މާޝަލް ގާނޫނު އިއުލާނު ކުރުމަކީ ބަގާވާތެއް ކަމަށް ކަނޑައަޅައި ދެކުނު ކޮރެއާގެ މަގާމުން ދުރުކޮށްފައިވާ ރައީސް ޔޫން ސުކް ޔޯލްގެ މައްޗަށް ދައުވާ އުފުލައިފި އެވެ.
އަސްކަރީ ވެރިކަމެއް ހިންގުމަށް އޭނާ ކުރެއްވި ނުބައި މަސައްކަތުގެ ސަބަބުން ގައުމު ހީ ވެސް ނުކުރާ ފަދަ ސިޔާސީ ހަލަބޮލިކަމެއްގެ ތެރެއަށް ވެއްޓި، އޭނާ ވެފައިވަނީ ދެކުނު ކޮރެއާގެ ތާރީހުގައި ވެސް ކުށެއްގެ ދައުވާ އުފުލި ފުރަތަމަ ރައީސަށެވެ.
އެ ދައުވާ އުފުލާފައި މިވަނީ މިދިޔަ ހޮނިހިރު ދުވަހު ޔޫންގެ ބަންދުގެ މުއްދަތު އިތުރުކޮށްދިނުމަށް ސޯލްގެ ކޯޓަކުން ހުށަހެޅި މައްސަލަ ބަލައިނުގަތުމާ ގުޅިގެންނެވެ. އޭގެ މާނައަކީ މިއަދުގެ ކުރިން އޭނާގެ މައްޗަށް ދައުވާ ކުރުމާ މެދު ނުވަތަ ދޫކޮށްލުމާ މެދު ޕްރޮސެކިއުޓަރުން ގޮތެއް ނިންމަން މަޖުބޫރުވުމެވެ.
"ބަގާވާތުގެ ރިންގްލީޑަރަށް އަދަބު ދިނުން އެންމެ ފަހުން މިހާރު ފެށެނީ،" އިދިކޮޅު މައި ޑިމޮކްރެޓިކް ޕާޓީގެ ތަރުޖަމާނު ހާން މިން-ސޯ ނޫސްވެރިންގެ ބައްދަލުވުމެއްގައި ވިދާޅުވި އެވެ.
ޔޫންގެ ވަކީލުންގެ ޓީމުން ވަނީ ދައުވާއަށް ވަރަށް ބޮޑަށް ފާޑުކިޔައި "ތަހުގީގުގައި ގާނޫނާ ހިލާފަށް ހިންގާފައިވާ ކަންކަން ހާމަ ކުރާނެ ކަމަށް" ވައުދުވެފަ އެވެ.
"ޕްރޮސިކިއުޝަނުން ވަނީ ވަރަށް ބޮޑު ގޯހެއް ހަދާފައި،" ޔޫންގެ ވަކީލުންގެ ޓީމުން ބުންޏެވެ.
ދެކުނު ކޮރެއާގައި ބަގާވާތުގެ ކުށަކީ އުމުރަށް ޖަލަށްލުން ނުވަތަ މަރުގެ އަދަބެވެ. ނަމަވެސް އެ ގައުމުގައި މަރުގެ ހުކުމް ތަންފީޒު ނުކުރާތާ ވަނީ އެތައް ޒަމާނެއްވެފަ އެވެ.
ވަކިން ވަކިން ދުސްތޫރީ ކޯޓުން ވަނީ ޔޫން ރަސްމީކޮށް ރައީސް ކަމުން ވަކިކުރާނީތޯ ނުވަތަ އޭނާ އަލުން މަގާމުގައި ބަހައްޓާނީތޯ ނިންމުމަށް މަޝްވަރާ ކުރަން ފަށައިފަ އެވެ.
އަޒުލުކުރި ރައީސް ވަނީ މާޝަލް ލޯ އިއުލާނާ ގުޅިގެން ޖިނާއީ ތަހުގީގަށް އެއްބާރުލުން ދިނުމަށް ވަރަށް ބޮޑަށް ދެކޮޅު ހައްދަވައިފަ އެވެ.
ޔޫން އާއި އޭނާގެ ކުރީގެ ޑިފެންސް މިނިސްޓަރާއި އަސްކަރިއްޔާގެ އިސް ކޮމާންޑަރުންނާ އެކު ޝަރީއަތް ކުރިއަށް ގެންދިއުމަށް ތައްޔާރުވަމުން އަންނައިރު، އެ ބޭފުޅުންގެ މައްޗަށް ތުހުމަތު ކުރެވެނީ މުޅި ބާރުތައް އަތުލަން ކުރި މަސައްކަތް ރާވައި ހިންގުމަށް ޔޫންއަށް އެހީތެރިވެދިން ކަމުގެ ތުހުމަތެވެ.
މިދިޔަ މަހުގެ 3 ވަނަ ދުވަހު ޓީވީ މެދުވެރިކޮށް ކުރި އިއުލާނެއްގައި ޔޫން ވިދާޅުވީ މާޝަލް ލޯ ބޭނުން ކުރައްވަނީ އުތުރު ކޮރެއާއަށް ހަމްދަރުދީވާ "ދައުލަތާ ދެކޮޅު" ބާރުތަކުން ގައުމު ސަލާމަތް ކުރުމަށް ކަމަށެވެ.
އޭރު ވެސް ކޮރަޕްޝަންގެ ބޮޑެތި މައްސަލަތަކަކާ ގުޅިގެން ބަޖެޓް ތާށިކޮށް، މައްސަލަ ހޫނުވި އެވެ. އަދި އެ ތުހުމަތުތައް ކެބިނެޓްގެ ބައެއް ވަޒީރުންގެ މައްޗަށް އުފުލައި ބަލަން ފެށި އެވެ.
އަސްކަރިއްޔާއިން ވަނީ މަޖިލީހުގެ ހުރިހާ ހަރަކާތެއް މެދުކަނޑާލާފައިވާކަން އިއުލާނުކޮށް މީޑިއާތަކުގެ ކޮންޓްރޯލް ނަގަން އުޅެފަ އެވެ.
އިދިކޮޅު ޑިމޮކްރެޓިކް ޕާޓީގެ ލީޑަރު ލީ ޖޭ-މިޔުންގް ވަނީ ނޭޝަނަލް އެސެމްބްލީގައި އިހުތިޖާޖު ކުރުމަށް އިލްތިމާސް ކުރައްވައި އެ އަމުރު ބާތިލު ކުރުމަށް ވަގުތުން ވޯޓު ދެއްވުމަށް އޭނާގެ އަރިހުގައި ތިއްބެވި މެމްބަރުންގެ ކިބައިން އެދިވަޑައިގެންފަ އެވެ.
ޔޫންގެ އިއުލާނަށް ދެ ގަޑިއިރު ވެސް ނުވަނީސް އެއްވެ ތިބި 190 މެމްބަރުންގެ އިއްތިފާގުން ވަނީ އެކަން ހުއްޓުވަން ވޯޓު ދީފަ އެވެ. އެ ވޯޓުގައި ރައީސްގެ ޕާޓީގެ މެންބަރުން ވެސް ބައިވެރިިވި އެވެ.