އަނެކާއަށް ރަނގަޅު ބައިވެރިއެއް ނުވަތަ ތަނަވަސްކަމެއް ނުވަތަ އެނޫން ނިޢުމަތެއް ލިބުނަސް ގިނަ ބައަކަށް ވެވެނީ ޙަސަދަވެރިއެވެ. އެކަމުގެ ނަތީޖާއަކަށްވެގެންދަނީ އެމީހަކު ކޮށްފައިވާ ހެޔޮ ޢަމަލުތައް އެމީހަކަށް ގެއްލިގެން ދިއުމެވެ. އަދި ފާފަވެރިވެސް ވެވުމެވެ. ﷲ ތަޢާލާގެ ލަޢްނަތް އެމީހަކަށް ޙައްޤުވުމެވެ.  
ވީމާ އަނެކާއަށް ކޮންމެ ފަދަ ނިޢުމަތެއް ލިބުނަސް އޭނާއަށްޓަކައި ހެޔޮދުޢާކުރާށެވެ. އަދި އޭނާއަށް ދެއްވެވި ފަދައިން ތިމާއަށްވެސް އެ ނިޢުމަތް ނުވަތަ އެއަށްވުރެ ބޮޑު ނިޢުމަތެއް ދެއްވެވުން އެދިގެން ދުޢާކުރާށެވެ. ﷲ ތަޢާލާ އެމީހަކަށްވެސް ނިޢުމަތް ދެއްވަވާނެތެވެ.  
މިފަދައިން ދުޢާކުރަންވާނީ ވަރަށް އިޚްލާޞްތެރިކަމާއިއެކުގައެވެ. އަނެކާގެ މައްޗަށް އެއްވެސް މިންވަރަކަށް ޙަސަދަވެރިނުވެހުރެގެންނެވެ. ނަމަވެސް ގިނަ ބައަކު އެމީހުން ޙަސަދަވެރިނުވާކަން ދައްކަނީ ބޭރުފުށުންނެވެ. ހިތުގައި ޙަސަދަވެރިކަން ފޮރުވައިގެން ތިބެއެވެ.  
ވިސްނާލަންޖެހޭނެ ކަމަކީ އެންމެންނަށް އޮޅުވައިލެވުނަސް ތިބާގެ ހިތުގެ ޙަޤީޤަތް ﷲ ތަޢާލާ ދެނެވޮޑިގެންވާ ކަމެވެ. ޤަބޫލުކުރަންޖެހޭ ކަމަކީ ހިތުގެ އެންމެ ހިމަ ލޭނާރު ބުރިކޮށްލައްވަވަންވެސް ﷲ ތަޢާލާ ކުޅަދުންވަންތަކަމެވެ.  
މީސްތަކުންނޭވެ! އެންމެންނަށް ހިތްހެޔޮކުރާށެވެ! އަނެކާއަށް ލިބޭ ނިޢުމަތްތަކަށް ހަސަދަވެރިނުވާށެވެ! ދުނިޔޭގެ އެންމެންގެ ހިތްފުރެންދެން ނިޢުމަތްތައް ދެއްވެވި ނަމަވެސް ﷲ ތަޢާލާގެ ޙަޟްރަތުން ޛައްރެއްގެ މިންވަރުވެސް މަދެއް ނުވާނެއެވެ. ތިބާގެ ބައި ދެއްވެވުމުގެ ވަޤުތު ޖެހުމުން ދެއްވަވާނެތެވެ. އިން ޝާ ﷲ  
- މުފްތީ މެންކްގެ ދަރުސަކުން