އުމަރު ނަސީރު ޕީޕީއެމުން ވަކިކޮށްފައިވާތީ އެޕާޓީއާއި ދެކޮޅަށް އޭނާ ކޮށްފައިވާ ދައުވާގެ އަޑުއެހުންތައް ނިންމާލައިފިއެވެ.
އެމައްސަލައާއި ގުޅިގެން މިއަދު ބޭއްވި އަޑުއެހުމުގައި ޕީޕީއެމުންވަނީ އުމަރުގެ ދައުވާއަށް ޖަވާބުދާރީވުމުގެ ގޮތުން ހުލާސާ ބަޔާން އިއްވާފައެވެ. މިއަދުގެ އަޑުއެހުން ނިންމާލާފައިވަނީ މިމަހުގެ 27 ގައި އެމައްސަލައިގެ ހުކުމް އިއްވާނެކަން އިއުލާނު ކުރުމަށްފަހުއެވެ.
ޖާގަ ނުލިބުމުގެ ސަބަބުން މިއަދުގެ އަޑުއެހުމަށް އެއްވެސް ނޫސްވެރިއަކަށްވަނީ ވަދެވޭ ގޮތް ނުވެފައެވެ.
ޕީޕީއެމާއި ދެކޮޅަށް އުމަރު ދައުވާ އުފުލާފައިވަނީ ޕްރައިމަރީގައި ޕާޓީގެ ދަފްތަރުގައި ރަޖިސްޓްރީކޮށްފައި ނުވާ ފަރާތްތަތަކަކަށް ވޯތު ލުމުގެ ފުރުސަތު ދީފައިވާތީ ޕްރައިމަރީ ބާތިލުކޮށް ދިނުން އެދިއެވެ.
އެމައްސަލާގައި އުމަރުވަނީ ޕީޕީއެމްގެ ޕްރައިމަރީއާއި ގުޅިގެން ދެން ހިނގަމުންދާ ކަންތައްތައް ހުއްޓުވުމަށާއި އޭނާއަށް ތާއިދު ކުރާ ފަރާތްތައް އެޕާޓީން ވަކިކުރުން ހުއްޓުވުމަށް ވަގުތީ އަމުރަކަށް އެދިފައެވެ. ނަމަވެސް ކޯޓުން އެއަމުރު ދީފައެއް ނުވެއެވެ.
އުމަރުގެ ދައުވާއަށް ޕީޕީއެމުންވަނީ އިންކާރުކޮށްފައެވެ. އަދި ޕާޓީގެ އެތެރޭގެ އިޖުރާއަތުތައް ފުރިހަމަކޮށްފައި ނުވާތީ އޭނާއަށް އެދައުވާ ނުކުރެއްވޭނެ ކަމަށް ވެސް ޕީޕިއެމުންވަނީ ބުނެފައެވެ. އަދި ޕްރައިމަރީގައި ރަޖިސްޓްރީކޮށްފައި ނުވާ ބަޔަކަށް ވޯޓުލުމުގެ ފުރުސަތު ދީފައި ނުވާނެ ކަމަށާއި ޕްރައިމަރީގައި ވޯޓުލުމުގެ ފުރުސަތުދީފައިވަނީ 28 ފެބްރުއަރީގެ ނިޔަލަށް ޕާޓީގައި ރަޖިސްޓްރީވީ މީހުންނަށް އެކަނި ކަމަށް ޕީޕީއެމުންވަނީ ބުނެފައެވެ.