އައްޑޫ ސިޓީގެ ކަރަންޓުގެ މައްސަލައަށް ވަރަށް އަވަހަށް ވަގުތީ ހައްލެއް ލިބިގެން ދާނެކަމަށް އެ ސިޓީއަށް ކަރަންޓް ފޯރުވައިދޭ ފެނަކަ ކޯޕަރޭޝަން އިން ބުނެފިއެވެ.މިކަމާއި ގުޅޭ ގޮތުން ފެނަކަ ކޯޕަރޭޝަންގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެ ކޯޕަރޭޝަންގެ  ޗީފް ޓެކްނިކަލް އޮފިސަރ ހުސެއިން ހަމީޒް ވިދާޅުވީ އައްޑޫ ސިޓީގައި ފެނަކަ ކޯޕަރޭޝަން ލިމިޓެޑުން ދެމުންދާ ކަރަންޓަށް މިވަގުތު ދިމާވެފައިވާ ކަރަންޓު ކެނޑުމުގެ މައްސަލައަށް ވަގުތީ ހައްލެއް ވަރަށް އަވަހަށް ލިބިގެން ދާނޭ ކަމަށެވެ.އަދި މިކަމަށް ދާއިމީ ހައްލަކަށް މަސައްކަތް ކުރައްވަމުން ގެން ދަވާކަމަށް އޭނާ ވިދާޅުވިއެވެ. ހަމީޒް ވިދާޅުވި ދޭއް ޕޮއިންޓް ހަތަރެއްގެ 2 ޖަނަރޭޓަރު މިހާރުވަނީ އެ ސިޓީއަށް ފޮނުވާފަކަމަށާއި މި ޖަނަރޭޓަރުތައް އިންސްޓޯލް ކުރުމަށްޓަކައި އިންޖީނުގެ ބޮޑުކުރުމާއި ޖަނަރޭޓަރުތައް އިންސްޓޯލް ކުރުމަށް ބޭނުންވާ ސީ ވޯޓަރ ކޫލިންގ ސިސްޓަމް ގާއިމްކުރުމުގެ މަސައްކަތް މިހާރު ކުރިއަށްދާކަމަށެވެ. އަދި އެމަސައްކަތުގެ 50 އިންސައްތަ މިހާރު ނިމިފައިވާ ކަމަށް ވެސް ހަމީޒް ވިދާޅުވިއެވެ. ފެނަކަ ކޯޕަރޭޝަން އިން ބުނީ ކަރަންޓުގެ މައްސަލައަށް ވަގުތީ ހައްލެއް ހޯދާދިނުމަށްޓަކައި އެކެއް މެގަވޯޓްގެ ޖަނަރޭޓަރަކާއި އެކެއް ޕޮއިންޓް ދޭއް ގެ ޖެނަރޭޓަރެއް މިމަހުގެ އަށްވަނަ ދުވަހުވަނީ އައްޑޫސިޓީއަށް ފުރުވާލެވިފަ ވާއިރު ޖަނަރޭޓަރުތަށް 12 އޮކްޓޯބަރ ގައި އައްޑޫސިޓީއަށް ފޯރާނެކަމަށް ލަފާކުރެވޭ ކަމަށެވެ.އަދި ޖަނަރޭޓަރުތައް ހިފައިގެންދިޔަ ލޭންޑިންގ ކްރާފްޓް މިވަގުތު އޮތީ ލ. މާބައިދޫގަ ކަމަށާއި މޫސުން ތަންނުދޭތީ ލަސްވަމުން ދާކަމަށް އޭނާ ވިދާޅުވިއެވެ. އަދި 15 އޮކްޓޯބަރ އަށް މުޅި މައްސަލައަށް ވަގުތީ ހައްލު ލިބި ކަރަންޓުދެވޭނެ ކަމަށް ހަމީޒް ވިދާޅުވިއެވެ.މީގެ އިތުރުން ހަމީޒް ވިދާޅުވީ ހުރިހާކަމެއް ނިމި މިއަހަރު ޑިސެމްބަރ ގައި  އައްޑޫ ސިޓީގެ ކަރަންޓް ކެނޑުމުގެ މައްސަލައަށް ދާއިމީ ހައްލެއް ލިބިގެންދާނެކަމަށެވެ. އައްޑޫ ސިޓީގައި ފެނަކަ ކޯޕަރޭޝަން ލިމިޓެޑުން ދެމުންދާ ކަރަންޓަށް މިވަގުތު ދިމާވެފައިވާ ކަރަންޓު ކެނޑުމުގެ މައްސަލައަށް ހައްލުހޯދުމަށް މަސައްކަތް ކުރަމުންދާއިރު އެސިޓީގެ ރައްޔިތުން ދައްކަމުން އަންނަ ކެތްތެރިކަމުގެ ރިވެތި ނަމޫނާ ފާހަގަކުރައްވާ އައްޑޫސިޓީގެ ރައްޔިތުންނަށް ވަނީ ހަމީޒް ޝުކުރު އަދާ ކުރައްވާފައެވެ.