޅުވެފައެވެ.