ކުރިއަށް އޮތް ރަމަޟާން މަހު ގދ. ތިނަދޫގައި ކުޅިވަރާއި މުނިފޫހިފިލުވުމުގެ ހަރަކާތްތައް އެއްވެސް މިންވަރަކަށް އިންތިޒާމްކޮށްގެން ބޭއްވުން ކައުންސިލުން މަނާކޮށްފިއެވެ.
"ރަމަޝާން މަހުގެ ހުރިހާ ކަމެއް އަޅުކަމަށް މަގުފަހި ކުރުވުން" ނަމުގައި ތިނަދޫ ސިޓީ ކައުންސިލުން ވަނީ އިއުލާނެއް ނެރެފައެވެ.
އިއުލާނުގައި ބުނެފައިވަނީ އެހެން އަހަރުތަކެކޭ އެއްފަދައިން މި އަހަރުގެ ރޯދަ މަހަކީ ރައްޔިތުންގެ މެދުގައި އިސްލާމީ ރިވެތި އާދަކާދައާއި އުސޫލުތައް އާލާވާން ފުރުސަތު ފަހިވާ ހާއްސަ ދުވަސް ތަކަކަށް ހެދޭތޯ ކައުންސިލުން އަދާކުރަންޖެހޭ ދައުރު އަދާކުރާނެ ކަމަށެވެ.
އެހެންކަމުން ރައްޔިތުން ޚާއްސަ ސަމާލުކަން ދޭން ޖެހޭ ކަންކަން އިއުލާނުގައި ވަނީ ފާހަގަކޮށްފައެވެ.
ތިނަދޫ ކައުންސިލުން ވަނީ ދުވާލުގެ ވަގުތުވެސް، އަދި ހާއްސަކޮށް ރޭގަނޑުގެ ވަގުތުތަކަށް އެއްވެސް ބާވަތެއްގެ ކުޅިވަރު ހަރަކާތްތަކެއް ނުވަތަ މުނިފޫހި ފިލުވުމުގެ ހަރަކާތްތަކެއް އެއްވެސް ބަޔަކު އެއްވެސް މިންވަރަކަށް އިންތިޒާމްކޮށް ހިންގުން މަނާކޮށްފައެވެ.
ރަސްމީ އަދި ނުރަސްމީ ޓީމުތަކާއި ގްރޫޕްތަކުން ވެސް ރޯދަ މަހާ ކުރިމަތިލާއިރު އެ މަހުގެ މަގްސަދު ހާސިލުކޮށްދިނުމަށް އެކަކު އަނެކަކަށް މަގުފަހި ކުރެވޭނޭހެން ކަންކަން ތަރުތީބުކޮށް އިންތިޒާމް ކުރުމަށް ހާއްސަ ސަމާލު ކަމެއް ދިނުމަށާއި ނަމާދުތަކުގެ ވަގުތުތަކާއި، ރޯދަވީއްލުމުގެ ވަގުތުތަކަށް ފުށު ނާރާނެހެން، އަދި އެއްވެސް މީހަކަށް ދަތިނުވާނެހެން ރަސްމީ ތަންތަނުގެ ޑިއުޓީތަކާއި އެހެނިހެން ރަސްމީ އަދި ނުރަސްމީ ކަންކަން އިންތިޒާމް ކުރުމަށް އިއުލާނުގައި ބުނެފައިވެއެވެ.
މީގެއިތުރުން، އިޖުތިމާއީ ހަރަކާތްތައް ހިންގުމަށް ދޫކޮށްފައިވާ ތަންތަނުގައި ކުޅިވަރާއި މުނިފޫހި ފިލުވުމުގެ ހަރާކާތްތައް އާއްމުކޮށް ހުޅުވާލައިގެން ނުވަތަ އެނޫންގޮތަށް ވިޔަސް ނުބޭއްވުމަށާއި ރޯދައާ ގުޅުންހުރި ހަރަކާތެއް ރޭވިޔަސް، އެކަމެއް ދުރާލާ ރާވައި، ގުޅުންހުރި ހުރިހާ ފަރާތްތަކަށް އަންގައި، އަޅުކަމުގެ ވަގުތުތަކަށް ދަތިނުވާނެހެން އިންތިޒާމު ކުރުމަށް ވެސް ކައުންސިލުން އަންގާފައިވެއެވެ.
ތިނަދޫ ކައުންސިލުން ބުނީ އެ ކަންކަން ކުރިޔަށް ގެންދިއުމަށްޓަކައި އެއްބާރުލުން ނުދޭ ފަރާތްތަކާއި ގަސްތުގައި އެ އުސޫލުތަކާއި ހިލާފަށް އަމަލުތައް ބަހައްޓާ ފަރާތްތަކަށް އެއިން އެއްވެސް ކަމެއްގައި ކައުންސިލުގެ އެއްބާރުލުން ނުލިބޭނެ ކަމަށެވެ.
އިއުލާނުގައި ބަޔާންކޮށްފައިވާ ކަންކަމާ ހިލާފަށް އަމަލުތައް ބަހައްޓާ ފަރާތްތަކާމެދު ފިޔަވަޅު އަޅަން ޖެހޭ ހާލަތުގައި އެކަން ކުރާނެ ކަމަށް ވެސް ވަނީ ބުނެފައެވެ.