އެހެން ދީންތައް އައުމަށް އެދޭ ނަމަ ރައްޔިތުން އެމްޑީޕީއަށް ވޯޓުދިނުމަށާއި ރާއްޖޭގައި ހަމައެކަނި އިސްލާމްދީން ދެމެހެއްޓުމަށް ބޭނުންވާނަމަ ޕީޕީއެމްގެ ރިޔާސީ ކެންޑިޑޭޓު އަބްދުﷲ ޔާމީނަށް ވޯޓުދެއްވުމަށް ޕީޕީއެމްގެ ކުރީގެ ނައިބު ރައީސް އުމަރު ނަސީރު ވިދާޅުވެއްޖެ އެވެ.
ކާނިވާ ސަރަހައްދުގައި ރޭ ބޭއްވި ޖަލްސާގައި ވާހަކަދައްކަވަމުން އުމަރު ވިދާޅުވީ އޭނާ ނިކުމެ ހުރީ މިގައުމު ސަލާމަތްކޮށްދިނުމަށް ކަމަށާއި "ދުޝްމަން ނަންބަރު 1" ނޯޅޭ ކަމަށެވެ. އަދި "އަޅުގަނޑުމެންގެ އިސްލާމް ދީނުގެ އަދުއްވަކީ ކާކުކަން ނޯޅޭ" ކަމަށް ވެސް ކުރީގެ ރައީސް މުހައްމަދު ނަޝީދަށް އިޝާރާތްކުރައްވާ އުމަރު ވިދާޅުވި އެވެ.
"ސިޔާސީ ވާދަވެރިކަމަށްވުރެ ކުރިއަށް އަޅުގަނޑުމެންގެ ގައުމު އިސްކުރަން ޖެހޭނެކަން އަޅުގަނޑަކަށް ނޯޅޭ، މިއީ މިގައުމު ދެކެ ލޯބިވާ އިސްލާމް ދީން މިގައުމުގައި އޮތުމަށް އެދޭ ކޮންމެ މީހެއްގެ ވަގުތު، މިވަގުތު އަޅުގަނޑުމެން އެންމެން ނިކުމެ ގުޅިގެން މި މަސައްކަތް ނުކޮށްފިއްޔާމުން އޭގެ ފަހުން ނިކުންނަ ހިތި ނަތީޖާގެ ޒިންމާ އެބަޔަކު އުފުލަން ޖެހޭނެ، އެބަޔަކު ހިތާމަކުރަން ޖެހޭނެ، އޭގެ ފަހުން އެބަޔަކު ބުނެގެން ނުވާނެ ތިމަންނާއަށް އެ މަސައްކަތުގައި ބައިވެރިނުވެވުނު ނަމަ ކިހާ ރަނގަޅުހޭ." އުމަރު ވިދާޅުވި އެވެ.
އުމަރު ވިދާޅުވީ ދީން ހިމާޔަތްކުރުމަށާއި އެހެން ދީނެއް މިގައުމަށް އަޔަ ނުދިނުމަށް އިސްލާމް ދީން މިއަދު އެބަ އެދިގޮވާ ކަމަށާއި އެއް ދީނެއްގައި އުޅުމަށް އެންމެ ބޮޑަށް ގޮން ޖެހޭ ދުވަހަކީ ހޮނިހިރު ދެވޭ ވޯޓު ކަމަށެވެ.
އަދި އެދުވަހުދޭ ވޯޓަކީ ހަމައެކަނި ޕީޕީއެމަށްދޭ ވޯޓު ނޫން ކަމަށާއި އެއީ މިގައުމުގައި އިސްލާމް ދީން އޮންނަން ނުވަތަ ނޯންނަން ދެވޭ ވޯޓެއް ކަމަށް ވެސް އޭނާ ވިދާޅުވި އެވެ.
"މިގައުމުގައި އޮންނަން އެދެނީ ހަމައެކަނި އިސްލާމް ދީން ކަމުގައިވާނަމަ އަޅުގަނޑުމެންގެ ކެންޑިޑޭޓަށް ވޯޓުދެއްވާ، މިގައުމަށް އެހެން ދީންތައް އަންނަން އެދޭނަމަ އެމްޑީޕީއަށް ވޯޓުދެއްވާ، މިގައުމުގެ ހަރުމުދާތައް ދިވެހިންގެ އަތުގައި ބާއްވަން ތިޔަބޭފުޅުންގެ އަތުގައި ބާއްވަން އެދޭނަމަ އަޅުގަނޑުމެންގެ ކެންޑިޑޭޓަށް ވޯޓުދެއްވާ، މިގައުމުގެ ހަރުމުދާތައް އަވަށްޓެރި ގައުމުތަކަށް ވިއްކާ އެމީހުންގެ ޖީބަށް ވެއްޓި ގޮނޑި ކޮއްކޮ ސަރުކާރެއް ގާއިމުކުރަން އެދޭނަމަ މުހައްމަދު ނަޝީދަށް ދެއްވާ ވޯޓު." އުމަރު ވިދާޅުވި އެވެ.
އުމަރު އިތުރަށް ވިދާޅުވީ ހޮނިހިރުވަހު ބާއްވާ އިންތިހާބުގައި އައްޔަކަސް އަނދިރިޔަކަސް ހެވޭ ބުނެގެން ނުވާނެ ކަމަށާއި ރައްޔިތުން ބުނަން ޖެހޭނީ ޔާމީނަށް އާއެކޭ ކަމަށެވެ. އަދި މުހައްމަދު ނަޝީދަށް ވޯޓުދީފިނަމަ މިގައުމުގެ މިނިވަންކަން ގެއްލޭނެކަން ޔަގީންކުރައްވާ ކަމަށް ވެސް އުމަރު ވިދާޅުވި އެވެ.