މިއަދު އެމްވީޔޫތު އޮންލައިންއިން ގެނެސްދިން ހަބަރެއް ދޮގުކުރުމަށްފަހު އެމްވީޔޫތަށް ބަހުގެ ހަމަލާތަކެއް އުމަރު ޓީމުގެ ފަރާތުން މިރޭ ބޭއްވި ކެމްޕެއިން ޖަލްސާގައި އަމާޒުކޮށްފި އެވެ.
މިރޭ އުމަރު ޓީމުގެ ފަރާތުން އާޓިފިޝަލް ބީޗުގައި ބޭއްވި ޖަލްސާގައި ވާހަކަދައްކަވަމުން އެޕާޓީގެ ޒުވާނުންގެ ގޮފީގެ ރައީސް އަދި ޓްރާންސްޕޯޓް މިނިސްޓްރީގެ ރެޖިސްޓްރާ އިބްރާހިމް ނާޒިމް ވިދާޅުވީ މިއަދު އެމްވީޔޫތު އޮންލައިންއިން ގެނެސްދިން ހަބަރުގައި އޭނަ ދެއްކި ވާހަކަތަކެއް ކަމަށް ބުނެ ހިމަނާފައިވާ ވާހަކަތަކަކީ ދޮގު ވާހަކަތަކެއް ކަމަށާއި އެމްވީޔޫތު ހަބަރުގައި ހުރީ އޭނާ ދެއްކި ވާހަކަތަކެއް ނޫން ކަމަށެވެ.
ޕީޕީއެމްގެ ރައީސް އަލްއުސްތާޒް މައުމޫން އަބްދުލްގައްޔޫމް އައްޑޫއަށް ކުރެއްވި ދަތުރުފުޅަކަށް ހަރަދުކުރައްވަން ސަރުކާރުގެ އިސް ބޭފުޅަކު އުމަރު ނަސީރާއި ހަވާލުކުރެއްވި ފައިސާތަކެއް މިއަދާއި ހަމައަށް ވެސް ޕާޓީ އާއި ހަވާލުކޮށްފައިނުވާ ކަމަށް ބުނާ ވާހަކަތަކެއް ފެންމަތިވުމާއި ގުޅިގެން އެމްވީޔޫތަށް މައުލޫމާތުދެމުން ނާޒިމް ދެއްކެވި ވާޙަކަ އެމްވީޔޫތުގައި ގެނެސްދީފައިވަނީ އެއްވެސް ބަދަލުކުރުމެއް ނެތި ކަމުގެ ޔަގީންކަން އެމްވީޔޫތު ކިޔުންތެރިންގެ މައުލޫމާތަށްޓަކައި ދަންނަވަމެވެ.
އަދި އެވާހަކައިން އުނިކޮށްފައިވަނީ އެކަމާއި ގުޅުމެއް ނެތް ވާހަކަތަކެއް ގޮތުގައި ނާޒިމް ދެއްކެވި ވާހަކަ އެވެ.
ނާޒިމް ދެއްކެވި ވާހަކައިން އުނިކޮށްފައިވަނީ އެޕާޓީގެ ޑެޕިއުޓީ ސްޕޯކްސްޕާސަން އިބްރާހިމް މުއާޒް އަލީގެ މައްސަލަތަކެއް ޕީޕީއެމްގެ ސުލޫކީ ކޮމިޓީއަށް ހުށަހަޅަން އޭނާ ނިންމާފައިވާކަމަށް ބުނި ވާހަކަތަކެކެވެ. އޭރު އެމްވީޔޫތުން ނިންމާފައިވަނީ މުއާޒްގެ ބަހެއް ވެސް ހޯދައިގެން އެ ހަބަރު ވަކި ހަބަރެއްގެ ގޮތުގައި ގެނެސް ދިނުމަށެވެ.
ނާޒިމް ވިދާޅުވީ ޕީޕީއެމްގެ ޑެޕިއުޓީ ސްޕޯކްސްޕާސަންގެ ގޮތުގައި ހުންނެވި މުއާޒް ޓުވިޓާގައި ވަރަށް ހަޑި ހުތުރު ބަހުން އުމަރު ނަސީރުގެ ޓީމާއި ދިމާލަށް އެއްޗެހި ކިޔާފައިހުރި ޓުވީޓުތަކެއް ހުންނާނެ ކަމަށާއި އެމައްސަލަ ސުލޫކީ ކޮމިޓީއަށް ވެއްދުމަށް ޑޮކިއުމަންޓުތައް ތައްޔާރުކޮށްފައި ހުންނާނެ ކަމަށެވެ.
ނަމަވެސް ދެން ހުރި ވާހަކަތައް ގެނެސްދީފައިވާނީ އެއްވެސް ބަދަލުކުރުމެއް ނެތި އެވެ. މިއަދު އެމްވީޔޫތަށް މައުލޫމާތުދެމުން ނާޒިމް ވަނީ އުމަރާއި ގުޅިގެން ދެކެވުނު ފައިސާގެ ވާހަކަތައް ދޮގުކުރައްވާފައެވެ.
ނާޒިމް ވިދާޅުވީ ފައިސާގެ ވާހަކަތަކަކީ އިންތިހާބު ކައިރިވުމުން ވާދަވެރި ބަޔަކު ދައްކާ މަޖާ ވާހަކައެއް ކަމަށާއި އެކަމުގައި އެއްވެސް ކަހަލަ ހަގީގަތެއް އެކުލެވޭ ކަމަށް ގަބޫލނުކުރެއްވޭ ކަމަށެވެ.
“އުމަރު ނަސީރު ފަސް ލައްކަ ރުފިޔާގައި ޖެހުނު ވާހަކަ ބުނީ އަޅުގަނޑަށް ވަރަށް ޖޯކް ވާހަކައެއް ތިއީ، އަޅުގަނޑުމެން ބޭއްވި ކޮންމެ މުޒާހަރާއަކަށް ވެސް 50،000 ހަރަދުވި، މުޒާހަރާތަކަށް ހަރަދުކުރީ އުމަރު ނަސީރު އަމިއްލައަށް.” ނާޒިމް ވިދާޅުވި އެވެ.
އޭނާ ވިދާޅުވީ އުމަރު ނަސީރު ހިޔާނާތްތެރިވެވަޑާއިގެންނެވީ ފަސް މިލިއަން ރުފިޔާއަށް ކަމަށް ބުނި ނަމަ ގަބޫލުކުރަން ތަންކޮޅެއް ފަސޭހަވީސް ކަމަށެވެ.
މިރޭގެ ޖަލްސާގައި އުމަރު ނަސީރު ވެސް ވަނީ ރާއްޖޭގައި ބަޔަކު ވަގު ސައިޓުތަކެއް ހަދައިގެން ދޮގު ވާހަކަތަކެއް ފަތުރަމުންދާ ކަމަށް ވިދާޅުވެފައެވެ. އެއްވެސް ސައިޓެއްގެ ނަން ވިދާޅުނުވެ އުމަރު ވިދާޅުވީ އެފަދަ ސައިޓުތަކުން ދޮގު ވާހަކަތައް ފަތުރަނީ ގޮތް ހުސްވުމުން ކަމަށެވެ.