ދައުރުން ބޭރުގައި ބާއްވާ ރައްޔިތުންގެ މަޖިލީޙުގެ ދެވަނަ ޖަލްސާ މިއަދު ހަވީރު 5:45 ގައި ބާއްވަން ތާވަލް ކޮށްފިއެވެ.
މިއަދު ހަވީރު 4:00 ގައި ޖަލްސާ ބައްވާން މެމްބަރުންނަށް ކުރިން އަންގާފައި ވީނަމަވެސް، ޖަލްސާ ނުފެށި ވަނީ ލަސްވެގެން ގޮސްފައެވެ. ލަސްވާ ސަބަބެއް މަޖިލީހުގެ އިދާރާއިން ހާމަ ކޮށްފައެއް ނުވެއެވެ. ނަމަވެސް، ޖަލްސާ ނުފެށި ލަސްވެގެންދަނީ ގައުމީ ސަލާމަތުގެ ކޮމިޓީގެ ބައްދަލުވުމެއް ކުރިއަށްދާތީ ކަމަށް ވެއެވެ.
5:45 ގައި ޖަލްސާ ފަށާނޭ ކަމަށް ބުނެ، ޖަލްސާގެ އެޖެންޑާ މަޖިލީހުގެ ވެބްސައިޓްގައި ވަނީ ޝާއިއު ކޮށްފައެވެ.
އެޖެންޑާގައި ވަނީ، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 253 ވަނަ މާއްދާއިން ލިބިދޭ ބާރުގެދަށުން ކުއްލި ނުރައްކަލުގެ ހާލަތު އިޢްލާން ކުރެއްވުމަށް ރައީސުލްޖުމްހޫރިއްުޔާ ނެރުއްވާފައިވާ ގަރާރު ނަންބަރު 3/2018 ގަރާރާއި، އެ ގަރާރަށް އިސްލާހް ގެންނަވައި ނެރުއްވި ގަރާރު ނަންބަރު 4/2018 އާއި، އަދި ގަރާރު ނަންބަރު 5/2018 އަދި އެގަރާރުތަކާ ގުޅިގެން 18 ފެބްރުއަރީ 2018ގައި ރައީސުލްޖުމްހޫރިއްޔާ ފޮނުއްވާފައިވާ މައްސަލަ ގައުމީ ސަލާމަތުގެ ކޮމިޓީން ދިރާސާކުރައްވައި ނިންމެވި ގޮތުގެ ރިޕޯޓް އިއްވުމެވެ.