މާލޭގައި ދިރިއުޅޭ މީހުންނަށް ކުރިމަތިވެފައި މި ވަނީ ވަރަށް ބޮޑު މައްސަލައެކެވެ. މި ފަދަ ބޮޑު އާބާދީއެއް އޮތް ތަނެއްގައި އެއްގޮތަކަށް ވެސް ކުރިމަތިވެގެން ނުވާނެ ކަމަށް ގަބޫލުކުރެވޭ ހާދިސާ އެކެވެ. ދިރިއުޅުމަށް ކޮންމެހެން ބޭނުންވާ ފެނުގެ ހިދުމަތް ކެނޑި އެތައް ދުވަހެއް ވޭތުވުމަކީ މި ޒަމާނުގައި ބަލައިގަނެވޭ ވަރަށް ވުރެ ސީރިއަސް މައްސަލައެކެވެ. ހިދުމަތަށް އަގު ދައްކާ އާއްމުންނަށް ލިބުނު އަގު ނުކުރެވޭ ވަރުގެ ބޮޑު ގެއްލުމެކެވެ. އެހެންވީމާ ވަރަށް ބޮޑެތި ސުވާލުތައް އުފެދެ އެވެ. ކަސްޓަމަރުންގެ ހައްގުތައް ކޮބާ ހެއްޔެވެ؟ އެ މީހުންގެ މަސްލަހަތަށް ހިމާޔަތް ނުލިބުނީ ކީއްވެގެން ހެއްޔެވެ؟ ފެން ކުންފުންޏަށް ދިމާވި ހާދިސާއަކީ ފުރުސަތު ކުޑަ، ނުވަތަ ނާދިރު ކަމެއް ކަމަށް ވެދާނެ އެވެ. އެކަމަކު އެއީ ނުހިނގާނެ ކަމެއް ކަމަށް ބަލައިގެނެއް ނުވާނެ އެވެ. ސަބަބަކީ އެމްޑަބްލިޔުއެސްސީގެ މި ހިދުމަތަކީ ޒަރޫރީ ބޭނުމެކެވެ. މި އޮތް ބޮޑު އާބާދީ އަށް ފެން ފޯރުކޮށްދޭ ހަމައެކަނި ފަރާތަކީ ވެސް އެ ކުންފުންޏެވެ. އެއީ ވަރަށް ބޮޑު ޒިންމާއެކެވެ. މާލޭގެ 130،000 މީހުން ބަރޯސާ ވަނީ އެމްޑަބްލިޔުއެސްސީގެ ފެނަށެވެ. އެ ހިދުމަތަށް މި އެންމެން އަގު ދައްކަ އެވެ. އެހެންވީމާ އެ ކުންފުނިން ކުޑަ ތަންފުކެއް ވެސް ދޫކޮށްލާފައި އޮވެގެނެއް ނުވާނެ އެވެ. މި މައްސަލަ ދިމާވި ހިސާބުން ފެށިގެން އަދިވެސް އާއްމުން ކުރާ އެންމެ ބޮޑު ސުވާލަކީ ކުރިން ތައްޔާރުވެފައި ނެތީ ކީއްވެގެން ހެއްޔެވެ؟ ކޮންމެވެސް ކަހަލަ ކަންތައްތަކެއް ކޮށްފައި ހުރިކަން ދޭހަވެ އެވެ. އެހެން ނަމަވެސް މި ހާލަތުން އަރައިގަންނަން 14 ވަރަކަށް ދުވަސް އެބަ ނަގަ އެވެ. މާނައަކީ އެކަށީގެންވާ ފިޔަވަޅުތަކެއް ކުރިން އަޅާފައެއް ނެތެވެ. ހާއްސަކޮށް ސަރުކާރަށް ބޮޑު ހިއްސާ އޮތް ކުންފުންޏަކަށް ވާއިރު އެމްޑަބްލިޔުއެސްސީގެ ހިންގުމާ މެދު އާއްމުން ކުރާ ސުވާލުތައް ހުއްޓުމަކަށް ނާންނާނެ އެވެ. ކަސްޓަމަރުންނަށް ލިބުނު ގެއްލުމާ މެދު ކުންފުނިން ބުނަނީ ކީކޭ ހެއްޔެވެ؟ ޒިންމާ ނަގަނީ ކިހާ ވަރަކަށް ހެއްޔެވެ؟ ސަރުކާރުގެ އެހީގައި ފެނުގެ ހިދުމަތް އަލުން ފެށުމަކުން އަދި ނުފުދެ އެވެ. ތަރައްގީވަމުން އަންނަ ގައުމަކަށް ދާދި ފަހުން ބަދަލުވިޔަސް، ރާއްޖޭގެ ވަރަށް ގިނަ ކަންކަން އަދިވެސް ހުރީ ބޮއްސުންލާފަ އެވެ. ހިދުމަތްތަކުގެ ފެންވަރު އިންތިހާ އަށް ދަށެވެ. ކިތަންމެ ހިތްހަމަނުޖެހުނަސް ބޮޑެތި އަގުތައް ދައްކަން ޖެހެ އެވެ. ދެން ދިމާވަނީ މިކަހަލަ ކުދި ބޮޑު ހާދިސާތަކެވެ. މަޖުބޫރީ ހާލަތްތަކެވެ. ހިދުމަތް މެދުކެނޑުމެވެ. ދައްކާ އަގާ އަޅާކިޔާ އިރު ހިދުމަތުގެ ފެންވަރު ދަށްވުމެވެ. އާއްމުންނަށް ކުރެވޭނެ ކަމެއް ނޯވެ އެވެ. ކިތަންމެ ހިތްހަމަނުޖެހުނަސް، މާޔޫސް ވިޔަސް، ރުޅި އަޔަސް ކެތްކޮށްލައިގެން ތިބެންވީ އެވެ. ހިދުމަތް ހޯދާ މީހުންނަށް ރައްކާތެރިކަމެއް އަދި ޔަގީންކަމެއް ނެތްތާ ގެއްލުމުގެ ބަދަލު ލިބޭނެ ގޮތެއް ވެސް ނޯވެ އެވެ. ކަސްޓަމަރުގެ މަސްލަހަތަށް ވުރެ ބޮޑީ ކުންފުނިތަކުގެ މަސްލަހަތެވެ. ވިޔަފާރީގެ އުސޫލުން ދޭ ހިދުމަތްތައް ވަރަށް ހަރުދަނާ އުސޫލަކުން ރެގިއުލޭޓްކުރަން ޖެހެ އެވެ. އެއީ ސަރުކާރު ހިއްސާވާ ކުންފުންޏަކަށް ވިޔަސް ނުވަތަ އަމިއްލަ ވިޔަފާރިއަކަށް ވިޔަސް، ހިދުމަތް ހޯދާ މީހުންނަށް ފުރިހަމަ ރައްކާތެރިކަން ގާނޫނުތަކާއި ގަވާއިދުތަކުން ކަށަވަރުކޮށްދޭން ޖެހެ އެވެ. އެއީ ސަރުކާރުގެ ޒިންމާއެކެވެ. ހިދުމަތް ދިނުމުގައި ވަކި މިންގަނޑުތަކެއް ގެންގުޅެން ޖެހޭނެ ކަން އަދި ވަކި ކަހަލަ ކަންތައްތަކެއް ފުރިހަމަކުރުން މަޖުބޫރުކަން ކަނޑައަޅަން ޖެހެ އެވެ. އަދި އެ ގޮތަށް އަމަލުކުރޭތޯ ގަވާއިދުން ބަލަން ވެސް ޖެހެ އެވެ. އެހެން ނޫނީ ކިތަންމެ ބޮޑު ގެއްލުމެއް އާއްމުންނަށް ލިބުނަސް ވިިޔަފާރިތައް ޒިންމާދާރުކުރެވޭނެ ގޮތެއް ނޯންނާނެ އެވެ.